យាយតាយកចៅអាយុ៦ខែ ទៅងូតទឹក ត្រូវខ្សែភ្លើងឆក់ស្លាប់ទាំង៣នាក់ យ៉ាងអាណោចអាធ័ម

ជីដូន និងជីតាបានយកចៅអាយុ៦ខែទៅងូតទឹកក្បែរពាង រួចលូកដៃតោងស័ង្កសី ក៏ត្រូវចរន្តអគ្គីសនី ដែលឆ្លងពីម៉ាស៊ីនបោកខោអាវមកស័ង្កសីឆក់បណ្តាលឲ្យស្លាប់ទាំង៣នាក់ យ៉ាងអាណោចអាធ័ម។

ហេតុការណ៍នេះបានកើតឡើង នៅវេលាម៉ោង ១៣៖១៥នាទីរសៀល ថ្ងៃទី៥ ខែកក្កដា ឆ្នាំ២០២៤ ស្ថិតនៅភូមិចំការដូង សង្កាត់ច្បារមន ក្រុង ច្បារមន ខេត្តកំពង់ស្ពឺ។

បើតាមប្រភពពីសមត្ថកិច្ចក្រុងច្បារមន បានឲ្យដឹងថា ករណីឆក់បណ្តាលឲ្យ ស្លាប់មនុស្សចំនួន០៣នាក់មានឈ្មោះ ឡា ណែន អាយុ៥១ឆ្នាំ ប្តី និងប្រពន្ធឈ្មោះ ណិន សុន អាយុ៤៧ឆ្នាំ ព្រមទាំងចៅស្រី ឈ្មោះ អូន សុវណ្ណខេម៉ា អាយុ៦ខែ។

ជុំវិញករណីនេះសមត្ថកិច្ចបានសន្និដ្ឋានថា មូលហេតុឆ្លងចរន្តអគ្គិសនី នៅក្នុងបន្ទប់ទឹកពីម៉ាស៊ីនបោកខោអាវ មកស័ង្កសីដែល ជនរងគ្រោះបានតោងងូតទឹក៕

អត្ថបទ៖ ម៉េង