ពលរដ្ឋរងគ្រោះបាក់ស្រុតផ្ទះ១២គ្រួសារនៅខេត្តកំពង់ឆ្នាំងទទួលបានអំណោយពីកាកបាទក្រហម

លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាប្រធានក្រុមការងារថ្នាក់កណ្ដាលចុះជួយមូលដ្ឋានក្រុងកំពង់ឆ្នាំង និងលោក ស៊ុន សុវណ្ណរិទ្ធិ អភិបាលខេត្ត និងជាប្រធានសាខាគណៈកម្មាធិការកាកបាទក្រហមកម្ពុជាខេត្តកំពង់ឆ្នាំង នៅរសៀលថ្ងៃទី៣០ ខែមិថុនា ឆ្នាំ២០២៤ បានដឹកនាំក្រុមការងារចុះសួរសុខទុក្ខ និងនាំយកអំណោយសាខាកាក បាទក្រហមកម្ពុជាខេត្ត និងអំណោយរបស់ក្រុមការងារចែកជូនប្រជាពលរដ្ឋចំនួន១២គ្រួសារដែលរងគ្រោះដោយផ្ទះស្រុតបាក់ដី នៅក្នុងភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង កាលពីព្រឹកថ្ងៃទី៣០ ខែមិថុនាឆ្នាំ២០២៤។

នៅក្នុងឱកាសនេះ លោកជំទាវ ជូ ប៊ុនអេង និងលោក ស៊ុន​ សុវណ្ណារិទ្ធិ បានពាំនាំនៅការផ្ដាំផ្ញើសួរសុខទុក្ខពីសំណាក់ប្រមុខរាជរដ្ឋាភិបាលកម្ពុជាដែលជានិច្ចជាកាលតែងតែចុះសួរសុខទុក្ខ និងជួយជួយដោះស្រាយរាល់ការខ្វះខាតជូនប្រជាពលរដ្ឋគ្រប់មូលដ្ឋានដោយមិនប្រកាន់និន្នាការនយោបាយអ្វីឡើយ។

លោកជំទាវ និងលោកអភិបាលខេត្តក៏បានអំពាវនាវដល់ប្រជាពលរដ្ឋរងគ្រោះសូមមេត្តាប្រុងប្រយ័ត្នឱ្យបានខ្ពស់ ចំពោះហេតុការណ៍ស្រុកដីខូចខាតផ្ទះសម្បែងចំណូល១២គ្រួសារ ខាងលើនេះ ដើម្បីជៀសវាងកុំឲ្យមានគ្រោះថ្នាក់ដល់ក្រុមគ្រួសារ។ ដោយឡែកចំពោះអំណោយដែលបានចែកជូនប្រជាពលរដ្ឋខាងលើនេះក្នុងមួយគ្រួសារទទួលបាន អង្ករ ២៥ គីឡូ, ត្រីខ១ យួរ , ទឹកត្រី១យួរ មី១កេស ឃីត១កញ្ចាប់និងថវិកាមួយចំនួនផងដែរ៕

អត្ថបទ៖ ឈៀងថារិទ្ធ