ឯកឧត្តម ឌី វិជ្ជា៖ ១៤ឆ្នាំ ស.ស.យ.ក ខេត្តស្វាយរៀង ក្លាយជាកម្លាំងមូលធនមនុស្សដ៏សំខាន់ក្នុងសកម្មភាពសង្គម និងមនុស្សធម៌

ប្រមាណ១៤ឆ្នាំ សហភាពសហព័ន្ធកម្ពុជាខេត្តស្វាយរៀង បានក្លាយជាកម្លាំងមូលធនមនុស្សដ៏សំខាន់ក្នុងការចូលរួមរាល់សកម្មភាពសង្គម និងមនុស្សធម៌។ នេះជាការថ្លែងរបស់ឯកឧត្តម ឌី វិជ្ជា ប្រធានសហភាពសហព័ន្ធកម្ពុជាខេត្តស្វាយរៀង នៅក្នុងពិធីប្រកាសទទួលស្គាល់សមាសភាពអនុប្រធាន សមាជិក-សមាជិកាគណៈកម្មាធិការសហភាពសហព័ន្ធយុវជនកម្ពុជាខេត្តស្វាយរៀង នាព្រឹកថ្ងៃទី០៣ ខែកក្កដា ឆ្នាំ ២០២៤។

តាមរបាយការណ៍ស្វាគមន៍របស់ឯកឧត្តម ឌី វិជ្ជា សហភាពសហព័ន្ធកម្ពុជាខេត្តស្វាយរៀង បានចាប់ដំណើរការឡើងវិញនៅថ្ងៃទី០៥ ខែកុម្ភៈ ឆ្នាំ២០១០ មានឈ្មោះថា សមាគមយុវជនកម្ពុជាខេត្តស្វាយរៀង ជាសាខាខេត្តមួយរបស់សមាគមយុវជនកម្ពុជា ដែលបានបន្តសកម្មភាពពីសមាគមយុវជនសង្គ្រោះជាតិកម្ពុជា ដែលបានបង្កើតឡើងនៅថ្ងៃទី០២ ខែធ្នូ ឆ្នាំ១៩៧៨។ ឯកឧត្តម ឌី វិជ្ជា បានថ្លែងបន្តថា នៅក្នុងមហាសន្និបាត នាថ្ងៃទី២-៣ ខែវិច្ឆិកា ឆ្នាំ២០១២ សមាគមយុវជនកម្ពុជា បានប្រែក្លាយជា សហភាពសហព័ន្ធយុវជនកម្ពុជាវិញ ដោយនៅតែបន្តសកម្មភាពដដែល និងបានពង្រីកវិសាលភាពឲ្យកាន់តែទូលំទូលាយបន្ថែមទៀត។ ចំណែកឯ សមាគមយុវជនកម្ពុជាខេត្តស្វាយរៀង ក៏បានផ្លាស់ប្តូរឈ្មោះមកជា សហភាពសហព័ន្ធយុវជនកម្ពុជាខេត្តស្វាយរៀង វិញដែរ ដោយបានទទួលស្គាល់នៅថ្ងៃទី២០ ខែមិថុនា ឆ្នាំ២០១៣។

ឯកឧត្តម ឌី វិជ្ជា បានថ្លែងបញ្ជាក់ថា «រយៈពេលជាង១៤ឆ្នាំ កន្លងទៅនេះ សហភាពសហព័ន្ធកម្ពុជាខេត្តស្វាយរៀង បានខិតខំរៀបចំរចនាសម្ព័ន្ធ កសាងយុវជនបន្តវេន និងកម្លាំងស្នូលដ៏សំខាន់ៗប្រកបដោយមនសិកាក្នុងការតភ្ជាប់ចលនាមហាជន យុវជន សំដៅឱ្យបាននូវកម្លាំងមូលធនមនុស្សដ៏ទូលំទូលាយ ដើម្បីចូលរួមរាល់សកម្មភាពសង្គម និងមនុស្សធម៌ ដែលសម្រេចបាននូវសមិទ្ធផលជាច្រើន»។

ឯកឧត្តមប្រធាន ស.ស.យ.ក ខេត្តស្វាយរៀង បានរាយការណ៍ដោយសង្ខេបជូនគណៈអធិបតី ដែលមានវត្តមានរបស់ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា នូវសកម្មភាពសំខាន់ៗមួយចំនួនរបស់ ស.ស.យ.ក ខេត្តស្វាយរៀង ក្នុងនោះ ការកសាងរចនាសម្ព័ន្ធពីថ្នាក់ខេត្ត វិស័យមន្ទីរ-អង្គភាពជុំវិញខេត្ត ថ្នាក់ក្រុង ស្រុក ឃុំ សង្កាត់ វិទ្យាល័យ និងថ្នាក់ភូមិ ដែលមានចំនួនសកម្មជនសរុប១១ ៧៧០នាក់ និងបានបង្កើតឱកាសនៃការអប់រំ និងបណ្តុះបណ្តាល រួមមានគម្រោងឱកាសការងារ និងអប់រំបណ្តុះបណ្តាលសម្រាប់យុវជន និងប្រជាពលរដ្ឋ វគ្គបណ្តុះបណ្តាលខ្លីៗលើមុខជំនាញ សុវត្ថិភាពចរាចរណ៍ និងការសរសេរគម្រោងផែនការសកម្មភាព សិក្ខាសាលាស្តីពីការជំរុញសហគ្រិនភាពយុវជនក្រោមប្រធានបទ «ឱកាសការងារយុវជន» យុវជនអាស៊ាន វគ្គបណ្តុះបណ្តាលតម្រង់ទិសជូនដល់ក្រុមប្រកួត រ៉ូបូតមនុស្សយន្ត និងកម្មវិធីពិព័រណ៍យន្តហោះ និងបច្ចេកវិទ្យាចំនួន០៣លើក ដើម្បីឆ្លើយតបទៅនឹងបច្ចេកវិទ្យាបដិវត្តន៍ឧស្សាហកម្ម ៤.០ រួមទាំងវគ្គបណ្តុះបណ្តាលអ្នកសង្កេតការណ៍ជាតិ ជាដើម។

