ព័ត៌មានជាតិ
អ្នកនាំពាក្យក្រសួងព័ត៌មាន៖ ប្រព័ន្ធផ្សព្វផ្សាយឯករាជ្យ មិនត្រូវស្ថិតត្រឹមលើបបូរមាត់ទេ តែត្រូវមានការវាស់វែង
កម្ពុជា បានបើកយ៉ាងទូលាយដល់បណ្តាអង្គភាពសារព័ត៌មាន និងអ្នកសារព័ត៌មាន ក្នុងការធ្វើសកម្មភាពប្រមូលព័ត៌មាន និងផ្សព្វផ្សាយព័ត៌មានពិតដល់សាធារណជន។ លោក ទេព អស្នារិទ្ធ អ្នកនាំពាក្យក្រសួងព័ត៌មានបានអះអាងថា អង្គភាពសារព័ត៌មាន និងអ្នកសារព័ត៌មានជាច្រើននៅកម្ពុជា កំពុងធ្វើសកម្មភាពរបស់ខ្លួនដោយឯករាជ្យ និងផ្សព្វផ្សាយព័ត៌មានរបស់ខ្លួនដោយសេរី មិនមានការរិតត្បិត ឬគាបសង្កត់ណាមួយឡើយ។ មិនតែប៉ុណ្ណោះ លោកក៏គូសរំលេចឱ្យដឹងដែរថា ប្រព័ន្ធផ្សព្វផ្សាយឯករាជ្យ ឬមិនឯករាជ្យ មិនមែនស្ថិតនៅលើមាត់ចេះតែថា ចេះតរែនិយាយនោះទេ ពោល គឺត្រូវមានការវាស់វែងត្រឹមត្រូវ។
បច្ចុប្បន្ន នៅកម្ពុជា ទាំងប្រព័ន្ធផ្សព្វផ្សាយរដ្ឋ និងឯកជន ដែលប្រកាន់ខ្ជាប់ក្រមសីលធម៌វិជ្ជាជីវៈ និងគោលការណ៍សុចរិតភាព សុទ្ធសឹងរួមចំណែកក្នុងការលើកកម្ពស់ការអភិវឌ្ឍវិស័យព័ត៌មាន និងចូលរួមយ៉ាងសកម្មក្នុងការលើកតម្កើងសិទ្ធិបញ្ចេញមតិ និងសេរីភាពសារព័ត៌មាននៅកម្ពុជា។ ជាក់ស្តែង អ្នកសារព័ត៌មានចំនួនប្រមាណ៨០% ក្នុងចំណោមអ្នកដែលបានចូលរួមសរុបក្នុងការស្ទង់មតិឆ្នាំ២០២៤ ស្តីពីស្ថានភាពសេរីភាពសារព័ត៌មាននៅកម្ពុជា (របាយការណ៍_ស្ថានភាពសេរីភាពសារព័ត៌មាននៅកម្ពុជា FINAL_2.pdf) បានអះអាងថា ខ្លួនមានសេរីភាពពេញលេញក្នុងការប្រកបអាជីពជាអ្នកសារព័ត៌មាន ដោយមានភាពងាយស្រួល និងសុវត្ថិភាព និងដោយឯករាជ្យភាព ក្នុងការប្រមូលព័ត៌មានពីប្រភពផ្សេងៗសម្រាប់ការសរសេរ ផលិត និងផ្សព្វផ្សាយព័ត៌មានរបស់ខ្លួនដោយសេរី។ នេះ គឺជាគូសបញ្ជាក់របស់អ្នកនាំពាក្យក្រសួងព័ត៌មាន ការឆ្លើយតបទៅនឹងមតិមួយចំនួនតូចដែលបានបង្ហាញក្តីបារម្ភអំពីការធ្លាក់ចុះនូវសារព័ត៌មានឯករាជ្យ។
