អនុប្រធានរដ្ឋសភាឡាវ ធ្វើទស្សនកិច្ចនៅខេត្តព្រះសីហនុដើម្បីសិក្សាស្វែងរកឱកាសវិនិយោគ

លោក ខាំបៃ ដាំឡាត់ អនុប្រធានរដ្ឋសភាឡាវ និងជាប្រធានសមាគមមិត្តភាពឡាវ-កម្ពុជា នៅថ្ងៃទី១០ ខែកក្កដា ឆ្នាំ២០២៤នេះ បានធ្វើទស្សនកិច្ចនៅខេត្តព្រះសីហនុ ដើម្បីសិក្សាស្វែងរកឱកាសវិនិយោគ ខណៈខេត្តដែលនៅដែនសមុទ្រមួយនេះត្រូវបានរាជរដ្ឋាភិបាលរហសនាមឲ្យថា «ជាតារារៈនៅទិសនីរតី»។

ដំណើរទស្សនកិច្ចរបស់ប្រតិភូឡាវ នាពេលនេះ គឺមានការសម្របសម្រួលដោយលោក លី ហុង ទីប្រឹក្សាក្រសួងមហាផ្ទៃ និងជាអនុប្រធានសមាគមមិត្តភាពកម្ពុជា-ឡាវ និងលោក យឿន យឿត ទីប្រឹក្សារាជរដ្ឋាភិបាលកម្ពុជា និងជាទីប្រឹក្សាសម្តេចតេជោ ហ៊ុន សែន ប្រធានគណបក្សប្រជាជនកម្ពុជា។

នៅក្នុងដំណើរទស្សនកិច្ចរយៈពេល៣ថ្ងៃ គឺចាប់ពីថ្ងៃទី១០ ដល់ថ្ងៃទី១២កក្កដា ឆ្នាំ២០២៤នេះ នៅក្នុងកិច្ចជំនួបជាមួយអភិបាល នៃគណៈអភិបាលខេត្តព្រះសីហនុ លោក ខាំបៃ ដាំឡាត់ បានលើកឡើងអំពីទំនាក់ទំនងកិច្ចសហប្រតិបត្តិការទ្វេភាគីជាមួយកម្ពុជាតាំងពីដើមរហូតដល់សព្វថ្ងៃនេះ ហើយលោករំពឹងថា ទំនាក់ទំនងនៃប្រទេស និងប្រជាជនទាំងពីរនឹងកាន់តែល្អខ្លាំងក្លាបន្ថែមទៀតរបស់លោក នៅព្រះរាជាណាចក្រកម្ពុជា ជាពិសេសនៅខេត្តព្រះសីហនុដែលជាខេត្តដ៏មានសក្តានុពលរបស់កម្ពុជានាពេលនេះតែម្តង។

ថ្លែងនៅក្នុងកិច្ចជំនួបនោះដែរ លោក ម៉ាង ស៊ីណេត អភិបាលខេត្តព្រះសីហនុ ក៏បានលើកឡើងអំពីដំណើរទស្សនកិច្ចរបស់ប្រតិភូឡាវជាច្រើន មកខេត្តព្រះសីហនុនាពេលកន្លងមកផងដែរ ដោយដំណើរទស្សនកិច្ចនេះគឺ ដើម្បីស្វែងយល់អំពីសក្តានុពលខេត្តព្រះសីហនុ និងឱកាសធ្វើការវិនិយោគនៅខេត្តដែលជាប់ដែនសមុទ្រមួយនេះ៕