សម្ដេច ហ៊ុន ម៉ាណែត រំពឹងថា រដ្ឋាភិបាលអាណត្តិទី៧ នឹងបញ្ចប់ឆ្នាំដំបូងរបស់ខ្លួនប្រកបដោយជោគជ័យ

រដ្ឋាភិបាលបន្តវេន ក្នុងអាណត្តិទី៧នេះ នឹងបញ្ចប់ឆ្នាំដំបូងរបស់ខ្លួនប្រកបដោយជោគជ័យក្នុងការកសាងសមិទ្ធផលជូនដល់ជាតិ តាមសេចក្ដីត្រូវការរបស់ប្រជាពលរដ្ឋ។ នេះជាក្ដីរំពឹងរបស់សម្ដេចធិបតី ហ៊ុន ម៉ាណែត ក្នុងនាមជាប្រមុខរាជរដ្ឋាភិបាល។

សម្តេចធិបតី ហ៊ុន ម៉ាណែត បានបង្ហាញក្ដីសង្ឃឹមជឿជាក់ថា «រាជរដ្ឋាភិបាល នីតិកាលទី៧នៃរដ្ឋសភា ពិតជាបញ្ចប់ឆ្នាំដំបូងរបស់ខ្លួនប្រកបដោយភាពជោគជ័យ និងមោទនភាព ដើម្បីគោលនយោបាយរបស់រាជរដ្ឋាភិបាល និងការកសាងសមិទ្ធផលជូនជាតិមាតុភូមិក្នុងការឆ្លើយតបទៅនឹងបំណងប្រាថ្នារបស់ប្រជាពលរដ្ឋ»។ សម្ដេចធិបតី លើកឡើងបែបនេះ ក្នុងកិច្ចប្រជុំពេញអង្គគណៈរដ្ឋមន្ត្រី នាព្រឹកថ្ងៃទី៥ ខែកក្កដា ឆ្នាំ២០២៤ នៅវិមានសន្តិភាព។

ក្ដីជឿជាក់ និងរំពឹងដូច្នេះ ដោយសម្តេចធិបតី បានកត់សម្គាល់ឃើញថា នៅក្នុងរយៈពេលជាង ១០ខែកន្លងទៅនេះ រាជរដ្ឋាភិបាលសម្រេចបានសមិទ្ធផលធំៗ ព្រមទាំងវឌ្ឍនភាពល្អប្រសើរជាច្រើន ទាំងនៅតាមបណ្តាការដ្ឋានកែទម្រង់ និងទិសដៅការងារផ្សេងទៀត។ សម្ដេចធិបតី បន្តថា យុទ្ធសាស្ត្របញ្ចកោណ ដំណាក់កាលទី១ ព្រមទាំងវិធានការគន្លឹះទាំង ៥ ដែលដាក់ចេញដោយរាជរដ្ឋាភិបាល គឺកំពុងត្រូវបានអនុវត្តយ៉ាងសស្រាក់សស្រាំ និងបានផ្តល់ផលប្រយោជន៍យ៉ាងវិជ្ជមានដល់ការអភិវឌ្ឍសង្គម-សេដ្ឋកិច្ចជាតិ។

ជាក់ស្តែង តាមការអះអាងរបស់សម្ដេចធិបតីនាយករដ្ឋមន្ត្រី ក្នុងបរិការណ៍ដែលពិភពលោកកំពុងស្ថិតក្នុងភាពមិនប្រាកដប្រជា កម្ពុជានៅតែរក្សាបានសុខសន្តិភាព និងស្ថិរភាពម៉ាក្រូសេដ្ឋកិច្ច ខណៈដែលស្ថិរភាព សន្តិសុខ និងសណ្តាប់ធ្នាប់សង្គម ក៏ត្រូវបានពង្រឹងតាមរយៈការអនុវត្តយ៉ាងម៉ឺងម៉ាត់នូវគោលនយោបាយភូមិ-ឃុំ-សង្កាត់មានសុវត្ថិភាព។ វឌ្ឍនភាពដ៏ល្អប្រសើរទាំងនេះ មិនអាចសម្រេចបានឡើយ ដោយគ្មានការចូលរួមយ៉ាងសកម្ម និងប្រកបដោយការទទួលខុសត្រូវពីគ្រប់តួរអង្គពាក់ព័ន្ធ។

ក្នុងន័យនេះ សម្ដេចធិបតី បានអរគុណដល់កិច្ចខិតខំប្រឹងប្រែងប្រកបដោយស្មារតី ម្ចាស់ការ និងបុរេសកម្ម របស់ក្រសួង ស្ថាប័ន និងតួអង្គពាក់ព័ន្ធទាំងអស់ដែលបាននិងកំពុងរួមគ្នាអនុវត្តការងារនៅក្នុងអភិក្រម«ជីវភាពនៃប្រព័ន្ធតួអង្គតែមួយ»។