ឆ្នាំមុនតារាសម្ដែងជើងចាស់ គន្ធ​ តារាវណ្ណ ស្លាប់ ឯឆ្នាំនេះ​ ពិធីករល្បីលោក គន្ធ ជីវ័ន្ត ត្រូវជាកូន ក៏ស្លាប់តាមក្រោយ

កាលពីឆ្នាំមុន គឺនៅថ្ងៃទី១១ ខែមេសា​ ឆ្នាំ២០២៣ តារាសម្ដែងជើងចាស់ លោក គន្ធ តារាវណ្ណ បានទទួលមរណភាព ដោយរោគាពាធ ចំណែកនៅឆ្នាំនេះ គឺនៅថ្ងៃទី០៧ ខែកក្កដា លោក គន្ធ ជីវ័ន្ត ពិធីករកីឡាមានប្រជាប្រិយភាព បានទទួលមរណភាពដោយសារតែជំងឺមហារីកអណ្ដាត។​ ដំណឹងនៃសាច់ញាតិជាឳពុក និងកូន រវាងលោក គន្ធ តារាវណ្ណ និងលោក គន្ធ ជីវ័ន្ធ ត្រូវបានបញ្ជាក់ឱ្យដឹងដោយទំព័រហ្វេសប៊ុកក្រុមព្រះសុរិយា នាល្ងាចថ្ងៃ០៨ ខែកក្កដា។

ទំព័រហ្វេសប៊ុកក្រុមព្រះសុរិយា សរសេរដូច្នេះ ៖«ពិតជាមានការរន្ធត់ជាខ្លាំង​ មួយឆ្នាំ​ ស្លាប់ម្នាក់សូមរំលែកទុក្ខ​ ដ៏មហាសែនសោកសៅរកទីបំផុត​គ្មាន​ ចំពោះក្រុមគ្រួសារនៃ​ត្រកូល​គន្ធ​ ដែលកាលពីឆ្នាំ២០២៣​តារាសម្ដែងជើងចាស់លោក គន្ធ តារាវណ្ណ ដែលត្រូវជាឪពុក​បង្កេីត​ លោកគន្ធ​ ជីវ័ន្ត​ បានទទួលមរណភាព។ ស្រាប់តែម្សិលមិញនេះ​ (ថ្ងៃទី០៧ ខែកក្កដា ឆ្នាំ២០២៤)លោក​ គន្ធ​ ជីវ័ន្ត​ ជាកូនប្រុស​របស់តារាសម្ដែងជើងចាស់លោក គន្ធ តារាវណ្ណ និងជាអធិប្បាយដ៏ល្បីល្បាញក្មុងវិស័យកីឡា​ប្រចាំប្រទេសកម្ពុជា​បានទទួលមរណភាព »។

គួរឱ្យដឹងថា តារាសម្ដែងជើងចាស់ គន្ធ តារាវណ្ណ ជាតារាសម្ដែងល្បីឈ្មោះតាំងតែពីអំឡុងឆ្នាំ១៩៨៦។ គេស្គាល់លោកថា ជាអតីតតួអង្គសម្ដែងស្ដេចដ៏ល្អបំផុតនៅដើមទសវត្សរ៍ឆ្នាំ២០០០ តួយ៉ាងដូចជានៅក្នុងរឿងធនញ្ជ័យជាដើម។ លោក បានសម្រាកពីសកម្មភាពសិល្បៈនៅពេលដែលកម្ពុជា ជួបប្រទះវិបត្តិកូវីដ១៩។

ក្រោយមរណភាពរបស់លោក គន្ធ ជីវ័ន្ត ព្រោះជំងឺមហារីកអណ្ដាត ​លោក ស៊ីថូ ណាថាន់ ពិធីករ​ធ្លាប់​រួម​ការងារ​ជា​មួយ​គ្នាបានទម្លាយឱ្យដឹងថា លោក គន្ធ ជីវ័ន្ត ​កើត​មាន​ជំងឺជា​យូរ​មកហើយ តែ​លោក​មិន​​ឲ្យ​​ទម្លាយ​ព័ត៌មាន​ឲ្យ​មហាជន​បាន​ដឹង​ឡើយ។ តាមលោក ស៊ីថូ ណាថាន់ មូលហេតុដែលលោក គន្ធ ជីវ័ន្ធ មិនចង់ទម្លាយ ព្រោះលោកចង់លាចាកលោកនេះដោយសុខសាន្ត។

មុនការស្លាប់មកដល់រយៈពេលជិត១ខែ លោក គន្ធ ជីវ័ន្ត បាន​បង្ហោះ​សារ​ចុង​ក្រោយ​បំផុត​​គឺ​កាល​ពី១១ ខែ​មិថុនា ឆ្នាំ​២០២៤ ដោយ​មានខ្លឹម​សារពោរ​ពេញ​ក្តី​ស្រឡាញ់ គោរព និង​សន្តោប្រណី​រវាង​ក្រុម​គ្រួសារ ញាតិ​មិត្ត និង​សង្គម​ជាតិ ហើយ​លោក​ក៏​សូម​ការ​អធ្យាស្រ័យ ប្រសិន​បើ​ការ​ចាក​ចេញ​របស់​លោក​មិន​បាន​លា។

លោក​បាន​សរសេរ​ថា ៖«ផែនដី​អើយ អ្នកពោរពេញដោយមនោសញ្ចេតនាណាស់។ អ្នកផ្តល់ស្នាមអនុស្សារីយ៍ច្រើនណាស់ ខ្ញុំស្រលាញ់អ្នក។ អ្នកបានផ្តល់សង្គមគ្រួសារដ៍គួរអោយស្រលាញ់។ អ្នកផ្តល់សង្គមញត្តិ​ដែលគួរជាទីគោរព។ អ្នកផ្តល់សង្គមការងារគួរជាទីរាប់អានរាក់ទាក់។ អ្នកបានផ្តល់សង្គមជាតិគួរជាទីគោរពណាស់។ បើថ្ងៃណាមួយខ្ញុំចាកចេញពីអ្នកដោយមិនបានលានោះ សូមអ្នកកុំខឹងនឹងខ្ញុំណា ព្រោះខ្ញុំមាននិស្ស័យត្រឹមប៉ុណ្ណឹង។ ចាំណាខ្ញុំនៅតែនឹក នឹក នឹក ហើយស្រលាញ់អ្នក »។

សព​របស់​លោក គន្ធ ជីវ័ន្ត តម្កល់ទុក​នៅវត្តក្រាំងធ្នង់ ដើម្បីធ្វើបុណ្យតាមប្រពៃណីព្រះពុទ្ធសាសនា មុននឹងធ្វើពិធីបូជា នៅថ្ងៃពុធ ទី១០ ខែកក្កដា ឆ្នាំ២០២៤៕

ដោយ៖ ង៉ិល ណារ៉ាត់