ចំពោះសកម្មភាពការងារសង្គម និងមនុស្សធម៌ ត្រូវបានឯកឧត្តម ឌី វិជ្ជា បញ្ជាក់ថា ស.ស.យ.ក ខេត្តស្វាយរៀង បានចូលរួមដាំកូនឈើ ចុះផ្សព្វផ្សាយតាមមូលដ្ឋានពីសុខភាពអនាម័យ បំបាត់អំពើហឹង្សាក្នុងគ្រួសារ និងផ្សព្វផ្សាយពីផលប៉ះពាល់នៃការប្រើប្រាស់គ្រឿងញៀន​ ការនាំយកអំណោយ និងសម្ភារៈចែកជូនគ្រួសារក្រីក្រ ការចូលរួមបុណ្យសពគ្រួសារក្រីក្រ​ ជួយសាងសង់ផ្ទះជូនគ្រួសារចាស់ជរាគ្មានទីពឹង ចូលរួមជួយសម្របសម្រួលធ្វើម្ហូបអាហារសម្រាប់សិស្សានុសិស្សដែលមកប្រឡងបាក់ឌុប និងរៀបចំកន្លែងសម្រាប់សិស្សស្នាក់នៅ។

បន្ថែមពីនេះ បានរៀបចំយុវជនចូលរួមសង្កេតការណ៍ក្នុងដំណើរការចុះឈ្មោះបោះឆ្នោត និងការពិនិត្យបញ្ជីឈ្មោះបោះ ឆ្នោតប្រចាំឆ្នាំ រៀបចំយុវជនប្រឡងចូលជាមន្ត្រីកិច្ចសន្យា គ.ជ.ប នៅថ្នាក់ខេត្ត ឃុំ សង្កាត់ ទាំងដំណើរការចុះឈ្មោះបោះឆ្នោត និងថ្មីៗនេះចូលរួមសង្កេតការណ៍ ការបោះឆ្នោតជ្រើសរើសសមាជិកព្រឹទ្ធសភា និងការបោះឆ្នោតជ្រើសរើសក្រុម ប្រឹក្សាខេត្ត ក្រុង ស្រុក។

ស.ស.យ.ក ខេត្តស្វាយរៀង ក៏បានបង្កើតជាកម្មវិធីមួយ រួមសហការពីក្រសួងអប់រំ យុវជន និងកីឡា ក្នុងគោលបំណងកសាងបណ្តុះបណ្តាលស្មារតី ផ្តល់ឱកាសឱ្យយុវជន និងអភិវឌ្ឍធនធានមនុស្ស ប្រកបដោយសមត្ថភាព ភាពជាពលរដ្ឋល្អ ដើម្បីចូលរួមអភិវឌ្ឍប្រទេសជាតិ និងការលើកស្ទួយវិស័យវប្បធម៌ តាមរយៈការរៀបចំកម្មវិធីប្រគួតល្ខោនខ្មែរ វង់ភ្លេងតន្ត្រីខ្មែរ និងកម្មវិធីសង្ក្រាន្តតាមបណ្តាក្រុង ស្រុក ទាំង៨ ក្នុងឱកាសបុណ្យចូលឆ្នាំប្រពៃណីខ្មែរ។

ដោយឡែក សកម្មភាពកីឡា គឺ ស.ស.យ.ក ខេត្តស្វាយរៀង បានរៀបចំពានរង្វាន់បាល់ទាត់ស្វាយរៀងខាប់ U15 និង U18 ពានរង្វាន់បាល់ទាត់ស្វាយរៀងខាប់ផ្នែកនារី ពានរង្វាន់បាល់ទាត់ស្វាយរៀងខាប់ ពានរង្វាន់បាល់ទាត់ស្វាយរៀងស៊ុបភ័រខាប់ ដែលមានការចូលរួមពីគ្រប់ក្លឹបមកពីស្ថាប័នរដ្ឋ ឯកជន និងមីក្រូហិញ្ញវត្ថុសរុបចំនួន១០៨ក្រុម។ នេះជាការរៀបរាប់បន្ថែមរបស់ឯកឧត្តម ប្រធាន ស.ស.យ.ក ខេត្តស្វាយរៀង៕