ព័ត៌មានជាតិ

ឯកឧត្ដម ហ៊ុន ម៉ានី ៖ បើគ្មានការលះបង់ដ៏ធំធេងរបស់ កម្មាភិបាលជំនាន់មុន ទេ យុវជនជំនាន់ក្រោយ មិនអាចមានឱកាសដូចសព្វថ្ងៃឡើយ

បានផុស

៣ ខែ មុន

នៅ

ថ្ងៃអង្គារ ៩ កក្កដា ២០២៤

ដោយ

ឯកឧត្ដម ហ៊ុន ម៉ានី សង្កត់ធ្ងន់ថា បើគ្មានការលះបង់ដ៏ធំធេងរបស់ កម្មាភិបាលជំនាន់មុនទេ យុវជនជំនាន់ក្រោយ មិនអាចមានឱកាសដូចសព្វថ្ងៃនោះឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសង្កត់ធ្ងន់នេះ ក្នុងឱកាស ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា រួមជាមួយ ឯកឧត្តម ឆាយ ឬទ្ធីសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញជាអធិបតីក្នុងពិធីប្រកាសទទួលស្គាល់សមាសភាពសមាជិក-សមាជិកា ស.ស.យ.ក វិស័យអភិវឌ្ឍន៍ជនបទ នៅមជ្ឈមណ្ឌលម៉ានី អគារ The Kampus កាលពីរសៀលថ្ងៃទី ០៨ ខែកក្កដា ឆ្នាំ ២០២៤ ម្សិលមិញ។

នាឱកាសនោះ ឯកឧត្ដម ហ៊ុន ម៉ានី បានមានប្រសាសន៍ថា ក្នុងឱកាស នៃពិធីប្រកាសទទួលស្គាល់សមាសភាពក្រុមការងារសហភាពសហព័ន្ធយុវជនកម្ពុជា វិស័យអភិវឌ្ឍន៍ជនបទ ក្នុងនាមកម្មាភិបាលជំនាន់ក្រោយ ឯកឧត្ដម និង ឯកឧត្ដម ឆាយ រិទ្ធីសែន រដ្ឋមន្ត្រីក្រសួងអភិវឌ្ឍន៍ជនបទ បានយកឱកាសនេះ រលឹកនូវអ្វីដែលជាការលះបង់តស៊ូរបស់កម្មាភិបាលជំនាន់មុន ដែលលោកបានពលីសាច់ស្រស់ ឈាមស្រស់ ដាក់ជីវិតជាដើមទុន ពីមួយដំណាក់កាលទៅមួយដំណាក់កាល ដើម្បីទទួលបានសុខសន្តិភាពក្នុងពេលបច្ចុប្បន្ន។

ឯកឧត្ដម ហ៊ុន ម៉ានី ក៏បានសង្កត់ធ្ងន់ថា «បើគ្មានការលះបង់ដ៏ធំធេងរបស់ កម្មាភិបាលជំនាន់មុន ទេ យើងទាំងអស់គ្នាដែលជាយុវជនជំនាន់ក្រោយ មិនអាចមានឱកាសដូចសព្វថ្ងៃនោះឡើយ»។

ជាមួយនេះ ឯកឧត្ដម ហ៊ុន ម៉ានី បានអំណរគុណ និងកោតសរសើរចំពោះថ្នាក់ដឹកនាំ សមាជិក-សមាជិកា ស.ស.យ.ក វិស័យអភិវឌ្ឍន៍ជនបទទាំងអស់ ដែលបានលះបង់ កម្លាំងកាយ ចិត្ត ប្ដេជ្ញាបន្តចូលរួមយ៉ាងសកម្មជាមួយក្រុមគ្រួសារសហភាពសហព័ន្ធយុវជនកម្ពុជា នាពេលកន្លងមក និងមកទល់បច្ចុប្បន្ន។

គួរជម្រាបថា ពិធីប្រកាសទទួលស្គាល់សមាសភាពសមាជិក-សមាជិកា ស.ស.យ.ក វិស័យអភិវឌ្ឍន៍ជនបទ នេះ ក៏មានការអញ្ជើញចូលរួមពីសំណាក់ ឯកឧត្ដម អនុប្រធាន ស.ស.យ.ក ឯកឧត្ដម លោកជំទាវ សមាជិក-សមាជិកា គណៈកម្មាធិការកណ្ដាល ឯកឧត្ដម លោកជំទាវ រដ្ឋលេខាធិការ លោក លោកស្រី ក្រុមការងារ រួមទាំងសមាជិក-សមាជិកា ស.ស.យ.ក វិស័យអភិវឌ្ឍន៍ជនបទ សរុបប្រមាណ ៣៣៥ រូប ផងដែរ៕