ព័ត៌មានជាតិ

ឯកឧត្ដម ហ៊ុន ម៉ានី ប្រជុំតាមដានវឌ្ឍនភាពការងារវិភាគមុខងារ និងការធ្វើបច្ចុប្បន្នភាពទិន្នន័យមន្ត្រីរាជការស៊ីវិល

បានផុស

៧ ខែ មុន

នៅ

ថ្ងៃអង្គារ ៩ កក្កដា ២០២៤

ដោយ

ក្រសួងមុខងារសាធារណៈ បើកកិច្ចប្រជុំពិនិត្យវឌ្ឍនភាពការងារលើការអនុវត្តការពិនិត្យឡើងវិញ ការវិភាគមុខងារ និងរចនាសម្ព័ន្ធក្រសួង-ស្ថាប័ន និងការធ្វើបច្ចុប្បន្នភាពទិន្នន័យមន្ត្រីរាជការស៊ីវិល ដឹកនាំដោយ ឯកឧត្ដមឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ នៅគណៈកម្មាធិការកែទម្រង់រដ្ឋបាលសាធារណៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រជុំនេះបានបែងចែកជា ៣ របៀបវារៈ សម្រាប់ជាមូលដ្ឋានរាយការណ៍រួមមាន (១) ការធ្វើវឌ្ឍនភាពលើរបាយការណ៍វិភាគមុខងារ (២) វឌ្ឍនភាពលើការធ្វើបច្ចុប្បន្នភាពទិន្នន័យមន្ត្រីរាជការស៊ីវិលក្រសួង-ស្ថាប័ន និង (៣) វឌ្ឍនភាពលើការធ្វើបច្ចុប្បន្នភាពទិន្នន័យមន្ត្រីរាជការស៊ីវិលថ្នាក់ក្រោមជាតិ ក្នុងវិស័យអប់រំ និងសុខាភិបាល។

ជាមួយនេះ ឯកឧត្ដម ហ៊ុន ម៉ានី មានប្រសាសន៍ថា គោលបំណង នៃកិច្ចប្រជុំនេះ ដើម្បីតាមដានវឌ្ឍនភាពការងារផង ដកស្រង់បទពិសោធ និងស្វែងរកដំណោះស្រាយលើបញ្ហាប្រឈមនានា ព្រមទាំង និងដាក់ចេញទិសដៅរួមគ្នាដើម្បីប្រសិទ្ធភាព និងគុណភាពការងារ ការពិនិត្យឡើងវិញ ការវិភាគមុខងារ និងរចនាសម្ព័ន្ធក្រសួង-ស្ថាប័ន។

បន្ទាប់ពីទទួលជ្រាបរបាយការណ៍វឌ្ឍនភាពលើការងារនីមួយៗ អង្គប្រជុំ បានពិភាក្សាផ្តល់ធាតុចូល ក្នុងគោលដៅចូលរួមដោះស្រាយបញ្ហាប្រឈមនានាដែលបានជួបប្រទះ ហើយដាក់ទិសដៅបន្ត ទៅលើការងារចំពោះមុខ។ ក្នុងនោះស្មារតីអង្គប្រជុំបានលើកឡើងអំពីការបន្តអនុវត្តការងារដែលនៅសេសសល់ដូចជា ការបន្តកិច្ចសហការជាមួយក្រសួង ស្ថាប័ន ដែលចាំបាច់, ការបន្តធ្វើបច្ចុប្បន្នភាពបញ្ចូលទិន្នន័យមន្ត្រីរាជការស៊ីវិលក្នុងប្រព័ន្ធ (HRMIS), ការរៀបចំយន្តការគាំទ្រ និងលើកទឹកចិត្តមន្ត្រីអនុវត្តការងារ, ការបន្តពង្រឹងសមត្ថភាពមន្ត្រីបច្ចេកទេសដែលចុះអនុវត្តការងារ និងការពិនិត្យ វាយតម្លៃ ហើយវេចខ្ចប់របាយការណ៍ រាយការណ៍បន្តជូនថ្នាក់ដឹកនាំ និងសម្រាប់ជាមូលដ្ឋានក្នុងការរៀបចំការងារជាបន្តបន្ទាប់។

ឯកឧត្ដមឧបនាយករដ្ឋមន្ត្រី បន្តថា “យើង (មន្ត្រីក្រសួងមុខងារសាធារណៈ) ត្រូវបន្តភាពជាគំរូជាប្រចាំ ព្រោះនេះជាឧត្ដមភាព នៃមន្ត្រីរាជការដែលយើងមានស្រាប់ហើយ ខណៈការងារកែទម្រង់រដ្ឋបាលសាធារណៈ បានបាញ់ឆ្ពោះមកកាន់ក្រសួងមុខងារសាធារណៈ ដែលអង្គភាពដឹកនាំអនុវត្តផង។ … “មន្ត្រីយើងពិតជាបានឆ្លងកាត់ការលំបាក មានការខិតខំប្រឹងប្រែង និងមានភាពអំណត់ ព្រោះការងារទាំងអស់ដែលយើងលើកយកមកពិភាក្សាទាំងអស់នេះ ជាកិច្ចការលំបាក ត្រូវការពេលវេលា ទាមទារការសហការទាំងក្នុង និងក្រៅ ហើយត្រូវការអនុវត្តជាជំហានៗ”។ ឯកឧត្ដមឧបនាយករដ្ឋមន្ត្រី បន្តទៀតថា ទាំងអស់នេះហើយ ជាការអនុវត្តតាមគោលការណ៍ «រៀបចំផ្ទះរបស់យើងឱ្យបានស្អាត និងមានរបៀបរៀបរយ»។

សូមជម្រាបថា កិច្ចប្រជុំនេះ បានប្រព្រឹត្តទៅ កាលពីព្រឹកថ្ងៃទី ៨ ខែកក្កដា ឆ្នាំ ២០២៤ នៅសាលប្រជុំ នៃសាលាភូមិន្ទរដ្ឋបាល ដោយមានការចូលរួមពី ឯកឧត្ដមរដ្ឋលេខាធិការប្រចាំការ ឯកឧត្ដម លោកជំទាវ លោក លោកស្រី ដែលជាប្រធាន អនុប្រធាន សមាជិក នៃគណៈកម្មការប្រតិបត្តិ នៃ គ.វ.រ និងក្រុមការងារបច្ចេកទេសទាំងអស់មានចំនួនសរុប ៦៧ រូប៕