មន្រ្តី​និង​អ្នក​បច្ចេកទេស​ចិន សិក្សាគម្រោង​​ស្តារ​​ផ្លូវ​ជាតិលេខ ៨ ពីព្រែកតាមាក់ទៅ​ពញាក្រែក

មន្រ្តីក្រសួង​សាធារណការ​និង​ដឹកជញ្ជូន​ បាន​រៀបចំ​កិច្ចប្រជុំពិនិត្យ និងពិភាក្សាលើរបាយការណ៍ នៃការសិក្សាគម្រោងធ្វើឱ្យប្រសើរឡើងផ្លូវជាតិលេខ ៨ ពីស្ពានព្រែកតាមាក់ដល់​ពញាក្រែក (ប្រសព្វផ្លូវជាតិលេខ៨)។

កិច្ចប្រជុំ​ដឹកនាំ​ដោយ​លោក ឈួន វិន រដ្ឋលេខាធិការក្រសួង​សាធារណការនិង​ដឹកជញ្ជូន​ និង​ក្រុមហ៊ុនសំណង់សៀងហៃ (Shanghai Construction Group Co,.Ltd.) ដែល​បាន​ពិនិត្យនិងពិភាក្សាលើរបាយការណ៍ នៃការសិក្សាគម្រោង​ធ្វើឱ្យប្រសើរឡើងផ្លូវជាតិលេខ៨ ពីស្ពានព្រែកតាមាក់-ពញាក្រែក (ប្រសព្វផ្លូវជាតិលេខ៨) ក្រោមក្របខ័ណ្ឌ​ហិរញ្ញប្បទានសហប្រតិបត្តិការពីរដ្ឋាភិបាល នៃសាធារណរដ្ឋប្រជាមានិតចិនជាមួយក្រុមហ៊ុនសំណង់សៀងហៃ (SCG) ដោយមានការចូលរួមពីថ្នាក់ដឹកនាំក្រសួង និងមន្ត្រីបច្ចេកទេសជំនាញជាច្រើនរូបផងដែរ។

ក្រុមហ៊ុនសំណង់សៀងហៃបានធ្វើបទបង្ហាញពីការកែសម្រួលចំណុចខ្លះ ដែលថ្នាក់ដឹកនាំក្រសួងបានមាន​មតិ​កែ​លម្អកាលពីប្រជុំនាពេលកន្លងមក ដូចជាការងារដាក់លូ សាងសង់ស្ពានថ្មី គន្លងផ្លូវពុះចែកទ្រូងថ្នល់ និងការ​សាងសង់​ស្ថានីយជញ្ជីងរថយន្ត ដោយពិនិត្យទៅលើជម្រើសដែលសមស្រប មានគុណភាព និងអាចកាត់បន្ថយផលប៉ះពាល់បានច្រើន។

លោក ឈួន វិន រដ្ឋលេខាធិការក្រសួង​សាធារណការនិង​ដឹកជញ្ជូន និង​ជាប្រធានដឹកនាំ​កិច្ច​ប្រជុំ​ បានណែនាំដល់មន្ត្រីពាក់ព័ន្ធនិងភាគីក្រុមហ៊ុន ឱ្យសហការគ្នាយ៉ាងជិតស្និទ្ធិក្នុងការរៀបចំប្លង់លម្អិតតាមផ្នែកនីមួយៗឱ្យបានហ្មត់ចត់ មុននឹងដាក់​ឆ្លងទៅថ្នាក់ដឹកនាំពិនិត្យសម្រេចជាបន្ត ដើម្បីពន្លឿនការងារសាងសង់ផ្លូវនេះឱ្យបានឆាប់រហ័ស និងមានប្រសិទ្ធភាព​៕