ព័ត៌មានជាតិ

លោកស្រី មិថុនា ភូថង មើលឃើញពីបញ្ហាមួយចំនួន ក្នុង និងក្រៅផ្សារដងទង់

បានផុស

៣ ខែ មុន

នៅ

ថ្ងៃចន្ទ ៨ កក្កដា ២០២៤

ដោយ

លោកស្រី មិថុនា ភូថង អភិបាលខេត្តកោះកុង បានមើលឃើញពីបញ្ហាមួយចំនួនក្នុង និងក្រៅផ្សារដងទង់ ស្ថិតក្នុងក្រុងខេមរភូមិន្ទ គ្រាសោភ័ណភាពបរិស្ថានអនាម័យមិនទាន់មានរបៀបរៀបរយល្អប្រសើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សកម្មភាព នៃការលក់ដូរហៀរពេញផ្លូវ ការចតយានយន្តបែបអនាធិបតេយ្យ និងការមិនចុះសម្រុងគ្នារវាងអាជីវករ និងអាជីវករ ត្រូវបានលោកស្រីអភិបាលខេត្តកោះកុង កំពុងមើលឃើញ ហើយបញ្ជាឱ្យមន្ទីរជំនាញ ពិសេសអាជ្ញាធរក្រុងខេមរភូមិន្ទ បន្តយកចិត្តទុកដាក់ដោះស្រាយឡើងវិញ។

លោក សំ ឃិតវៀន អភិបាលរងខេត្តកោះកុង ថ្លែងក្រោយអមដំណើរ លោកស្រី មិថុនា ភូថង ចុះពិនិត្យស្ថានភាពជាក់ស្តែងផ្សារដងទង់ បានលើកឡើង ថ្ងៃទី ៨ ខែកក្កដា ឆ្នាំ ២០២៤ ថា លោកស្រីអភិបាលខេត្ត យល់ថា ការលក់ដូរគ្មានសណ្ដាប់ធ្នាប់ល្អនេះ បង្កឱ្យបាត់បង់សោភណភាពបរិស្ថានទីក្រុង គប្បីដោះស្រាយតាមច្បាប់ ដើម្បីលើកកម្ពស់មុខមាត់ទីក្រុង និងទាក់ទាញភ្ញៀវទេសចរមកលេងកម្សាន្ត ឬទិញទំនិញផ្សេងៗ។

លោកអភិបាលរងខេត្តកោះកុង គូសបញ្ជាក់ដែរថា តំបន់អគារពាណិជ្ជកម្មជាប់ផ្សារដងទង់ ក៏ត្រូវមានវិធានការឱ្យលក់ដូរតាមគំនូសដែលបានកំណត់កាលពីកន្លងទៅ ករណីបន្តបំពាននឹងទទួលខុសត្រូវចំពោះមុខអាជ្ញាធរសមត្ថកិច្ច។ នៅសល់តែ ១ ឆ្នាំទៀត ប្រធានផ្សារដងទង់ នឹងអស់សិទ្ធិវិនិយោគ ដោយជំនួសអ្នកថ្មី អាជ្ញាធរខេត្ត ក្រុង និងមន្ទីរពាក់ព័ន្ធ ដាក់ចេញជាគោលការណ៍លើការអភិវឌ្ឍផ្សារដងទង់តាមចក្ខុវិស័យ។

បញ្ហានេះ ត្រូវបាន លោក ឈឹម ចិន អភិបាលស្ដីទីក្រុងខេមរភូមិន្ទ ទទួលយកបទបញ្ជា ហើយកោះប្រជុំគណៈបញ្ជាការឯកភាពក្រុង កំណត់យកវិធានការដោះស្រាយតាមជំហានឡើងវិញ សំដៅរំដោះភាពអនាធិបតេយ្យដែលកំពុងប្រឈមនេះ។

កន្លងទៅ អាជ្ញាធរសមត្ថកិច្ច ធ្លាប់បានរៀបចំសណ្ដាប់ធ្នាប់បានល្អប្រសើរជាច្រើនលើកច្រើនសាមក ហើយ ជាក់ស្តែងមានភាពល្អប្រសើរបានតែបន្តិចប៉ុណ្ណោះ ក៏បញ្ហាអសកម្ម និងការលក់ដូរបែបអនាធិបតេយ្យបានកើតឡើងវិញដដែល ព្រោះតែបញ្ហាខុសប្រក្រតីគ្រប់បែបយ៉ាង៕

អត្ថបទ ៖ សិរីវឌ្ឍនៈ