កសិករ​ក្នុង​ខេត្តបាត់ដំបង និយាយ​ពី​ការ​ធ្វើ​​កសិកម្ម​ ប្រឈម​ការ​ប្រែប្រួលអាកាសធាតុ

នៅតាមបណ្តាស្រុកជាគោលដៅកសិកម្មមួយចំនួនក្នុង​ខេត្ត​បាត់ដំបង ឆ្លងកាត់ពីភូមិមួយទៅភូមិមួយសម្លេងត្រាក់ទ័រ​ដែលជាគ្រឿងចក្រសម្រាប់បម្រើ​ដល់វិស័យកសិកម្ម បានបញ្ចេញសម្លេងពាសពេញភូមិ ដែលកំពុងមមាញឹកប្រកបរបរកសិកម្ម ដើម្បីទ្រទ្រង់សេដ្ឋកិច្ចគ្រួសាររបស់ប្រជាកសិកររៀងៗខ្លួន ហាក់នៅមិនទាន់បិទបញ្ចប់នៃរដូវកាលដាំដុះ​នោះនៅឡើយ បើទោះបីការដាំដុះ តាមទម្លាប់របស់កសិករ ត្រូវបានកន្លងផុត ក៏សម្លេងត្រាក់ទរមិនទាន់ស្ងប់ស្ងាត់នៅឡើយដែរ។

ជាក់ស្តែងស្រុកចំនួន ២ ជាប់ព្រំប្រទល់គ្នាគឺ ស្រុកបាណន់ និងស្រុកសំឡូត នៃខេត្តបាត់ដំបង ប្រជាកសិករកំពុងមមា ញឹក ក្នុងនោះមានខ្លះកំពុងភ្ជួរដី និងខ្លះទៀតកំពុងដាំបន្តលើដំណាំពេញនិយម​ចំនួន ២ ប្រភេទ គឺ ដំឡូងមី និងពោតក្រហម ក្រៅពីដំណាំស្រូវ ដែលប្រជាកសិករបានពឹងផ្អែកលើជីវភាពគ្រួសារ ពីមួយឆ្នាំទៅមួយឆ្នាំ ហើយកសិករខ្លះក៏សេសសល់ថវិកា សាងសង់ផ្ទះបានយ៉ាងសមរម្យផងដែរនៅតាមទីជនបទអ្នកចម្ការ។

អ្នកស្រី សួន សាឃឿន រស់នៅភូមិទួល ឃុំចែងមាជ័យ ស្រុកបាណន់ បានលើកឡើងថា ដំឡូងមីអ្នកស្រីបាន​លូតលាស់​​​​បានកម្ពស់ប្រហែល ៥ តិក ដែលនេះ​ជា​ការ​ដាំលើកទី ២ បន្ទាប់ពីលើកទីមួយបានងាប់ខូចទាំងស្រុងដែលអ្នកស្រីបានដាំពីពាក់កណ្តាលខែមីនា​។

អ្នកស្រីក៏បានខ្ចីលុយគេខ្លះ រួមថវិកាខ្លួនឯង​សេសសល់តិចតូច ទើបបានភ្ជួរនិងដាំបានលូតលាស់បានប៉ុណ្ណេះ។ អ្នកស្រីសង្ឃឹមថា លើកនេះអាចនឹងបានទទួលផលឡើងវិញ។ តែ​យ៉ាងណា​​អ្នកស្រី​ក៏​នៅតែ​បារម្ភ ព្រោះប៉ុន្មានថ្ងៃនេះដាច់ទឹកភ្លៀង ហើយមានកម្តៅខ្លាំង បើមានភ្លៀងធ្លាក់ក៏ធ្លាក់តាម​កន្លែង​ដែរ។

មិនខុសគ្នាប៉ុន្មាន កសិករម្នាក់ទៀត ដែលរស់នៅក្នុងភូមិជាមួយគ្នា គឺអ្នកស្រី វ៉ាន់ថា ដែល​កំពុងដាំពោតនិងសណ្តែក​ក៏លើកឡើងពី​បញ្ហា​ប្រឈមដែរ បើមិនមានភ្លៀងធ្លាក់ ហើយកម្តៅបានអូសបន្លាយយូរថ្ងៃបន្តទៀត។

