រដ្ឋមន្ត្រីសុខាភិបាល ណែនាំមន្ត្រីខិតខំផ្តល់សេវាជូនពលរដ្ឋប្រកបដោយគុណភាព និងក្រមសីលធម៌

លោកសាស្ត្រាចារ្យរដ្ឋមន្ត្រីក្រសួងសុខាភិបាលបានធ្វើការក្រើនរំលឹក និងណែនាំដល់មន្ត្រីសុខាភិបាលទាំងអស់ត្រូវបន្តខិតខំប្រឹងប្រែងផ្តល់សេវាជូនប្រជាជនឱ្យបានល្អ និងប្រកបដោយគុណភាព និងក្រមសីលធម៌ខ្ពស់ដើម្បីលើកកិត្តិយសវិស័យសុខាភិបាលឱ្យកាន់តែប្រសើរបន្ថែមទៀត។

នៅក្នុងឱកាសចូលរួមធ្វើបឋកថាស្តីពីភាពជាអ្នកដឹកនាំ និងនវានុវត្តន៍សម្រាប់មន្រ្តីរាជការក្រោមឱវាទក្រសួងសុខាភិបាលតាមប្រព័ន្ធវីដេអូសន្និសីទជូនដល់មន្រ្តីក្រោមឱវាទក្រសួងសុខាភិបាលកាលពីរសៀលថ្ងៃទី៩កក្កដា លោករដ្ឋមន្ត្រីបានផ្តល់ឱកាសដល់សិក្ខាកាមទាំងអស់ចូលរួមបង្ហាញចំណាប់អារម្មណ៍ បន្ទាប់ពីបានបញ្ចប់ប្រធានបទទាំង២៥ នៃវគ្គបណ្តុះបណ្តាលស្តីពី«ភាពជាអ្នកដឹកនាំ និងនវានុវត្តន៍»។

ជាកិច្ចបន្ត លោករដ្ឋមន្ត្រីបានរំលឹកឡើងវិញនូវវីរៈភាពរបស់មន្រ្តីសុខាភិបាលទាំងអស់ដែលបានលះបង់កំលាំងកាយ
កំលាំងចិត្តបំពេញការងារក្នុងអំឡុងនៃការឆ្លងរាលដាលនៃជំងឺកូវីដ-១៩ ហើយលើកទឹកចិត្តឱ្យមន្រ្តីសុខាភិបាលទាំងអស់ បន្តខិតខំប្រឹងប្រែងដើម្បីផ្តល់សេវាជូនប្រជាជន និងដើម្បីលើកកិត្តិយសវិស័យសុខាភិបាលទាំងមូល។ បន្ថែមពីលើនេះ លោករដ្ឋមន្ត្រីបានផ្តល់សារគន្លឹះជូនដល់អ្នកដឹកនាំគ្រប់ឋានុក្រមឱ្យប្រកាន់យកភាពស្មោះត្រង់ និងការបង្កើតទំនាក់ទំនងប្រកបដោយប្រសិទ្ធិភាព សម្រាប់ធ្វើជាមធ្យោបាយជំរុញការដឹកនាំការងារក្នុងវិស័យសុខាភិបាលឱ្យទទួលបានជោគជ័យប្រកបដោយនិរន្តរភាព៕

អត្ថបទ៖ សំអឿន