ព័ត៌មានជាតិ

ឯកឧត្ដម ហ៊ុន ម៉ានី ចូលរួមសោកស្ដាយចំពោះគ្រោះថ្នាក់ក្រឡាប់រថយន្តដឹកកម្មករ នៅខេត្តកំពង់ស្ពឺ និងជូនពរជនរងគ្រោះឆាប់ជាសះស្បើយ

បានផុស

៩ ខែ មុន

នៅ

ថ្ងៃអង្គារ ២៥ មិថុនា ២០២៤

ដោយ

ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ ចូលរួមសោកស្ដាយចំពោះហេតុការណ៍គ្រោះថ្នាក់ចរាចរណ៍ក្រឡាប់រថយន្តដឹកកម្មករ-កម្មការិនីរោងចក្រ នៅខេត្តកំពង់ស្ពឺ និងជូនពរឲ្យជនរងគ្រោះឆាប់បានជាសះស្បើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនាមក្រុមការងាររាជរដ្ឋាភិបាលចុះជួយខេត្តកំពង់ស្ពឺ ឯកឧត្ដម ហ៊ុន ម៉ានី សូមចូលរួមសោកស្ដាយចំពោះហេតុការណ៍គ្រោះថ្នាក់ចរាចរណ៍ដែលបានកើតឡើងនៅលើដងផ្លូវជាតិលេខ ៤ ត្រង់ចំណុចភូមិកែវឧត្ដម ឃុំត្រពាំងគង ស្រុកសំរោងទង ខេត្តកំពង់ស្ពឺ កាលពីព្រឹកថ្ងៃទី ២៥ ខែមិថុនា ឆ្នាំ ២០២៤។

ទន្ទឹមនេះ ឯកឧត្ដម ហ៊ុន ម៉ានី សូមជូនពរឲ្យជនរងគ្រោះឆាប់បានជាសះស្បើយ ដើម្បីត្រលប់ទៅកាន់ផ្ទះសម្បែង និងបំពេញភារកិច្ចការងារបានដូចដើមវិញ។

ជាមួយគ្នានេះ ឯកឧត្ដម ហ៊ុន ម៉ានី ក៏បានអំពាវនាវដល់អ្នកដឹកជញ្ជូនកម្មករ សូមចូលរួមបង្កើនការប្រុងប្រយ័ត្នខ្ពស់ក្នុងការបើកបរ ដោយត្រូវគោរពច្បាប់ចរាចរណ៍ បើកបរមានការយោគយល់អធ្យាស្រ័យគ្នា ជាពិសេសត្រូវត្រួតពិនិត្យលក្ខណៈបច្ចេកទេសយានយន្តឲ្យបានត្រឹមត្រូវ និងចៀសវាងដឹកលើសចំណុះ ខុសស្តង់ដារ។

ជាចុងក្រោយ ឯកឧត្ដម បានថ្លែងអំណរគុណដល់អាជ្ញាធរដែនដី កងកម្លាំងមានសមត្ថកិច្ច និងក្រុមគ្រូពេទ្យនៅមូលដ្ឋានទាំងអស់ ដែលខិតខំយកចិត្តទុកដាក់ជួយសង្គ្រោះដល់កម្មករ-កម្មការិនី ដែលរងគ្រោះទាំងអស់។

សូមបញ្ជាក់ថា កាលពីព្រឹកថ្ងៃទី ២៥ ខែមិថុនា ឆ្នាំ ២០២៤ មានករណីគ្រោះថ្នាក់ក្រឡាប់រថយន្តដឹកកម្មករ-កម្មការិនី មួយគ្រឿង បណ្ដាលឲ្យរបួសធ្ងន់-ស្រាល ៤៥ នាក់ ត្រូវបានបញ្ជូនទៅសង្គ្រោះនៅមន្ទីរពេទ្យ។

ករណីគ្រោះថ្នាក់ចរាចរណ៍នេះ បានកើតឡើងនៅលើផ្លូវជាតិលេខ ៤ ចន្លោះគីឡូម៉ែត្រលេខ ៣៤-៣៥ ភូមិកែវឧត្ដម ឃុំត្រពាំងគង ស្រុកសំរោងទង ខេត្តកំពង់ស្ពឺ។

ករណីនេះ កើតឡើងមកពីរថយន្តបុករថយន្តពីក្រោយ រួចគេចទៅបុកម៉ូតូមួយគ្រឿងទៀត ក៏ក្រឡាប់តែម្ដង។ អ្នករងរបួស ត្រូវបានសមត្ថកិច្ចនគរបាលបញ្ជូនទៅកាន់មន្ទីរពេទ្យ សរុប ៤៥ នាក់ ប្រុស ៧ នាក់ ក្នុងនោះរបួសធ្ងន់ ១៩ នាក់ និងរបួសស្រាល ២៦ នាក់ និងគ្មានអ្នកបាត់បង់អាយុជីវិតនោះទេ៕