រដ្ឋមន្ត្រី ប្រាប់រដ្ឋសភា ថា ក្រសួងអភិវឌ្ឍន៍ជនបទ បានកំណត់កម្មវិធីអាទិភាព៤ ក្នុងបេសកកម្មរបស់ខ្លួន

ចក្ខុវិស័យរបស់ក្រសួងអភិវឌ្ឍន៍ជនបទ ក្នុងអាណត្តិទី៧នេះ គឺផ្ដោតលើការលើកកម្ពស់គុណភាព និងគុណតម្លៃជីវិតប្រជាជននៅតំបន់ជនបទ ទាំងផ្នែកសេដ្ឋកិច្ច សង្គម និងវប្បធម៌ តាមរយៈការកំណត់កម្មវិធីអាទិភាពចំនួន៤ សម្រាប់វិនិយោគ។ នេះជាការបញ្ជាក់របស់រដ្ឋមន្ត្រីក្រសួងអភិវឌ្ឍន៍ជនបទ ទៅកាន់គណៈកម្មការជំនាញរបស់រដ្ឋសភា។

លោក ឆាយ ប្ញទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ កាលពីថៃ្ងទី៩ ខែកក្កដា ឆ្នាំ២០២៤ បានដឹកនាំប្រតិភូក្រសួង ជួបប្រជុំជាមួយគណៈកម្មការផែនការ វិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយម (គណៈកម្មការទី៣) នៃរដ្ឋសភា ដឹកនាំដោយលោក ឡូយ សុផាត ប្រធានគណៈកម្មការ ដើម្បីជម្រាបអំពីវឌ្ឍនភាពការងារ ផែនការសកម្មភាព និងលទ្ធផលនៃការអនុវត្តផែនការយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧ ពាក់ព័ន្ធនឹងវិស័យអភិវឌ្ឍន៍ជនបទ។

លោក ឆាយ ប្ញទ្ធិសែន បញ្ជាក់ទៅកាន់គណៈកម្មការជំនាញរដ្ឋសភា ថា ក្រសួងអភិវឌ្ឍន៍ជនបទ បាននឹងកំពុងបំពេញបេសកកម្មយ៉ាងសកម្មក្នុងគោលដៅអភិវឌ្ឍន៍តំបន់ជនបទ ដើម្បីរួមចំណែកកាត់បន្ថយភាពក្រីក្រ និងលើកកម្ពស់ជីវភាពប្រជាជន ព្រមទាំងកសាងសង្គមជនបទឱ្យមានភាពរីកចម្រើនប្រកបដោយវិបុលភាព ផាសុខភាព និងសុភមង្គល។ បើតាមលោករដ្ឋមន្ត្រី បេសកកម្មដ៏មុតស្រួចរបស់ក្រសួង គឺបានដាក់ចេញនូវចក្ខុវិស័យគន្លឹះ គឺ លើកកម្ពស់គុណភាព និងគុណតម្លៃជីវិតប្រជាជននៅតំបន់ជនបទប្រកបដោយបរិយាបន្ន ទាំងផ្នែកសេដ្ឋកិច្ច សង្គម និងវប្បធម៌ ដោយបានកំណត់ យកកម្មវិធីអាទិភាពចំនួន៤ សម្រាប់ធ្វើការវិនិយោគ។

តាមការបញ្ជាក់ឱ្យដឹងដោយលោករដ្ឋមន្រ្តី ឆាយ ប្ញទ្ធិសែន កម្មវិធីអាទិភាពទាំង៤ របស់ក្រសួងខាងលើនេះ រួមមាន៖ ១) ការអភិវឌ្ឍន៍ហេដ្ឋារចនាសម្ព័ន្ធរូបវ័ន្ត និងគមនាគមន៍ ២) ការកែលម្អលក្ខខណ្ឌនៃការរស់នៅរបស់សហគមន៍ជនបទ ៣) ការធ្វើពិពិធកម្មសកម្មភាពសេដ្ឋកិច្ចជនបទ និង៤)​ ការពង្រឹងសេវាគាំទ្ររដ្ឋបាល និងកិច្ចការទូទៅ។ លោក ថា កម្មវិធីអាទិភាពទាំង៤ គឺជាធាតុផ្សំដ៏ចាំបាច់ក្នុងការអនុវត្តន៍នូវយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី ហ៊ុន ម៉ាណែត ជានាយករដ្ឋមន្ត្រី ដែលក្នុងគោលដៅបន្តបេសកកម្មថែរក្សាសន្តិភាព និងអភិវឌ្ឍន៍ប្រទេសជាតិជាប្រវត្តិសាស្ត្រ ឆ្ពោះទៅសម្រេចបានចក្ខុវិស័យកម្ពុជាជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។

លោករដ្ឋមន្រ្តី បន្តថា ក្នុងរយៈពេល១០ខែ ចាប់ពីខែកញ្ញា ឆ្នាំ២០២៣ ដល់ខែមិថុនា ឆ្នាំ២០២៤នេះ ក្រសួងបានអនុវត្តកម្មវិធីទាំង៤ ប្រកបដោយការយកចិត្តទុកដាក់ និងសម្រេចបានលទ្ធផលជាច្រើន ដែលបានឆ្លុះបញ្ចាំងពីកិច្ចខិតខំប្រឹងប្រែង និងការទទួលខុសត្រូវរបស់ថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ទាំងអស់ចំពោះរាជរដ្ឋាភិបាលក្នុងគោលដៅលើកកម្ពស់គុណភាព និងគុណតម្លៃនៃជីវិតរស់នៅរបស់ប្រជាជនជនបទឱ្យបានល្អប្រសើរជាលំដាប់ ទាំងផ្នែកសេដ្ឋកិច្ច សង្គមកិច្ច និងវប្បធម៌ ដែលជាចំណែកដ៏ចាំបាច់ក្នុងការគាំទ្រដល់ការអនុវត្តយុទ្ធសាស្ត្របញ្ចកោណ៕