ប្រធានបក្សកាន់អំណាច ប្រកាសជ្រោងទង់មហាសាមគ្គីជាតិខ្មែរ ដោយប្រឆាំងរាល់ទង្វើដែលធ្វើឱ្យសាមគ្គីនេះចុះខ្សោយ

សម្ដេចតេជោ ហ៊ុន សែន ក្នុងនាមជាប្រធានគណបក្សប្រជាជនកម្ពុជា បានប្រកាសបន្តជ្រោងទង់មហាសាមគ្គីជាតិខ្មែរ ដោយប្រឆាំងដាច់ខាតរាល់សកម្មភាពទាំងឡាយណាដែលធ្វើឱ្យសាមគ្គីភាពជាតិចុះខ្សោយ។ ទន្ទឹមនេះ គណបក្សប្រជាជនកម្ពុជា ដែលកំពុងកាន់អំណាច ក៏នឹងបន្តជំរុញការអនុវត្តនយោបាយការបរទេសឯករាជ្យផ្អែកលើច្បាប់។

ថ្លែងសារនយោបាយក្នុងអង្គមិទ្ទិញខួប៧៣ឆ្នាំថ្ងៃកំណើតគណបក្សប្រជាជនកម្ពុជា នាព្រឹកថ្ងៃទី២៨ ខែមិថុនា ឆ្នាំ២០២៤ សម្ដេចតេជោ ហ៊ុន សែន បានប្រកាសថា គណបក្សប្រជាជនកម្ពុជា បន្តជ្រោងខ្ពស់ទង់មហាសាមគ្គីជាតិក្រោមដំបូលរដ្ឋធម្មនុញ្ញនៃកម្ពុជា និងបាវចនា ជាតិ សាសនា ព្រះមហាក្សត្រ ដោយប្រឆាំងដាច់ខាតនូវរាល់សកម្មភាពណាដែលធ្វើឱ្យសាមគ្គីភាពត្រូវចុះខ្សោយ។

ការប្រកាសរបស់សម្ដេចតេជោបែបនេះ ដោយសារតែមេរៀនពីអតីតកាលរបស់កម្ពុជាបានឆ្លងកាត់នូវការបែកបាក់សាមគ្គីភាពជាតិពីអតីតកាល ហើយបានផ្តល់ឱ្យកម្ពុជានូវមេរៀនដ៏ឈឺចាប់បំផុត ដែលត្រូវតែចងចាំជានិច្ច មិនត្រូវឱ្យស្ថានភាពដ៏អាក្រក់នេះអាចកើតមានជាថ្មីបានឡើយ។ ដោយមេរៀនដ៏ឈឺចាប់នេះ សម្ដេចតេជោ ហ៊ុន សែន បានរម្លឹកថា ក្រោយថ្ងៃជ័យជម្នះ ៧មករា គណបក្សប្រជាជនកម្ពុជា បានដឹកនាំប្រជាជនជ្រោងទង់មហាសាមគ្គីជាតិ សំដៅការពារការរស់ឡើងវិញរបស់ប្រជាជាតិ ទប់ស្កាត់របបប្រល័យពូជសាសន៍មកវិញ និងការកសាងជាតិឡើងវិញពីគំនរផេះផង់។

ផលនៃទង់មហាសាមគ្គីជាតិនេះ បានចាប់ផ្តើមនាំកម្ពុជាពីស្ថានភាពវិនាសអន្តរាយខ្ទេចខ្ទីដោយអំពើប្រល័យពូជសាសន៍ និងសង្គ្រាមស៊ីវិលដ៏រ៉ាំរ៉ៃ មកកាន់ស្ថានភាពដែលប្រទេសមានសន្តិភាព ឯកភាពជាតិពេញលេញ និងមានការផ្លាស់ប្តូររីកចម្រើនលើគ្រប់វិស័យ។ នេះជាការបន្ថែមរបស់សម្ដេចតេជោ ហ៊ុន សែន។

សម្ដេចតេជោ ហ៊ុន សែន ក៏បានលើកឡើងអំពីសារៈសំខាន់នៃចំណងទាក់ទងដ៏ស្អិតរមួតរវាងសាមគ្គីភាពជាតិទាំងមូល និងសាមគ្គីភាពឯកភាពផ្ទៃក្នុងគណបក្ស។ តាមការគូសបញ្ជាក់របស់សម្ដេចតេជោ សាមគ្គីភាព និងឯកភាពផ្ទៃក្នុងបក្ស គឺជាស្នូលគន្លឹះដ៏សំខាន់ ដែលទាមទារឱ្យអង្គការចាត់តាំងគណបក្សគ្រប់ថ្នាក់ មន្ត្រីសមាជិកគណបក្សគ្រប់រូប ត្រូវខិតខំថែរក្សាសាមគ្គីភាព ឯកភាពផ្ទៃក្នុងគណបក្សឱ្យរឹងមាំជានិច្ច ផ្អែកលើមូលដ្ឋានកម្មវិធីនយោបាយ លក្ខន្តិកៈ គោលការណ៍ និងគោលនយោបាយនានារបស់គណបក្ស។

