កម្ពុជាធ្វើតេស្តសាកល្បងនាំផ្លែដូងស្រស់ ទៅទីផ្សារចិន និងត្រៀមនាំចេញទ្រង់ទ្រាយធំ

មន្ត្រីអ្នកនាំពាក្យក្រសួងកសិកម្ម លោក ឃឹម ហ្វីណង់ មានប្រសាសន៍ថា ការធ្វើតេស្ដ​សាកល្បង​នាំ​ផ្លែដូងស្រស់កម្ពុជាទៅកាន់ទីផ្សារប្រទេសចិនបានធ្វើរួចហើយ នៅតែរង់ចាំការនាំចេញ​ជាទ្រង់​ទ្រាយ​ធំ បន្ទាប់ពីរដ្ឋាភិបាលចិនអនុញ្ញាតឱ្យនាំដូង កម្ពុជាទៅ​ទីផ្សារ​​​​​​របស់ខ្លួន​កាលពីដើមឆ្នាំ ២០២៤។

លោក ឃឹម ហ្វីណង់ បានឱ្យដឹងថា ការនាំចេញផ្លែដូងស្រស់ទៅចិន គឺជាផលិតផលកសិផល​ដែលថ្មី ខណៈកម្ពុជា​មាន​ចម្ការដែលបានចុះបញ្ជីរួចហើយ និងមានចម្ការដែលបានជាប់លក្ខខណ្ឌ នៃការវេចខ្ចប់ ហើយ​បាន​ធ្វើតេស្ដសាកល្បងនាំចេញរួចហើយដែរ នៅចាំតែថ្ងៃនាំចេញ​ជាទ្រង់​ទ្រាយ​ធំ។

អគ្គរដ្ឋបាលគយយចិនបានអនុម័តទទួលស្គាល់ ចម្ការដូងចំនួន១៣ និងទីតាំង​វេចខ្ចប់​ចំនួន​៥ ដែលបានចុះបញ្ជីសម្រាប់នាំចេញផ្លែដូងស្រស់ពីកម្ពុជាទៅចិន។

លោក សួង ណយ ប្រធានសហគមន៍កសិកម្មដូងក្រអូបកម្ពុជា និងជាអគ្គលេខាធិការរង​គណៈ​កម្ម​ការជាតិ ជំរុញចលនាភូមិមួយផលិតផលមួយប្រាប់កម្ពុជាថ្មីនៅថ្ងៃទី ០៣ ខែ​កក្កដា ឆ្នាំ ២០២៤​នេះថា បច្ចុប្បន្នកម្ពុជាមិនទាន់មានលទ្ធភាពគ្រប់គ្រាន់​ក្នុងការ​នាំផ្លែដូង​ចេញនោះទេ ខណៈ​​សហគមន៍ដាំដុះក្នុងស្រុកដាំដើម្បីតែបំពេញតម្រូវការក្នុងស្រុកមិនទាន់គ្រប់ផង គ្រាដែលមានការ​នាំចូល​ពីប្រទេស​វៀតណាម និងថៃរាល់ថ្ងៃ។

ដំណាំដូងត្រូវបានដាំដុះច្រើនជាងគេ នៅខេត្តកំពង់ស្ពឺ កំពត ព្រះសីហនុ ហើយបានពង្រីកការដាំដុះ​នៅតាមបណ្តាខេត្តជាច្រើនទៀតដូចជាកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ កំពង់ធំ ស្វាយរៀង និងខេត្តសៀមរាបជាដើម។

នៅប្រទេសកម្ពុជាសព្វថ្ងៃ មានផ្ទៃដីដាំដុះដំណាំដូងចំនួន ១ម៉ឺន៧ពាន់ហិកតា ក្នុងនោះ ផ្ទៃដីប្រមូល​ផលមានចំនួន ១ម៉ឺន ៤ពាន់ហិកតា៕

អត្ថបទ៖ ឡេង ដេត