ព័ត៌មានជាតិ

អាជ្ញាធរស្រុកបូទុមសាគរ ដាំកូនត្របែកព្រៃ ៥០ ដើម អមសងខាងផ្លូវជាតិលេខ ៤៨

បានផុស

៧ ខែ មុន

នៅ

ថ្ងៃពុធ ១០ កក្កដា ២០២៤

ដោយ

ថ្នាក់ដឹកនាំ និងមន្ត្រីរាជការស្រុកបូទុមសាគរ ខេត្តកោះកុង បានរួមគ្នាដាំកូនឈើប្រភេទជាកូនត្របែកព្រៃចំនួន ៥០ ដើម តាមសងខាងផ្លូវជាតិលេខ ៤៨ ដើម្បីលើកសោភ័ណភាពក្នុងមូលដ្ឋានរបស់ខ្លួនឱ្យកាន់តែទាក់ទាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ក្រូច បូរីសីហា អភិបាលស្រុកបូទុមសាគរ បានឱ្យដឹងនៅថ្ងៃទី ១០ ខែកក្កដា ឆ្នាំ ២០២៤ នេះថា កាលពីម្សិលមិញ ក្រុមប្រឹក្សាស្រុក ថ្នាក់ដឹកនាំស្រុក និងមន្ត្រីរាជការរបស់ខ្លួនចុះដាំកូនត្របែកព្រៃចំនួន ៥០ ចាប់ពីស្ពានព្រែកតាញ៉ែង ត្រើយម្ខាងស្ពានភូមិអណ្ដូងទឹក រហូតមកដល់ភូមិជីមាល ឃុំអណ្ដូងទឹក។

បើតាមលោកអភិបាលស្រុកបូទុមសាគរ ដដែល ការរួមគ្នាដាំដុះដើមឈើនេះក្នុងគោលបំណងដើម្បីតុបតែងកែលម្អសោភ័ណភាពក្នុងមូលដ្ឋាន និងអបអរសាទរ រុក្ខទិវា ៩ កក្កដា ២០២៤ ខណៈប្រព័ន្ធជីវចម្រុះ និងធម្មជាតិមានសារៈសំខាន់សម្រាប់ជីវិតនៅលើផែនដី។ ទៅថ្ងៃមុខ រដ្ឋបាលស្រុកបូទូមសាគរ ក៏គ្រោងដាំស្តារដើមឈើគ្រប់ប្រភេទបន្ថែមទៀតលើផ្ទៃដីរដ្ឋជាង ៨ ហិតា រីឯកូនដើមត្របែកព្រៃ ក៏ដាំដុះបន្តបន្ទាប់អមសងខាងផ្លូវជាតិលេខ ៤៨។

ក្រសួងបរិស្ថាន នៅថ្ងៃនេះ បានលើកឡើងថា សកម្មភាពកសិកម្មអេកូឡូស៊ីមានសារៈសំខាន់កាន់តែខ្លាំងណាស់ នាពេលសព្វថ្ងៃ ដើម្បីកែតម្រូវស្ថានភាពនេះ និងធ្វើឱ្យមានតុល្យភាពអេកូឡូស៊ីធម្មជាតិ។ ម្យ៉ាងវិញទៀត ការធ្វើកសិកម្មអេកូឡូស៊ី ដាំដំណាំចម្រុះតាមបែបធម្មជាតិនៅជុំវិញផ្ទះ ឬមូលដ្ឋាន ក៏ជួយអភិរក្សដីឱ្យមានជីជាតិ ជារៀងរហូតផងដែរ ហើយជួយពង្រឹងទំនាក់ទំនងគ្នាទៅវិញទៅមក នៃប្រព័ន្ធស្បៀងអាហារ និងការថែរក្សាធនធានធម្មជាតិ និងបរិស្ថាន។

លោក ខ្វៃ អាទិត្យា អ្នកនាំពាក្យក្រសួងបរិស្ថាន ពន្យល់ដែរថា ការការពារ និងអភិរក្សធនធានធម្មជាតិផ្តល់នូវអត្ថប្រយោជន៍យ៉ាងសំខាន់ ដោយមិនគិតថ្លៃ ដូចជាអាហារដែលមានជីវជាតិ ខ្យល់បរិសុទ្ធ និងទឹកស្អាត ដើម្បីជួយដល់សុខភាព ព្យាបាលជំងឺ និងការពារគ្រោះមហន្តរាយធម្មជាតិជាដើម៕

អត្ថបទ ៖ សិរីវឌ្ឍនៈ