លោក ទេព អស្នារិទ្ធ អ្នកនាំពាក្យក្រសួងព័ត៌មាន បានពន្យល់បន្ថែមថា ទិន្នន័យឆ្នាំ២០២៣របស់ក្រសួងព័ត៌មាន បានបង្ហាញថា កម្ពុជាសព្វថ្ងៃ មានអង្គភាពសារព័ត៌មានចំនួនជាងពីរពាន់អង្គភាព ហើយមានអ្នកសារព័ត៌មានចំនួនប្រមាណមួយម៉ឺននាក់ ទាំងប្រព័ន្ធផ្សព្វផ្សាយប្រពៃណី និងទំនើប បាន និងកំពុងអនុវត្តការងារចុះយកព័ត៌មាន ផលិត និងផ្សព្វផ្សាយព័ត៌មានគ្រប់ទម្រង់ ក៏ដូចជាធ្វើសេចក្ដីរាយការណ៍ព័ត៌មាននានាបានដោយសេរី គ្រប់ពេលវេលា ដោយសុវត្ថិភាព តាមវិជ្ជាជីវៈខ្លួនដោយតម្លាភាព ហើយទទួលបានការទុកចិត្ត និងការគាំទ្រពីសាធារណជនគ្រប់មជ្ឈដ្ឋានទាំងអស់។ សកម្មភាពទាំងនេះ បាន និងកំពុងចូលរួមយ៉ាងសកម្មក្នុងការធានាការទទួលព័ត៌មានរបស់ប្រជាជននៅទូទៅប្រទេស ប្រកបដោយគុណភាព និងសុវត្ថិភាព សម្រាប់ផ្តល់ព័ត៌មានពិត គ្រប់ជ្រុងជ្រោយ ព្រមទាំងផ្តល់ចំណេះដឹងសម្បូរបែបលើគ្រប់វិស័យក្នុងសង្គម ស្របតាមតម្រូវការប្រចាំថ្ងៃ និងគាំទ្រដល់ការធ្វើការសម្រេចចិត្តត្រឹមត្រូវក្នុងការលើកកម្ពស់ជីវភាពរស់នៅបានកាន់តែប្រសើរ។ នេះបើតាមអ្នកនាំពាក្យក្រសួងព័ត៌មាន។
នៅក្នុងឆ្នាំ២០២៤នេះ ក្រសួងព័ត៌មានបានចេញផ្សាយ«របាយការណ៍ស្តីពីស្ថានភាពសេរីភាពសារព័ត៌មាននៅកម្ពុជា» ក្រោយពីក្រសួងបានចំណាយពេលវេលាក្នុងការសិក្សាយ៉ាងម៉ត់ចត់ ដោយផ្អែកលើមូលដ្ឋាន និងវិធីសាស្ត្រស្រាវជ្រាវបែបវិទ្យាសាស្ត្រដែលមានការទទួលស្គាល់ ព្រមទាំង មានការចូលរួមពីសំណាក់អ្នកសារព័ត៌មាននៅទូទាំងប្រទេស បុគ្គលសំខាន់ៗ និងតំណាងក្នុងវិស័យព័ត៌មានពីគ្រប់មជ្ឈដ្ឋានក្នុងប្រទេសកម្ពុជា។ ការសិក្សានេះ បានទទួលការសាទរពីស្ទើរគ្រប់មជ្ឈដ្ឋានក្នុងសង្គម ក៏ដូចជាពីសំណាក់ថ្នាក់ដឹកនាំក្នុងស្ថាប័ននីតិបញ្ញត្តិ និងរាជរដ្ឋាភិបាលទៀតផង។
លទ្ធផលនៃការសិក្សានេះ បានបង្ហាញថា អ្នកសារព័ត៌មានចំនួន ៧៩,៨% ក្នុងចំណោមអ្នកចូលរួមក្នុងការស្ទង់មតិសរុប បានឆ្លើយថា សេរីភាពសារព័ត៌មាននៅកម្ពុជាមានភាពល្អប្រសើរ និងមានភាពសម្បូរបែបទាំងប្រព័ន្ធផ្សព្វផ្សាយប្រពៃណី និងទំនើប។ សម្រាប់លោក ទេព អស្នារិទ្ធ តាមរយៈការសិក្សានេះ កម្ពុជាបានបង្ហាញភាពជាម្ចាស់លើការអភិវឌ្ឍវិស័យព័ត៌មានប្រកបដោយបរិយាបន្ន ព្រោះការសិក្សានេះ ជាការស្រាវជ្រាវ និងវាយតម្លៃលើស្ថានភាពសេរីភាពសារព័ត៌មាននៅកម្ពុជាដោយកម្ពុជាខ្លួនឯងផ្ទាល់ និងដោយមានការចូលរួមពីអ្នកសារព័ត៌មាន និងតួអង្គពាក់ព័ន្ធទាំងអស់ក្នុងវិស័យព័ត៌មាន។
