កម្ពុជាបន្តធ្លាក់ភ្លៀង និងខ្យល់កន្ត្រាក់ ខណៈកម្ពស់ទឹករលកនៅតំបន់សមុទ្រ អាចកើតមានដល់ ២,៥០ ម៉ែត្រ

ក្រសួងធនធានទឹក និងឧតុនិយមបានប្រកាសនៅថ្ងៃទី ៣០ ខែមិថុនា ឆ្នាំ ២០២៤ នេះថា ព្រះរាជាណាចក្រកម្ពុជានឹងបន្តមានភ្លៀងធ្លាក់ប្រមាណ ១០% រហូតដល់ថ្ងៃទី ០២ ខែកក្កដា ដោយសារឥទ្ធិពលសម្ពាធទាបបន្តគ្របដណ្ដប់​មក​លើ​ឈូងសមុទ្រថៃ កម្ពុជា ភាគកណ្ដាលនៃអាងទន្លេមេគង្គ និងសមុទ្រចិនខាងត្បូង។

បាតុភូតនេះនឹងធ្វើឱ្យខេត្តមួយចំនួននៅតំបន់វាលទំនាប ដូចជាខេត្តបន្ទាយមានជ័យ បាត់ដំបង សៀមរាប ពោធិ៍សាត់ កំពង់ឆ្នាំង កំពង់ធំ កំពង់ចាម ត្បូងឃ្មុំ ព្រៃវែង ស្វាយរៀង កណ្ដាល តាកែវ និងរាជធានីភ្នំពេញ មានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់បោកបក់គ្រប់ដណ្ដប់លើផ្ទៃដី ១០ ភាគរយ ខណៈខេត្តស្ថិតនៅក្នុងតំបន់ខ្ពង់រាបដែលមានខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ស្ទឹងត្រែង ក្រចេះ រតនគិរី តំបន់ជួរភ្នំក្រវាញ និងជួរភ្នំដងរែក មានភ្លៀងធ្លាក់គ្របដណ្ដប់លើផ្ទៃដី ៥%។

ចំណែកឯតំបន់មាត់សមុទ្រមានខេត្តកោះកុង ព្រះសីហនុ កំពត កែបនិងជួរភ្នំបូកគោអាចមានភ្លៀងធ្លាក់ជាមួយផ្គរ រន្ទះ និងខ្យល់បោកបក់គ្របដណ្ដប់លើផ្ទៃដី ១០% ខណៈកម្ពស់ទឹករលលកអាចមានដល់២,៥០ ម៉ែត្រ៕