ព័ត៌មានជាតិ
អាជ្ញាធរ ផ្អាកសកម្មភាពសំណង់ខុសច្បាប់រំលោភដងព្រែក របស់លោកអធិការរងនគរបាលស្រុកបូទុមសាគរ ជាលើកទី៣
លោកអនុប្រធានមន្ទីររៀបចំដែនដី នគររូបនីយកម្មសំណង់ និង សូរិយោដី ខេត្តកោះកុង អភិបាលរងស្រុកបូទុមសាគរ និងមន្រ្តីមូលដ្ឋានជាច្រើននាក់ទៀត បានចុះពិនិត្យ និងសម្រេចឱ្យម្ចាស់សំណង់ គឺលោកអធិការរងនគរបាលស្រុកបូទុមសាគរផ្អាកសកម្មភាពជាបន្ទាន់ ក្រោយរកឃើញថាបានសង់ចូលព្រែកគ្មានច្បាប់អនុញ្ញាត ស្ថិតនៅឃុំអណ្តូងទឹក។
![](https://www.kampucheathmey.com/wp-content/uploads/2024/07/image-566-1024x724.png)
ថ្លែងប្រាប់«កម្ពុជាថ្មី» លោក នួន ពន្លឺ អនុប្រធាន មន្ទីរ រៀបចំដែនដី នគររូបនីយកម្មសំណង និង សូរិយោដី ខេត្តកោះកុង បានឱ្យដឹងនៅថ្ងៃទី៩ ខែកក្កដា ឆ្នាំ២០២៤ថា រូបលោក ពិតជាបានចុះត្រួតពិនិត្យហើយស្នើឱ្យឈ្មោះ ប៊ុន ប្រុស មានតួនាទីជាអធិការរងនគរបាលស្រុកបូទុមសាគរ ដែលជាម្ចាស់សំណង់ឃាត់ផ្អាកសកម្មភាពរបស់ខ្លួន ក្រោយរដ្ឋបាលស្រុកចេញលិខិតឱ្យផ្អាកចំនួន២ដងរួចរាល់ហើយ។
លោក នួន ពន្លឺ បន្ថែមថា ចំពោះសំណង់មានជាផ្ទះ និងស្ពានឈើនេះ លោកមិនទាន់ដឹងថាសង់លយចូលព្រែកមាត់អណ្តូងទឹកទំហំប៉ុន្មាននោះទេ ដោយរង់ចាំផ្ទៀងផ្ទាត់ឯកសារគល់បញ្ជីចុះបញ្ជដីធ្លីលក្ខណៈជាប្រព័ន្ធបន្ថែមសិន ទើបអាចសន្និដ្ឋានលទ្ធផលបាន។ ប៉ុន្តែលោកនឹងធ្វើរបាយការណ៍មួយជូនលោកស្រី មិថុនា ភូថង អភិបាលខេត្ត ដើម្បីមានគោលការណ៍អនុវត្តច្បាប់។
![](https://www.kampucheathmey.com/wp-content/uploads/2024/07/image-567-1024x724.png)
លោក ខេង សំខាន់ អភិបាលរងស្រុកបូទុមសាគរ លើកឡើងដែរថា សំណង់ឥតច្បាប់របស់លោក ប៊ុន ប្រុស ដែលមានតួនាទីជាអធិការរងនគរបាលស្រុកបូទុមសាគរ ត្រូវបានអាជ្ញាធររបស់លោកចុះហាមឃាត់មិនឱ្យធ្វើសកម្មភាពបន្តចំនួន២ដងមកហើយ តែម្ចាស់សំណង់រូបនេះមិនព្រមស្តាប់តាមការណែនាំនោះទេ ដោយផ្គើនសាងសង់បន្តរហូតដល់មានការឃាត់ផ្អាកជាលើកទី៣របស់មន្ទីរជំនាញ។
មុននឹងចេញជារូបរាងសំណង់ខាងលើ រដ្ឋបាលស្រុក ក៏ធ្លាប់ណែនាំពន្យល់ឱ្យឈ្មោះ ប៊ុន ប្រុស ដាក់ពាក្យស្នើសុំសាង់នៅច្រកចេញចូលតែមួយ ដើម្បីមានក្រុមការងារជំនាញពិនិត្យជាក់ស្តែងថាអនុវត្តបានឬមិនបាន ប៉ុន្តែបុគ្គលនៅតែរឹងទទឹងពុំព្រមធ្វើតាមឡើយ។
![](https://www.kampucheathmey.com/wp-content/uploads/2024/07/image-565-1024x724.png)
