អភិបាលខណ្ឌ៧មករា ចុះពិនិត្យការរៀបចំការ៉ូឡាថ្មី លើចិញ្ចើមផ្លូវលេខ៩៣ ដើម្បីមានលក្ខណៈបច្ចេកទេសត្រឹមត្រូវ

លោក ថេង សុថុល អភិបាលនៃគណៈអភិបាលខណ្ឌ៧មករា បានដឹកនាំមន្ត្រីជំនាញចុះត្រួតពិនិត្យទីតាំងការដ្ឋានផ្លាស់ប្ដូរការរ៉ូឡាថ្មី តាមចិញ្ចឹមផ្លូវលេខ៩៣ (មហាវិថីព្រះមុន្នីវង្ស) ដើម្បីឲ្យមានសណ្ដាប់ធ្នាប់ល្អ និងមានលក្ខណៈបច្ចេកទេសត្រឹមត្រូវ។

លោក ថេង សុថុល បានឲ្យដឹងថា ការចុះត្រួតពិនិត្យការដ្ឋាននេះ គឺដើម្បីមើលថា តើក្រុមហ៊ុនដេញថ្លៃវិនិយោគនៅក្នុងខណ្ឌ បានអនុវត្តតាមលក្ខណៈបច្ចេកទេសត្រឹមត្រូវដែរឬទេ។ និងណែនាំឲ្យម្ចាស់ក្រុមហ៊ុនម៉ៅការគម្រោងធ្វើយ៉ាងណា កាត់បន្ថយឲ្យបានច្រើនបំផុតនូវផលប៉ះពាល់ដល់ការប្រកបអាជីវកម្មរបស់ពលរដ្ឋ ស្ថិតនៅតាមបណ្ដោយផ្លូវលេខ​៩៣នេះ។

បន្ថែមពីនេះ លោកអភិបាលបានជួបសំណេះសំណាលជាមួយប្រជាពលរដ្ឋដែលមានផ្ទះនៅតាមបណ្ដោយផ្លូវដែលមានការដ្ឋាន សូមចិត្តប្រជាពលរដ្ឋព្រោះក្នុងការដ្ឋានតែងតែមានការប៉ះពាល់ដល់ការធ្វើដំណើរប្រកបរបរអាជីវកម្មរបស់ប្រជាពលរដ្ឋ។ ដូច្នេះលោកអភិបាលបានសំណូមពរ និងសូមអធ្យាស្រ័យដល់ប្រជាពលរដ្ឋក្នុងរយៈពេលការដ្ឋានកំពុងតែដំណើរការនេះផងដែរ។

ពលរដ្ឋដែលមានផ្ទះនៅតាមបណ្ដោយផ្លូវលេខ៩៣ មូលដ្ឋានសង្កាត់បឹងព្រលិត បានលើកឡើងថា ពួកគាត់ពិតជាសប្បាយចិត្តណាស់ ទោះបីមានផលប៉ះពាល់បន្តិចបន្តួចក្ដី អំឡុងពេលការដ្ឋានកំពុងដំណើរការ តែយ៉ាងណាគឺសប្បាយចិត្តចំពោះការយកចិត្តទុកដាក់របស់អាជ្ញាធរមូលដ្ឋាន បានរៀបចំផ្លាស់ប្ដូរការ៉ូឡាថ្មី ជូនដល់ពលរដ្ឋ។ ដោយកន្លងមកការ៉ូឡាចាស់ មានសភាពខូចខាត ទ្រុតទ្រោម ក្រោយផ្លាស់ដាក់ការ៉ូឡាថ្មី មានសភាពស្អាតល្អ សោភ័ណ្ឌភាពស្អាត ងាយស្រួលដល់ពលរដ្ឋអ្នកធ្វើដំណើរដោយថ្មើរជើងផង។

ជាចុងក្រោយលោកអភិបាលក៏បានណែនាំដល់មន្ត្រីជំនាញពាក់ព័ន្ធនៅក្នុងខណ្ឌត្រូវចុះត្រួតពិនិត្យតាមការរដ្ឋានទាំងអស់នៅក្នុងមូលដ្ឋានខណ្ឌឲ្យបានញឹកញាប់ដើម្បីឲ្យមានលក្ខណៈបច្ចេកទេសត្រឹមត្រូវក្នុងការដ្ឋាន៕

អត្ថបទ៖ សុភា