ព័ត៌មានជាតិ

ប្រឡាយធម្មជាតិចំនួន៣ ដែលប្រឈមនឹងកកស្ទះចរន្តទឹកហូរចេញត្រូវបានជីកស្តារ

បានផុស

៥ ខែ មុន

នៅ

ថ្ងៃព្រហស្បតិ៍ ២៧ មិថុនា ២០២៤

ដោយ

កោះកុង ៖ ទីតាំងប្រឡាយធម្មជាតិចំនួន៣ក្នុងក្រុងខេមរភូមិន្ទ ត្រូវបានអាជ្ញាធរចុះជីកស្តារបើកមុខទឹក ក្រោយពិនិត្យឃើញថា ប្រឈមនឹងការកកស្ទះចរន្តបរិមាណទឹករដូវវស្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីតាំងដែលអាជ្ញាធររំដោះទឹកចេញមិនបន្តជន់លិចផ្លូវ និងប្រជាពលរដ្ឋ គឺទី១ ស្ពានដូនទាវ ភូមិ១ សង្កាត់ស្មាច់មានជ័យ ទី២ ប្រឡាយធម្មជាតិក្បែរផ្លូវផ្ទះពេទ្យទូច ភូមិ៣ សង្កាត់សង្កាត់ស្មាច់មានជ័យ និងទី៣ ម្តុំក្បែរសាលាក្រុង សង្កាត់ស្ទឹងវែង។

លោក ឈឹម ចិន អភិបាលស្តីទីក្រុងខេមរភូមិន្ទ បានឱ្យដឹងនៅរសៀលថ្ងៃទី២៧ ខែមិថុនា ឆ្នាំ២០២៤ថា ៣ទៅ៤ថ្ងៃនេះ ទោះបីមានជាមានធាតុអាកាសភ្លៀងធ្លាក់ច្រើនយ៉ាងណា ក៏អាជ្ញាធរ និងក្រុមការងារចុះពិនិត្យ និងជីកកាយស្តារជាបណ្តោះអាសន្នសិននូវទីតាំងដែលពលរដ្ឋងាយនឹងលិចដោយសារជំនន់ទឹកភ្លៀង។

លោក ឈឹម ចិន ពន្យល់ដែរថា ប្រឡាយធម្មជាតិ៣ចំនួនខាងលើ ភាគច្រើនសំបូរទៅដោយសំរាមដែលកកស្ទះពេញប្រឡាយតែម្តង ដូច្នេះចាំបាច់ត្រូវជីកស្តារបើកមុខទឹកឱ្យវាហូរបានល្អចាក់ទៅសមុទ្រ ករណីមិនធ្វើបែបនេះលំនៅឋានពលរដ្ឋ ផ្លូវថ្នល់ និងសត្វចិញ្ចឹមនានាបន្តលិចលង់បន្ត ពេលមានភ្លៀងក្នុងបរិមាណច្រើន។

ទន្ទឹមនោះ អាជ្ញាធរក្រុងខេមរភូមិន្ទ ក៏ស្នើដល់ប្រជាពលរដ្ឋកុំចោលសំរាមពាសវាលពាសកាលបណ្តាលកកស្ទះមាត់លូ ព្រមទាំងប្រឡាយធម្មជាតិផ្សេងៗ ខណៈអាជ្ញាធរ និងមន្ទីរពាក់ព័ន្ធពិនិត្យលទ្ធភាពលើជាគម្រោងកសាងប្រព័ន្ធលូរំដោះទឹកពេលរដូវវស្សា។

អ្នកស្រី ចន្ទ្រា និងអ្នកស្រី ចែម៉ាប់ រស់នៅភូមិ៣ សង្កាត់ស្មាច់មានជ័យ យល់ឃើញថា នៅពេលដែលបានអាជ្ញាធរ និងក្រុមការងារចុះពិនិត្យស្តារប្រឡាយបើកមុខទឹក សម្រួលដល់ចរន្តហូរបានល្អយ៉ាងដូច្នេះ ជារឿងដែលល្អហើយ។

ប៉ុន្តែពួកគាត់ស្នើសុំដល់អាជ្ញាធរ និងអ្នកពាក់ព័ន្ធ មេត្តាជួយពិនិត្យរាល់លទ្ធភាពដែលមានកសាងជាប្រឡាយលូរំដោះទឹកថ្មីបន្ថែម ដើម្បីបញ្ចៀសរងការជន់លិចដូចសព្វថ្ងៃនេះបន្តទៀត ព្រោះលំបាករស់នៅរកស៊ីទទួលទាន និងប៉ះពាល់ដល់សុខភាពស្ទើររៀងរាល់ឆ្នាំ។

តំណាងប្រជាពលរដ្ឋ ជឿជាក់ថា រាជរដ្ឋាភិបាល អាជ្ញាធរខេត្តកោះកុង មន្ទីរអង្គភាព ជុំវិញខេត្ត នឹងឯកភាពលើគម្រោងធ្វើហេដ្ឋារចនាសម្ព័ន្ធមានជាប្រឡាយលូរំដោះថ្មីធំទូលាយអាចបង្ហូរទឹកចេញបានល្អមិនកកស្ទះ។ ចំពោះការគ្រប់គ្រងសំរាម ទោះបីជាពួកគាត់វេចខ្ទប់ដាក់ទីខ្ពស់យ៉ាងណាក៏ទឹកឡើងលិចហូរពេញទីសាធារណៈដដែល៕

អត្ថបទ ៖ សិរីវឌ្ឍនៈ