ពាក់ព័ន្ធបញ្ហានេះដែរ «កម្ពុជាថ្មី» បានទាក់ទងទៅលោក ប៊ុន ប្រុស ដែលជាម្ចាស់សំណង់ និងមានតួនាទីជាអធិការងនគរបាលស្រុកបូទុមសាគរផងដែរ ដោយលោកអះអាងថា សំណង់ដែលលោកកំពុងសង់នេះជាទីតាំងផ្ទះចាស់ប៉ុណ្ណោះ ហើយចំពោះស្ពានឈើថ្មីទទឹងជាង១ម៉ែត្រសម្រាប់ដើរថ្មើរពុំមែនជាសំណង់រឹងនោះទេ ដោយធ្វើស្របនឹងលំនៅដ្ឋានពលរដ្ឋនៅក្បែរគ្នា។ ម៉្យាងសំណង់នេះជាសំណង់ទន់ មិនមែនជាសំណង់រឹងមាំនោះទេ។
លោក ប៊ុន ប្រុស ក៏ទទួលស្គាល់ដែរថា៖ «សំណង់របស់ខ្លួនសង់លយទៅមុខបន្តិចមែន ដោយលោកត្រៀមទៅសុំច្បាប់នៅរដ្ឋបាលឃុំស្រុកដែរ ប៉ុន្តែត្រូវបានអាជ្ញាធរចុះពិនិត្យធ្វើកំណត់ហេតុឱ្យរុះរើចេញដោយខ្លួនឯង។ លុះដល់លោកទៅសុំច្បាប់តាមការណែនាំបែរជាស្ងាត់ឈឹងមកវិញ បើធៀបនឹងសំណង់អ្នកដ៏ទៃទៀតសង់ដូចគ្នាតែសុទ្ធតែបេតុង ដោយដាក់សញ្ញា?ថា លោកខុសអ្វី?បើរុះរើសុំឱ្យរើត្រូវមានតម្លាភាពទាំងអស់»។
![](https://www.kampucheathmey.com/wp-content/uploads/2024/07/image-568-1024x577.png)
លោក ប៊ុន ប្រុស ស្នើដល់អាជ្ញាធរទៅពិនិត្យសំណង់ប្រជាពលរដ្ឋដ៏ទៃទៀតដែលសង់ស្របតាមមាត់ថាតើមានសំណង់ទន់ប៉ុន្មាន?សំណង់រឹងមាំប៉ុន្មាន ពុំមែនមើលឃើញតែសំណង់របស់ខ្លួនម្នាក់នោះទេ។
ទោះបីជាមានការបកស្រាយរបស់លោក ប៊ុន ប្រុស យ៉ាងណាក្តី ក៏មន្រ្តីជំនាញបដិសេធថា សំណង់នេះជាសំណង់ថ្មី ហើយសង់ខុសទីតាំងចាស់ដែលលោក ប៊ុន ប្រុស មានតំណែងជាអធិការរងនគរបាលស្រុកបូទុមសាគរអះអាងទៀតផង។ មន្ត្រីជំនាញ អះអាងថា ក្នុងករណីសំណង់របស់លោក ប៊ុន ប្រុស មិនខុសច្បាប់នោះ ក្រុមការងារជំនាញមិនចុះទៅហាមឃាត់ឡើយ។
![](https://www.kampucheathmey.com/wp-content/uploads/2024/07/image-569-1024x576.png)
តាមប្រភពព័ត៌មានច្បាស់ការណ៍ ខ្សឹបខ្សៀវថា កន្លងទៅ មានចៅហ្វាយស្រុកបូទុមសាគរ៥នាក់ហើយដែលមិនឱ្យអ្នកណាមក យកទីតាំងសំណង់ខុសច្បាប់នេះធ្វើសម្បត្តិឯកជន ឬចេញលិខិតអនុញ្ញាត្តសាងសង់អ្វីទេ ហើយរក្សាទុកបានល្អណាស់។ ទន្ទឹមនឹងនេះ ក៏មានចម្ងល់ថាចុះហេតុអ្វី លោក ប៊ុន ប្រុស អាចមករំលោភយកបាន ហើយផ្ទះធំយ៉ាងរំភើប ឬលោកមានខ្នងបង្អែកធំនៅពីក្រោយខ្នង?។
អំឡុងពេលក្រុមការងារជំនាញចុះផ្អាកសកម្មភាពជាលើកទី៣ គេសង្កេតឃើញថា លោក ប៊ុន ប្រុស ម្ចាស់សំណង់ បានប្រតិកម្មយ៉ាងខ្លាំងចំពោះលោក ខេង សំខាន់ អភិបាលរងស្រុក ដោយមានឥរិយាបថមិនសមរម្យច្រើនទៅអាជ្ញាធររដ្ឋបាល ទាំងខ្លួនមានតួនាទីជាអធិការរងនគរបាលស្រុក។