ដោយឡែក ទាក់ទងនឹងសារព័ត៌មានឯករាជ្យ ក៏មានមតិមួយចំនួនផ្សេងទៀតបានចោទសួរវិញដែរថា តើគេមានអីសម្រាប់វាស់វែងដែរ ឬទេ? ឬវាអាចគ្រាន់តែជាលេស ដើម្បីគាំទ្ររបៀបវារៈផ្សេងទៅវិញ ហើយផ្ទុយទៅវិញបានមើលរំលងស្ថានភាពពិតនាពេលបច្ចុប្បន្នរបស់កម្ពុជា ជាពិសេស គឺភាពល្អប្រសើរនៃស្ថានភាពសេរីភាពសារព័ត៌មាន ក៏ដូចជា ហាក់មិនបានផ្តល់តម្លៃចំពោះកិច្ចខិតខំរបស់រាជរដ្ឋាភិបាល និងសមិទ្ធផលដែលក្រសួងព័ត៌មានសម្រេចបាន ទាំងក្នុងក្របខណ្ឌនៃការអនុវត្តគោលនយោបាយអាទិភាពរបស់ក្រសួង និងក្នុងក្របខណ្ឌនៃកិច្ចសហការជាមួយបណ្តាភាគីរដ្ឋ និងឯកជនពាក់ព័ន្ធទាំងអស់ក្នុងវិស័យព័ត៌មាន សំដៅគាំទ្រភាពជោគជ័យលើការអនុវត្តយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាល។
រីឯសារព័ត៌មានមួយចំនួនដែលបានទទួលមូលនិធិពីបរទេស គឺបានបម្រើរបៀបវារៈនយោបាយរបស់បរទេសដែលផ្តល់មូលនិធិនោះ តែបែរជាមកអះអាងថា ខ្លួនជាអ្នកឯករាជ្យ ហើយបានក្រឡៃភាពល្អប្រសើរនៃសេរីភាពសារព័ត៌មាននៅកម្ពុជា ថាធ្លាក់ចុះទៅវិញ។ ត្រង់ចំណុចនេះ លោក ទេព អស្នារិទ្ធ បានចោទជាសំណួរថា តើនេះជារូបភាពគីង្គក់លក់ថ្នាំស្រែងឬ? ដូចគ្នានេះដែរ ចំពោះការលើកឡើងអំពីស្ថានភាពលំបាកដែលប្រព័ន្ធផ្សព្វផ្សាយបានជួបប្រទះ បញ្ហានេះ មិនមែនជារឿងដោយឡែកសម្រាប់កម្ពុជាទេ ពោល គឺជាក្តីបារម្ភរួមទាំងសម្រាប់កម្ពុជា ក៏ដូចជាបណ្តាប្រទេសនានាក្នុងតំបន់ផងដែរ ជាពិសេសពាក់ព័ន្ធនឹងការបិទទ្វារ ឬ ការផ្អាកដំណើរការរបស់សារព័ត៌មានមួយចំនួន ដែលជាផលវិបាកកើតចេញពីរបត់នៃការវិវត្តក្នុងវិស័យបច្ចេកវិទ្យា និងឥទ្ធិពលនៃបរិវត្តកម្មឌីជីថល។ និន្នាការបែបនេះ មិនមែនកើតឡើងតែនៅកម្ពុជាទេ ពោល គឺវាក៏បានកើតឡើងតាមបណ្តាប្រទេសក្នុងតំបន់ និងលើពិភពលោកផងដែរ។
