ជើងទី១ Air Asia Malaysia ដឹកភ្ញៀវ១៤០នាក់ ពីកូឡាឡាំពួរ មកចុះចតនៅព្រលានយន្តហោះអន្តរជាតិព្រះសីហនុ

បន្ទាប់ពីភ្ជាប់ជើងហោះហើរឡើងវិញ នៅថ្ងៃទី០៣ ខែកក្កដា ឆ្នាំ២០២៤ ក្រុមហ៊ុនអាកាសចរណ៍ AirAsia Malaysia បានចុះចតជាផ្លូវការតាមការគ្រោងទុក ​ដោយបានហោះហើរត្រង់ពី ទីក្រុងកូឡាឡាំពួរនៃប្រទេសម៉ាឡេស៊ីមកកាន់ខេត្តព្រះសីហនុ ជាខេត្តតំបន់ឆ្នេរ​នៃប្រទេសកម្ពុជា ដោយដឹកអ្នកដំណើរជាង១រយនាក់។

បើតាមរបាយការណ៍របស់កងរាជវុធហត្ថខេត្តព្រះសីហនុ បានឱ្យដឹងថា ជើងហោះហើរលេខAK ២៦៤ មកពីកូឡាឡាំពួរ ប្រទេសម៉ាឡេស៊ី បានចុះចតនៅអាកាសយានដ្ឋានអន្តរជាតិខេត្តព្រះសីហនុវេលាម៉ោង១៣:០៨នាទី ដោយដឹកភ្ញៀវសរុបចំនួន ១៤០នាក់ ក្នុងនោះស្រី ៤៣នាក់។

សម្រាប់ជើងហោះហើរពីទីក្រុងកូឡាឡាំពួរ ប្រទេសម៉ាឡេស៊ី មកកាន់អាកាសយានដ្ឋានអន្តរជាតិខេត្តព្រះសីហនុ គឺមានចំនួន៣ជើង ក្នុងមួយសប្ដាហ៍ គឺរៀងរាល់ថ្ងៃពុធ ថ្ងៃសុក្រ និងថ្ងៃអាទិត្យ។

លោក ស៊ិន ចាន់សិរីវត្ថា អ្នកនាំពាក្យរដ្ឋលេខាធិការដ្ឋាន​អាកាសចរណ៍ស៊ីវិល រម្លឹកថា ក្រុមហ៊ុនអាកាសចរណ៍នេះធ្លាប់បានធ្វើការហោះហើរម្តងរួចទៅហើយលើដំណាក់ផ្លូវនេះ ប៉ុន្តែដោយសារតែការរីករាលដាលនៃជំងឺកូវីដ១៩ ទើបក្រុមហ៊ុនសម្រេចផ្អាកជាបណ្តោះអាសន្ន។

លោកបានលើកឡើងថា៖«តាមពិតទៅក្រុមហ៊ុនធ្លាប់បានហោះហើរត្រង់រួចទៅហើយលើកំណាក់ផ្លូវនេះ​កាលមុនកូវីដ ប៉ុន្តែដោយសារកត្តាទីផ្សារទើបក្រុមហ៊ុនផ្អាក។​ ឥឡូវនេះស្ថានភាពនៃសេដ្ឋកិច្ចហាក់មានភាពល្អប្រសើរ ជាហេតុធ្វើអោយក្រុមហ៊ុនសម្រេចចិត្តបើកដំណើការឡើងវិញ»។

កាលពីដើមខែឧសភាថ្មីៗនេះ​​​ក្រុមហ៊ុនអាកាសចរណ៍ Air Asia បានបើកការ​ហោះហើរទៅមករវាងភ្នំពេញ-សៀមរាបចំនួន៤ជើងក្នុងមួយថ្ងៃ និងទិសដៅទៅមករវាងខេត្តព្រះសីហនុ-សៀមរាបចំនួន៤ជើងក្នុងមួយថ្ងៃ។

យោងតាមរដ្ឋលេខាធិការដ្ឋានអាកាសចរណ៍ស៊ីវិល នៅក្នុងរយៈពេល៥ខែ ចាប់ពីខែមករា ដល់ខែឧសភា ឆ្នាំ២០២៤ កម្ពុជាបានទទួលអ្នកដំណើរតាមផ្លូវអាកាសជាង ២,៥ លាននាក់ កើនឡើង ២២% បើធៀបរយៈពេលដូចគ្នាកាលពីឆ្នាំមុន។

គួរជម្រាបជូនបន្តិចថា សម្រាប់ថ្ងៃទី០៣ ខែកក្កដា ឆ្នាំ២០២៤ នៅអាកាសយានដ្ឋានអន្តរជាតិខេត្តព្រះសីហនុ ក្រៅពីការចុះចតរបស់ក្រុមហ៊ុន Air Asia ក៏មាននូវចុះចតរបស់ជើងយន្តហោះលេខ K៦ ៨៣៩ មកពីទីក្រុងហូជីមិញ ប្រទេសវៀតណាម ដោយនាំភ្ញៀវសរុបចំនួន ២៧នាក់ ក្នុងនោះស្រី ១៧នាក់។ បើគេសរុបចំនួនភ្ញៀវអន្តរជាតិ​ដែលចុះចតនៅអាកាសយានដ្ឋានអន្តរជាតិខេត្តព្រះសីហនុ ក្នុងថ្ងៃទី០៣​​ខែកក្កដា គឺមានចំនួនសរុប ១៦៧នាក់៕

ដោយ៖ ង៉ិល ណារ៉ាត់