![](https://www.kampucheathmey.com/wp-content/uploads/2024/07/image-570-1024x577.png)
យោងតាមកំណត់ហេតុការចុះអង្កេតទីតាំងធ្វើផែ និងសំណង់ជាផ្ទះរបស់លោក ប៊ុន ប្រុស របស់រដ្ឋបាលស្រុកបូទុមសាគរ បង្ហាញថា ទីតាំងសំណង់ខុសច្បាប់នេះ មានទទឹង២៨ម៉ែត្រ និងបណ្តោយ៣០ម៉ែត្រ ដោយក្រុមការងារឃាត់ផ្អាកការសាងសង់ជាបណ្តោះអាសន្ន ដោយតម្រូវឱ្យដាក់ពាក្យសុំពីរដ្ឋបាលស្រុកអោយបានត្រឹមត្រូវ ទើបអាចបន្តសកម្មភាព៕
អត្ថបទ៖រីវឌ្ឍនៈ
![](https://www.kampucheathmey.com/wp-content/uploads/2024/07/image-575-1024x768.png)
![](https://www.kampucheathmey.com/wp-content/uploads/2024/07/image-576-1024x577.png)
![](https://www.kampucheathmey.com/wp-content/uploads/2024/07/image-577-1024x576.png)
![](https://www.kampucheathmey.com/wp-content/uploads/2024/07/image-578-672x1024.png)
![](https://kampucheathmey.com/wp-content/uploads/2020/12/1-01-2-01-1.png)
-
ព័ត៌មានជាតិ៤ ថ្ងៃ ago
យាយតាយកចៅអាយុ៦ខែ ទៅងូតទឹក ត្រូវខ្សែភ្លើងឆក់ស្លាប់ទាំង៣នាក់ យ៉ាងអាណោចអាធ័ម
-
ព័ត៌មានជាតិ៤ ថ្ងៃ ago
កូនប្រុសលោក រ័ត្ន ស្រ៊ាង ត្រូវបានតែងតាំងជាមេបញ្ជាការរងកងរាជអាវុធហត្ថរាជធានីភ្នំពេញ
-
ព័ត៌មានជាតិ១ ថ្ងៃ ago
ឆ្នាំមុនតារាសម្ដែងជើងចាស់ គន្ធ តារាវណ្ណ ស្លាប់ ឯឆ្នាំនេះ ពិធីករល្បីលោក គន្ធ ជីវ័ន្ត ត្រូវជាកូន ក៏ស្លាប់តាមក្រោយ
-
សេដ្ឋកិច្ច៥ ថ្ងៃ ago
កម្ពុជាគួរត្រៀមខ្លួនបែបណា មុនពេលប្ដូរឋានៈ ទៅជាប្រទេសមានចំណូលមធ្យមកម្រិតខ្ពស់
-
ព័ត៌មានអន្ដរជាតិ៦ ថ្ងៃ ago
ធ្លាក់ភ្លៀងមួយម៉ោង ទីក្រុងហូជីមិញ ត្រូវទឹកជន់លិច ល្ហាចល្ហឹម
-
សន្តិសុខសង្គម៥ ថ្ងៃ ago
ឃើញអាការៈកូនស្រីមិនស្រួលខ្លួនក៏នាំទៅពិនិត្យ ទើបបែករឿងមានគេចាប់រំលោភ
-
ព័ត៌មានជាតិ២ ថ្ងៃ ago
ម្ចាស់ចម្ការទុរេនធំៗទូទាំងប្រទេសជួបជុំគ្នា ចែករំលែកបច្ចេកទេសដំាដុះទុរេន ឈានពង្រីកទីផ្សារនាំចេញទៅក្រៅប្រទេស
-
ព័ត៌មានជាតិ៦ ថ្ងៃ ago
កូនប្រុសលោកបណ្ឌិត គី សេរីវឌ្ឍន៍ ទទួលបានមេដាយមាស ពីការប្រឡងវិទ្យាសាស្ត្រ វ៉ាន់ដា អូឡាំព្យាដ ២០២៤