លោក នេត្រ ភក្ត្រា៖ ស្ថាប័នព័ត៌មាន មិនត្រឹមតែមានតួនាទីផ្សព្វផ្សាយនោះទេ គឺត្រូវចេះប្រើយុទ្ធសាស្ត្របន្ថែមទៀត

អ្នកសារព័ត៌មានមិនមែនមានតួនាទីត្រឹមតែទៅយកព័ត៌មាន ហើយផ្សព្វផ្សាយព័ត៌មានឲ្យត្រឹមត្រូវតាមវិជ្ជាជីវៈនោះទេ គឺត្រូវចេះគិតអំពីយុទ្ធសាស្ត្រ និងគោលនយោបាយព័ត៌មានសម្រាប់ប្រទេសផងដែរ។ នេះជាការលើកឡើងរបស់លោក នេត្រ ភក្ត្រា រដ្ឋមន្ត្រីក្រសួងព័ត៌មាន ក្នុងឱកាលអញ្ជើញជួបសំណេះសំណាលជាមួយថ្នាក់ដឹកនាំ មន្ត្រីរាជការនៃមន្ទីរព័ត៌មាន និងអ្នកសារព័ត៌មានខេត្តកែប នៅសាលប្រជុំនៃមន្ទីរព័ត៌មានខេត្ត នារសៀលថ្ងៃទី២ ខែកក្កដា ឆ្នាំ២០២៤នេះ។

លោកបានបញ្ជាក់ថា​ សម្រាប់អាណត្តិទី៧នេះ ក្រសួងព័ត៌មានបានកំណត់នូវចក្ខុវិស័យថា ក្រសួងនឹងដើរតួនាទីជាសំឡេង​របស់រដ្ឋាភិបាល និងជាស្ថា​ប័នទំនាក់ទំនងសាធារណៈរបស់រាជរដ្ឋាភិបាល ប្រកបដោយបុរេសកម្ម អន្តរសកម្ម ប្រសិទ្ធភាព និងគុណភាព លើការគ្រប់គ្រងព័ត៌មាន និងសាធារណមតិ។

លោកបន្ថែមថា​ បច្ចុប្បន្ន បដិវត្តន៍​នៃការផ្សព្វផ្សាយនៅប្រទេសកម្ពុជា គឺប្រជាពលរដ្ឋបានប្រើប្រាស់ Facebook,​ TikTok និងប្រព័ន្ធ​សង្គមផ្សេងៗ​ ជានិន្នាការនៃមធ្យោបាយក្នុងការទទួលព័ត៌មាន ដែលជះឥទ្ធិពលដល់ប្រព័ន្ធផ្សព្វផ្សព្វបែបបុរាណ ជាក់ស្តែងស្ថាប័នការសែតធំៗមួយចំនួនត្រូវបានបិទទ្វារជាបន្តបន្ទាប់។

លោករដ្ឋមន្ត្រីសង្កត់ធ្ងន់ដល់អង្គភាព-ស្ថាប័នដែលធ្វើការក្នុងវិស័យផ្សព្វផ្សាយព័ត៌មាន ត្រូវតែអភិវឌ្ឍខ្លួនយ៉ាងណាឲ្យស្របទៅនឹងការវិត្តន៍នៃបច្ចេកវិទ្យាព័ត៌មាន ក៏ដូចជាគោលនយោបាយបញ្ចកោណដំណាក់កាលទី១​ របស់រាជរដ្ឋាភិបាល នីតិកាលទី៧ ដែលបានបន្ថែមអាទិភាពថ្មីមួយទៀត គឺបច្ចេកវិទ្យាឌីជីថល ដែលនេះគឺជាការបន្ស៉ាំទៅនឹងការវិវត្តន៍នៃគោលនយោបាយ ការវិវត្តន៍នៃបច្ចេកវិទ្យា និងការវិវត្តនៃសង្គម។

លោក នេត្រ ភក្ត្រា ក៏បានលើកឡើងថា នៅក្នុងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា បាននិងកំពុងជំរុញការអនុវត្តកម្មវិធីគោលនយោបាយអាទិភាពទាំង៦ចំណុច និងបានដាក់ចេញនូវវិធានការគន្លឹះចំនួន ៥ចំណុចបន្ថែមទៀត ដើម្បីធ្វើយ៉ាងណាសម្រេចចក្ខុវិស័យប្រែក្លាយកម្ពុជា នៅឆ្នាំ២០៣០ ជាប្រទេសមានប្រាក់ចំណូលមធ្យមកម្រិតខ្ពស់ និងនៅឆ្នាំ២០៥០​ ជាប្រទេសមានចំណូលខ្ពស់។ ហើយក្រសួងនីមួយៗត្រូវដឹងអំពីតួនាទី និងកិច្ចការងាររបស់ខ្លួនថាតើត្រូវធ្វើអ្វីខ្លះ ដើម្បីឆ្លើយតបការងារទាំងនេះ៕

អត្ថបទ៖ សឹង រ៉ាត់