សំណាកអ្នកពាក់ព័ន្ធនឹងពិធីមង្គលការនៅភូមិកោះតូចខេត្តកំពង់ចាមលទ្ធផលអវិជ្ជមានវីរុសកូវីដ១៩ទាំងអស់

លទ្ធផលសំណាកអ្នកពាក់ព័ន្ធនឹងពិធីមង្គលការនៅនៅភូមិកោះតូចឃុំពាមជីកង ស្រុកកងមាស ខេត្តកំពង់ចាមចំនួន២២៣នាក់ គឺអវិជ្ជមានវីរុសកូវីដ១៩ទាំងអស់។ នេះបើតាមការបញ្ជាក់របស់ លោកវេជ្ជបណ្ឌិត គឹមសួរ ភីរុណ ប្រធានមន្ទីរសុខាភិបាលខេត្តកំពង់ចាម។

ទោះបីជាអវិជ្ជមានវីរុសកូវីដ១៩ជាលើកទី១ក៏ដោយ មនុស្សទាំង២២៣នាក់នោះត្រូវបន្តធ្វើចត្តាឡីស័កឲ្យបានគ្រប់ចំនួន១៤ថ្ងៃដើម្បីយកសំណាកជាលើកទី២ជាបន្តទៀត ហើយប្រសិនបើលទ្ធផលអវិជ្ជមានទៀតនោះទើបអនុញ្ញាតឲ្យវិលត្រឡប់ទៅផ្ទះវិញនិងអាចមានសិទ្ធិដើរហើរបាន។

ការធ្វើតេស្តរកជំងឺកូវីដ១៩លើមនុស្សទាំង២២៣នាក់នោះ បានកើតឡើង​បន្ទាប់ពី​​ក្រសួងសុខាភិបាល នា​ព្រឹក​ថ្ងៃទី​២៦ ខែកុម្ភៈ ឆ្នាំ​២០២១ បាន​រកឃើញ​បុរស​ម្នាក់​ដែល​បានមក​ចូលរួម​ក្នុង​ពិធីមង្គលការនៅ​ភូមិ​កោះ​តូច ឃុំ​ពាមជីកង ស្រុកកងមាសមាន​ផ្ទុក​ជំងឺ​កូ​វីដ​-១៩នៅថ្ងៃទី២៧ ខែកម្ភៈ។

ក្រោយមក មន្ទីរសុខាភិបាលខេត្តកំពង់ចាមបានចុះស្រាវជ្រាវយកសំណាកអ្នកពាក់ព័ន្ធចំនួន២២៣សំណាក ក្នុងនោះមានអ្នកប៉ះពាល់ដោយផ្ទាល់ចំនួន២១នាក់ត្រូវបានបញ្ជួនទៅធ្វើចត្តាឡីសក័នៅសណ្ឋាគារមេគង្គ និង២០២នាក់ទៀតធ្វើចត្តាឡីស័កនៅតាមផ្ទះ។

ដើម្បីទប់ស្កាត់ការរីករាលដាលជំងឺកូវីដ១៩ក្នុងសហគមន៍ លោកប្រធានមន្ទីរសុខាភិបាលបានអំពាវនាវដល់បងប្អូនដែលកំពុងធ្វើចត្តាឡីស័កទាំងនៅសណ្ឋាគារ និងនៅតាមផ្ទះត្រូវតែអនុវត្តយ៉ាងម៉ឺងម៉ាត់តាមការណែនាំរបស់មន្ត្រីសុខាភិបាលប្រកបដោយស្មារតីទទួលខុសត្រូវខ្ពស់ ដើម្បីឲ្យក្រុមគ្រួសារ និងសហគមន៍ចៀសផុតពីជំងឺដ៏កាចសាហាវនេះ។

លោកបានប្រាប់ឱ្យដឹងថា មន្ទីរសុខាភិបាលបានរៀបចំ​ទីតាំង​សម្រាប់​ពិនិត្យ​សុខភាព និងយក​សំណាកចំនួន​២កន្លែង គឺ​នៅ​ភូមិ​កោះ​តូច ឃុំ​ពាមជីកង ស្រុក​កងមាស និង​នៅ​មណ្ឌល​សុខភាព​ស្វាយ​ខ្សាច់​ភ្នំ នៅ​ភូមិ​ស្វាយ​កណ្តាល ឃុំ​ស្វាយ​ខ្សាច់​ភ្នំ ស្រុក​ស្រី​សន្ធរ​៕

អត្ថបទ៖ សំអឿន