ព័ត៌មានជាតិ

អភិបាលខណ្ឌឫស្សីកែវ ស្នើឱ្យម្ចាស់ក្បាលដីនៅសងខាងព្រែកអូវែងទាំងអស់ បញ្ឈប់ជាបន្ទាន់ រាល់សកម្មភាពចាក់ដីរំលោភយកចំណីព្រែក

បានផុស

៧ ខែ មុន

នៅ

ថ្ងៃអង្គារ ២ កក្កដា ២០២៤

ដោយ

ភ្នំពេញ ៖ លោក ជិន ប៊ុនធឿន អភិបាលនៃគណៈអភិបាលខណ្ឌឫស្សីកែវ បានដឹកនាំមន្ត្រី ជំនាញពាក់ព័ន្ធ ចុះពិនិត្យទីតាំងដាក់គ្រឿងចក្រស្តាព្រែកអូវែង ត្រង់ចំណុចខាងមុខបូរីសម្បត្តិមាស ស្ថិតក្នុងភូមិបឹងសាឡាង សង្កាត់ឫស្សីកែវ បន្ទាប់ពីបញ្ចប់គម្រោងស្តាព្រែកបាក់ទូកដែលជាប្រព័ន្ធរំដោះជំនន់ទឹកភ្លៀងយ៉ាងសំខាន់ក្នុងភូមិសាស្ត្ររាជធានីភ្នំពេញ នារសៀលថ្ងៃ ទី២ ខែកក្កដា ឆ្នាំ២០២៤នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានេះដែរ លោកអភិបាលខណ្ឌ បានបញ្ជាក់ថា ព្រែកអូវែងត្រូវបានម្ចាស់ក្បាលនៅសងខាងព្រែកនេះ បានចាក់ដីរំលោភយក និងសាងសង់សំណង់រឹងលើចំណីព្រែក។ ព្រែកអូវែងមានទំហំ ៨០ម៉ែត្រ ដែលក្នុងនោះព្រែកមានទំហំ៣០ម៉ែត្រ និងចំណីព្រែកសងខាងមានទំហំ ២៥ម៉ែត្រ ដោយមានផ្លូវជាប់មាត់ព្រែកសងខាងមានទំហំទទឹង ១០ម៉ែត្រ សម្រាប់សម្រួលចរាចរណ៍ និងងាយស្រួលចល័តគ្រឿងគ្រឿងសំអាតស្តាព្រែកសម្រួលចរន្ត៍ទឹកហូរលឿនបញ្ចៀសការលិចលង់ដោយជំនន់ទឹកភ្លៀងក្នុងមូលដ្ឋានខណ្ឌចំនួន ៥របស់រាជធានីភ្នំពេញ។

លោកអភិបាលខណ្ឌឫស្សីកែវ បានស្នើយ៉ាងទទូចឱ្យម្ចាស់ក្បាលដីនៅសងខាងព្រែកអូវែងទាំងអស់បញ្ឈប់ជាបន្ទាន់នូវរាល់សកម្មភាពចាក់ដីរំលោភយកចំណីព្រែកប្រើប្រាស់ជាប្រយោជន៍ឯកជន នឹងត្រូវសហការជាមួយអាជ្ញាធរដែនដី មន្ត្រីមានសមត្ថកិច្ចកំណត់ព្រំដីរបស់ខ្លួនជាប់ដីចំណីព្រែក និង ត្រូវរុះរើចេញជាបន្ទាន់បណ្តាសំណង់ដែលបានសង់លើដីចំណីព្រែកអូវែង បើមិនដូច្នោះនឹងត្រូវប្រឈមមុខជាមួយផ្លូវច្បាប់ជាធរមាន៕

អត្ថបទ ៖ សុភា