អ្នកស្រីបន្តថា “ការដាំលើកទី២នេះ ដោយសារមានភ្លៀងធ្លាក់បានខ្លះៗទើបធ្វើឲ្យពោតបានដុះលូតលាស់ស្រុះគ្នា តែក្រោយពីពោតនិងសណ្តែកដាំបានបន្តិច ក៏ស្រាប់តែមេឃរាំង​ស្ងួតវិញ ដែលធ្វើឲ្យអ្នកស្រី​ព្រួយបារម្ភ បើ ២-៣ ថ្ងៃទៀត មានធ្លាក់ភ្លៀងត្រឹមតិចតួចក៏អាចសង្ឃឹមខ្លះដែរ។

យ៉ាងណាមិញ មន្ត្រីកសិកម្មខេត្តបាត់ដំបង លោក ហេង សិទ្ទ បានពន្យល់ថា ការ​ខូចខាតផលដំណាំ​​​របស់​កសិករកន្លងមក​​ ដោយសារ​ការ​អនុវត្ត​មិន​ស្របតាមបទដ្ឋានបច្ចេកទេស មាន​ន័យ​ថាកសិករ​ដាំដុះដោយផ្សងព្រេង ដោយសារខ្វះព័ត៌មានគ្រប់ជ្រុងជ្រោយពីអាកាសធាតុ​ដែលត្រូវ​បានផ្សព្វផ្សាយណែនាំដោយក្រសួង ឬមន្ទីរជំនាញយ៉ាងទូលំទូលាយ ទើបបង្កឲ្យខូចខាតផ្ទួនៗបែបនេះ។

លោកថា ដំឡូងមី ចាប់ប្រមូលផលចាប់ពី ១០ ខែឡើង ហើយសម្រាប់ដំណាំពោត ការប្រមូលផលក្នុងរយះពេល ១២០ ថ្ងៃ ហើយការប៉ះពាល់នេះដោយសារតែកសិករ ប្រញ៉ាប់ធ្វើការដាំដុះបន្ត​ឲ្យបានទទួលផល ២ ដងក្នុងមួយរដូវកាល ទើបសម្រុក​ដាំដុះក្នុងចន្លោះខែ ៣ និងដើមខែ ៤ ដែលជាអំឡុងពេលមិនទាន់អំណោយផលពីអាកាសធាតុនៅឡើយ។

លោកបន្តថា ឆ្នាំនេះកសិករទើប​ដាំដំឡូងមីបានជាង ៧ មុឺនហិកតាប៉ុណ្ណោះ ខណះផ្ទៃដីដាំដុះក្នុងផែនការមានទំហំ ១០ មុឺន ហិកតា ខណៈ​ដំណាំពោតឆ្នាំនេះក៏ទើបតែបានដាំក្រោម ៥០ ភាគរយនៃផ្ទៃដីសរុបប៉ុណ្ណោះ។ ចំពោះការវាយតម្លៃថាតើក្នុងឆ្នាំនេះកសិករធ្វើដំណាំពោតនិងដំឡូងមីបានប៉ុន្មានភាគរយនោះនៅឡើយ មន្រ្តីកសិកម្ម​ខេត្ត​បាត់ដំបង​បានលើកឡើង​ថា ត្រូវ​ង់​ចាំមើលការដាំដុះបន្ត​ក្នងវគ្គទី​២ ក្នុងអំឡុងខែ ៨ និងខែ ៩ ខាងមុខនេះសិន តើដំណាំពោត និងដំឡូងមី កសិករបានដាំដុះបានកម្រឹតណា ជាពិសេសដំណាំពោត ដែលអាចដាំដុះបាន ២ ដងក្នុងរយះពេល១ឆ្នាំ៕

អត្ថបទ៖ សៅ សារិទ្ធ