ក្នុងនាមក្រសួងព័ត៌មាន លោក ទេព អស្នារិទ្ធ បានអំពាវនាវដល់អង្គភាពសារព័ត៌មាន និងអ្នកសារព័ត៌មានទាំងអស់ឱ្យបន្តលើកកម្ពស់ការគោរពក្រមសីលធម៌វិជ្ជាជីវៈ ពង្រឹងការអនុវត្តតួនាទី និងភារកិច្ចដោយគោរពច្បាប់ស្តីពីរបបសារព័ត៌មាន ក៏ដូចជាកសាង និងរក្សាទំនាក់ទំនងល្អជាមួយប្រភពព័ត៌មាន ក្នុងនោះ មានអ្នកនាំពាក្យតាមក្រសួង-ស្ថាប័ន អាជ្ញាធរមានសមត្ថកិច្ច និងភាគីផ្សេងៗទៀត ដោយត្រូវបំពេញភារកិច្ចខ្លួនក្នុងក្របខណ្ឌដែលច្បាប់កំណត់ ហើយមិនត្រូវអនុវត្តលើសពីតួនាទីខ្លួនជាអ្នកសារព័ត៌មានឡើយ។ ជាងនេះទៀត អ្នកសារព័ត៌មាន និងអង្គភាពសារព័ត៌មាន ត្រូវបង្កើនភាពធន់នឹងការវិវត្តផ្នែកឌីជីថល បន្តដុសខាត់បន្ថែមទៀតនូវសមត្ថភាពជំនាញ ដើម្បីបន្តចូលរួមយ៉ាងសកម្មក្នុងការផ្សព្វផ្សាយព័ត៌មានពិត ជាមួយខ្លឹមសារប្រកបដោយគុណភាព គ្រប់ជ្រុងជ្រោយ មានប្រភពច្បាស់លាស់ និងមានតុល្យភាពព័ត៌មាន ដើម្បីធានាភាពជឿជាក់ និងទុកចិត្តបានពីសំណាក់ប្រជាជន សង្គមជាតិទាំងមូល សម្រាប់រួមចំណែកលើកកម្ពស់វិស័យព័ត៌មានជាអំណាចទី៤ក្នុងសង្គម និងគាំទ្រដល់ការការពារថែរក្សាសុខសន្តិភាព និងការអភិវឌ្ឍប្រកបដោយចីរភាពនៅកម្ពុជា៕
-
ព័ត៌មានជាតិ២ ថ្ងៃ ago
រថយន្តដឹកទំនិញ រត់សាកល្បងជោគជ័យពីទីក្រុងគុនមីនប្រទេសចិន មកដល់រាជធានីភ្នំពេញ
-
ព័ត៌មានជាតិ១ សប្តាហ៍ ago
អភិបាលខេត្តជើងខ្លាំង៤រូប នៅរក្សាតំណែង ខណៈអភិបាល៤រូបទៀត របូតតំណែងនេះ
-
ព័ត៌មានអន្ដរជាតិ១ សប្តាហ៍ ago
ព្យុះខ្សាច់សាហារ៉ាដ៏ធំ ហោះឆ្លងមហាសមុទ្រអាត្លង់ទិក ទៅវាយប្រហារអាមេរិក ចុងសប្តាហ៍នេះ
-
ព័ត៌មានជាតិ៥ ថ្ងៃ ago
ចោទកម្ពុជាបង្កើត CoolApp ដើម្បីយកការណ៍ ឯកឧត្ដម ឌី វិជ្ជា ចោទសួរទៅវិញថាតើ Appរបស់ប្រទេសមហាអំណាចបង្កើតដើម្បីអ្វី?
-
សន្តិសុខសង្គម៧ ថ្ងៃ ago
នគរបាលខណ្ឌព្រែកព្នៅ បញ្ជូនខ្លួនលោក ណុប សក្កដា ហៅគ្រូផេះគ្រូអង្កាមទៅតុលាការ
-
ព័ត៌មានជាតិ១ សប្តាហ៍ ago
ស្រុក២ នៃខេត្តកំពង់ចាម ផ្ទុះករណីហ្វូងសត្វដង្កូវបំផ្លាញដំណាំស្រូវ និងដំឡូងមី សរុបជិត២រយហិកតា
-
សន្តិសុខសង្គម១ សប្តាហ៍ ago
ព័ត៌មានបឋម៖ អគ្គិភ័យកំពុងឆេះផ្ទះពលរដ្ឋនៅខណ្ឌទួលគោក
-
ព័ត៌មានជាតិ៧ ថ្ងៃ ago
បញ្ចេញបញ្ជីឈ្មោះគ្រឹះស្ថានធនាគារ និងហិរញ្ញវត្ថុស្របច្បាប់នៅកម្ពុជា បញ្ចៀសពលរដ្ឋកុំប្រើសេវាក្រៅផ្លូវការនាំហានិភ័យខ្ពស់