រដ្ឋមន្ត្រីក្រសួងព័ត៌មាន រំលឹកពីការងារអាទិភាព ក្នុងឱកាស​ចុះ​ជួបមន្រ្តីមន្ទីរព័ត៌មាន​ខេត្ត​កំពត

ក្នុងឱកាស​ចុះ​ពិនិត្យវឌ្ឍនភាពការងារសាងសង់អគារស្ថានីយវិទ្យុ និងទូរទស្សន៍ និង​ជួបសំណេះសំណាលជាមួយមន្ត្រីរាជការនៃមន្ទីរព័ត៌មានខេត្តកំពតនាថ្ងៃទី ២ ខែកក្កដាឆ្នាំ​២០២៤ លោក នេត្រ ភក្រ្តា រដ្ឋមន្ត្រីក្រសួងព័ត៌មានបានលើកឡើង បានលើកឡើង​ពី​យុទ្ធសាស្ត្របញ្ចកោណដំណាក់កាលទី ១ របស់រាជរដ្ឋាភិបាលនីតិកាលពី ៧ នៃរដ្ឋសភា ដែល​បាន​ដាក់ចេញ​ចក្ខុលើវិស័យ ក្នុងប្រែក្លាយកម្ពុជាជាប្រទេសមានប្រាក់ចំណូលមធ្យមកម្រិកខ្ពស់នៅឆ្នាំ២០៣០ និង​នៅ​ឆ្នាំ២០៥០ ជាប្រទេសដែលមានចំណូលខ្ពស់។

រដ្ឋមន្ត្រីក្រសួងព័ត៍មានបានបញ្ជាក់ថា សម្រាប់អាណត្តិទី ៧ ក្រសួងនិងមន្ទីរព័ត៌មានជាសេនាធិការរបស់រាជរដ្ឋាភិបាល ហើយ​ត្រូវបានកំណត់ចក្ខុវិស័យជាស្ថាប័នទំនាក់ទំនងសាធារណៈរបស់រាជរដ្ឋាភិបាល មានន័យថាជាសំឡេងរបស់រាជរដ្ឋាភិបាល។

ក្រសួងព័ត៍មាននិងមន្ទីរព័ត៌មាន មិនមែនមានតួនាទីត្រឹមតែទៅយកព័ត៍មាននោះទេ ហើយផ្សាយព័ត៌មានឲ្យបានត្រឹមត្រូវទៅតាមវិជ្ជាជីវៈនោះទេ គឺត្រូវចេះគិតអំពីយុទ្ធសាស្ត្រ និង​គោល​នយោបាយព័ត៌មានសម្រាប់ប្រទេស ហើយ​ការងារសំខាន់ថែមទៀតនោះ គឺធ្វើការងារគ្រប់គ្រងសតិអារម្មណ៍របស់មនុស្ស។ លោក​រដ្ឋមន្រ្តី​បានបន្ថែម។

តាមរបាយការណ៍របស់លោកស្រី ប៉ូ ចាន់រស្មី ប្រធានមន្ទីរព័ត៌មានខេត្តកំពត ខេត្តកំពតមានវិទ្យុផ្សាយផ្ទាល់ចំនួន ០២ វិទ្យុផ្សាយបន្តចំនួន ០៦ ទូរទស្សន៍ផ្សាយបន្តចំនួន ០៤ និងទូរទស្សន៍ខ្សែកាបចំនួន​ ០៤ស្ថានីយ។ មានទីស្នាក់ការគេហទំព័រចំនួន ១១ កន្លែង (ក្រុង-ស្រុក) ក្រុងកំពតមានចំនួន ០៥កន្លែង ស្រុកទឹកឈូមានចំនួន ០១កន្លែង ស្រុកបន្ទាយមាសមានចំនួន ០២ កន្លែង ស្រុកកំពង់ត្រាចមានចំនួន ០២កន្លែង ស្រុកដងទង់មានចំនួន ០១កន្លែង ។

ចំពោះអង្គភាពសារព័ត៌មាន ដែលកំពុងធ្វើប្រតិបត្តិការណ៍ក្នុងភូមិសាស្រ្តខេត្តកំពតមានចំនួន ៣០អង្គភាព អ្នកសារព័ត៌មានក្នុងខេត្តមានចំនួន ២០ អង្គភាព ភ្នាក់ងារទូរទស្សន៍ក្នុងខេត្តមានចំនួន ១១ អង្គភាព៕

អត្ថបទ៖ សឹង រ៉ាត់