សម្ដេចតេជោ គូសបញ្ជាក់បន្ថែមថា ដោយប្រកាន់ខ្ជាប់រដ្ឋធម្មនុញ្ញនៃកម្ពុជា គណបក្សប្រជាជនកម្ពុជា ក៏បន្តជំរុញការអនុវត្តនយោបាយការបរទេសឯករាជ្យដោយផ្អែកលើច្បាប់ មូលដ្ឋានគោរពគោលការណ៍នានានៃធម្មនុញ្ញអង្គការសហប្រជាជាតិ និងធម្មនុញ្ញអាស៊ាន ដើម្បីការពាររាល់ផលប្រយោជន៍គោលរបស់កម្ពុជា និងបង្កើនការចូលរួមក្នុងកិច្ចការអន្តរជាតិ ដើម្បីបុព្វហេតុសន្តិភាព សន្តិសុខ សហប្រតិបត្តិការ និងវិបុលភាពរបស់តំបន់ និងពិភពលោក។

ដោយមានសម្ព័ន្ធភាពជាមួយបណ្តាគណបក្សនៅកម្ពុជាចំនួន២៤ផ្សេងទៀត សម្ដេចតេជោ ក្នុងនាមជាប្រធានគណបក្សប្រជាជនកម្ពុជា ក៏បានប្រកាសរួមគ្នាជាមួយគណបក្សសម្ព័ន្ធភាពទាំងនោះ ព្រមទាំងពង្រឹងទំនាក់ទំនងដ៏ល្អជាមួយបណ្តាអង្គការនានានៃសង្គមស៊ីវិល និងមជ្ឈដ្ឋានទូទៅ ដើម្បីលទ្ធិប្រជាធិបតេយ្យ និងនីតិរដ្ឋ ក៏ដូចជាពង្រឹងសន្តិភាព ស្ថិរភាព និងជំរុញការអភិវឌ្ឍសេដ្ឋកិច្ច-សង្គម។

ព្រមជាមួយនេះ ក្នុងស្ថានភាពបច្ចុប្បន្ន ដែលសភាពការណ៍ពិភពលោកកំពុងមានការវិវត្តយ៉ាងស្មុគស្មាញ និងការគំរាមកំហែងដ៏គ្រោះថ្នាក់នោះ សម្ដេចតេជោ ក៏បានអំពាវនាវដល់បណ្តារដ្ឋ ជាពិសេសបណ្តាប្រទេសមហាអំណាចស្តារឡើងវិញនូវកិច្ចសហប្រតិបត្តិការ និងរិះរកដំណោះស្រាយចំពោះបញ្ហាក្តៅៗទាំងឡាយតាមរយៈការចរចា ដើម្បីសន្តិភាព សន្តិសុខ និងការស្ថិតស្ថេររីកចម្រើនរបស់មនុស្សជាតិទាំងមូល។ សម្ដេចតេជោ សង្កត់ធ្ងន់ថា «ការដាក់ទណ្ឌកម្ម អំពើហិង្សា និងសង្គ្រាម ពុំមែនជាដំណោះស្រាយល្អនោះឡើយ វាគ្រាន់តែបានបង្កើនថែមទៀតនូវហានិភ័យសម្រាប់មនុស្សជាតិប៉ុណ្ណោះ»។

រយៈពេល៧៣ឆ្នាំមកនេះ គណបក្សប្រជាជនកម្ពុជា គឺជាកម្លាំងនយោបាយតែមួយគត់ ដែលបានស្ថិតនៅរួមរស់ផ្សារភ្ជាប់ជានិច្ចជាមួយប្រជាជន ទោះបីសភាពការណ៍ជាតិមានការវិវត្តដ៏ស្មុគស្មាញយ៉ាងណាក្តី។ គណបក្ស បានរក្សាខ្ជាប់ឥតប្រែប្រួលនូវគោលបំណង និងឧត្តមគតិរបស់ខ្លួន គឺប្រមូលកម្លាំងប្រជាជាតិទាំងមូលដែលមានឧត្តមគតិស្នេហាជាតិមាតុភូមិ ស្រឡាញ់លទ្ធិប្រជាធិបតេយ្យ និងសន្តិភាព ដោយមិនប្រកាន់ឋានៈ ជីវភាព ជនជាតិ ជំនឿសាសនា អតីតកាល ដើម្បីរួមកម្លាំងគ្នារំដោះប្រទេសជាតិ ការពារមាតុភូមិ ការពារសមិទ្ធផលនៃសង្គមជាតិ និងកសាងប្រទេសមួយឯករាជ្យ សន្តិភាព សេរីភាព ប្រជាធិបតេយ្យ អព្យាក្រឹត និងវឌ្ឍនភាពសង្គម៕

អត្ថបទដោយ៖ ធឿន វ៉ាន់សុង