សង្កាត់ចាក់អង្រែក្រោមទទួលបានសមិទ្ធិផលថ្មី សម្រួលដល់ការធ្វើដំណើររបស់ប្រជាពលរដ្ឋ

លោក ជា សុខៃ ចៅសង្កាត់ចាក់អង្រែក្រោមបានឲ្យ កម្ពុជាថ្មី ដឹងនៅរសៀលថ្ងៃទី១០ ខែកក្កដា នេះថា នៅដើមខែកក្កដានេះ សាលាសង្កាត់ចាក់អង្រែក្រោម នៃរដ្ឋបាលខណ្ឌខណ្ឌមានជ័យ បានទទួលសមិទ្ធិផលថ្មី គឺផ្លូវ១ខ្សែតភ្ជាប់ផ្លូវលេខ​៣១ឆ្ពោះទៅផ្លូវ៦០ម៉ែត្រ ស្ថិតក្នុងភូមិព្រែកតាឡុង១។

លោកចៅសង្កាត់បានបន្តថា ផ្លូវដែលសាងសង់ថ្មីនេះ គឺកំពុងកិនបង្ហាប់ និងចាក់ថ្មរមុិចដើម្បីឲ្យបងប្អូនប្រជាពលរដ្ឋងាយស្រួលក្នុងការធ្វើដំណើរចេញពីភូមិព្រែកតាឡុង១ សង្កាត់ចាក់អង្រែក្រោម ដែលពីដើមឡើយពុំដែលមានទេគឺមានតែផ្លូវចេញទៅផ្លូវជាតិលេខ២ប៉ុណ្ណោះ។ ហើយផ្លូវនេះមានសារសំខាន់សម្រាប់ឲ្យប្រជាពលរដ្ឋធ្វើដំណើរចេញពីភូមិឆ្ពោះទៅផ្លូវ៦០ម៉ែត្រដែលពីដើមមក គឺត្រូវវាងទៅមុខវត្តចាក់អង្រែក្រោមទើបអាចទៅផ្លូវ៦០ម៉ែត្របាន។

ចំពោះថវិកាសាងសង់ផ្លូវ គឺទទួលបានពីសប្បុរសជនដែលលោកមានលំនៅដ្ឋានអមសង្ខាងផ្លូវនេះ។ ផ្លូវថ្មីដែលកំពុងស្ថាបនាមានបណ្តោយ៧០០ម៉ែត្រ និងមានទទឹង១០ម៉ែត្រ៕

អត្ថបទ៖ នរា