អភិបាលរងខេត្តស្វាយរៀង ណែនាំឱ្យក្រុមហ៊ុនផ្តល់សេវាកម្មអគ្គិសនី យកចិត្តទុកដាក់ខ្ពស់ក្នុងការផ្តល់សេវាដល់ពលរដ្ឋ

លោក​ ម៉ែន​ អេង​ អភិបាលរងខេត្ត​ស្វាយរៀង តំណាងឱ្យអភិបាលខេត្ត បានផ្តល់ការណែនាំចំនួន៥ចំណុចដល់ក្រុមហ៊ុនផ្តល់សេវាកម្មអគ្គិសនី យកចិត្តទុកដាក់ផ្តល់សេវាឱ្យពលរដ្ឋឱ្យបានល្អប្រសើរ។

ការណែនាំនេះ​ធ្វើនៅសៀលថ្ងៃទី៩ ខែកក្កដា ឆ្នាំ២០២៤ ក្នុងពេលលោក ម៉ែន អេង តំណាងអភិបាលខេត្ត ចូលរួមក្នុងកិច្ចពិភាក្សា​ លេីការដោះស្រាយបញ្ហាអគ្គិសនីនៅស្រុករមាសហែក ខេត្តស្វាយរៀង​ ក្រោមធិបតីភាព​ លោក​ តេង​ សុខុមាល​ អនុប្រធានអាជ្ញាធរអគ្គិសនីកម្ពុជា។​ ក្នុងកិច្ចប្រជុំនេះក៏មានការអញ្ជេីញចូលរួមពី​ គណៈប្រតិភូអាជ្ញាធរអគ្គិសនីកម្ពុជា​ លោក​អភិបាលស្រុករមាសហែក​  លោក​ កែវ​ ច័ន្ទលី​ ប្រធានមន្ទីរព័ត៌មាន​ខេត្ត​ ​តំណាងប្រធានអគ្គិសនីខេត្ត​ លោក​ សេង​ រិទ្ធ​ តំណាងក្រុមហ៊ុនខ្មែរ​ យូធីឡីធី​ លោក​ យា​ ណាវិន​ ប្រធានការិយាល័យកិច្ចការច្បាប់​ និងសុវត្តិភាពសាធារណៈសាលាខេត្ត​ ព្រមទាំងអាជីវករជាច្រេីននាក់ទៀត​ ។

ក្នុងកម្មវិធីនេះ លោក​ ម៉ែន​ អេង​ អភិបាលរងខេត្ត​ បានលើកឡើងយ៉ាងច្បាស់អំពីការណែនាំស្តីពីការធ្វេីសេវាកម្មអគ្គិសនីរបស់ក្រុមហ៊ុន​ដូចខាងក្រោម៖

​១. ក្រុមហ៊ុនត្រូវណែនាំបុគ្គលិកឱ្យប្រើពាក្យសមរម្យ និងផ្តល់សេវាអគ្គិសនីឱ្យកាន់តែប្រសើរ និងទាន់ពេលវេលាដល់អ្នកប្រើប្រាស់។ ២. ក្រុមហ៊ុនត្រូវកត់ត្រាលេខអំណាននាឡិកាស្ទង់ឱ្យបានត្រឹមត្រូវតាមពេលវេលាកំណត់ ហើយត្រូវពិនិត្យឱ្យបានត្រឹមត្រូវមុននឹងចេញវិក្កយបត្រ។ ៣.ក្រុមហ៊ុនត្រូវកែតម្រូវវិក្កយបត្រដើម្បីឱ្យមានប្រវត្តិនៃការប្រើប្រាស់សម្រាប់រយៈពេល ១២ខែកន្លងមកក្នុងលំដាប់នៃខែឱ្យបានត្រឹមត្រូវ។ ៤. ក្រុមហ៊ុនត្រូវជូនដំណឹងជាមុនដល់អាជ្ញាធរមូលដ្ឋាន ឃុំ ភូមិ និងអ្នកប្រើប្រាស់ ក្នុងករណីមានគម្រោងផ្អាកការផ្គត់ផ្គង់បណ្តោះអាសន្នមានរយៈពេលយូរ។ ៥. ក្រុមហ៊ុនត្រូវកំណត់ និងកែសម្រួលប្រភេទអ្នកប្រើប្រាស់ឱ្យបានត្រឹមត្រូវតាមការណែនាំរបស់អាជ្ញាធរអគ្គិសនីកម្ពុជា។

ជាមួយគ្នានេះ លោក​ តេង​ សុខុមាល​ មានប្រសាសន៍ថា ​ដេីម្បីដោះស្រាយបញ្ហាទាំងអស់របស់ពលរដ្ឋ ​ សេវាករត្រូវធ្វេីការងារជាមួយរដ្ឋបាលស្រុក​ ចុះពិនិត្យឱ្យបានល្អិតល្អន់ជូនប្រជាពលរដ្ឋដេីម្បីកុំឱ្យមានភាពខុសឆ្គងដោយប្រការណាមួយ​។ លោកបន្ថែមថា​ មុនពេលដោះដូរកុងទ័រភ្លេីង​ ត្រូវធ្វេីការផ្ទៀងផ្ទាត់(តេស្ត)​ឱ្យបានហ្មត់ចត់​ រវាងកុងទ័រចាស់​ និងកុងទ័រថ្មី​ដេីម្បីទទួលបានភាពប្រាកដប្រជាក្នុងការប្រេីប្រាស់ភ្លេីង៕

ដោយ៖ ភក្ដី