ផ្សិតព្រៃ ៤ប្រភទ ហុចប្រយោជន៍ធំដល់ប្រជាសហគមន៍ ព្រោះមានតម្លៃខ្ពស់

ជីវចម្រុះដែលដុះក្នុងព្រៃនៃកម្ពុជា មិនត្រឹមជាចំណែកនៃធម្មជាតិ តែក៏នាំប្រយោជន៍ដល់ប្រជាសហគមន៍ ក្នុងតំបន់ដែលរស់នៅក្បែរតំបន់ព្រៃ និងជួរភ្នំផងដែរ ដោយពួកគាត់ អាចស្វែងរករុក្ខជាតិព្រៃទាំងនោះ ទៅដាក់លក់នៅលើទីផ្សារបាន ក្នុងតម្លៃមួយខ្ពស់។ ម៉្យាង ផ្សិតខ្លះក៏មានទីផ្សារនាំចេញផងដែរ ដោយប្រទេសជិតខាងកម្ពុជា បានមកប្រមូលទិញក្នុងតម្លៃដ៏ខ្ពស់។

ខាងក្រោមនេះ ជាផ្សិតព្រៃ ៣ប្រភេទ ដែលមានតម្លៃខ្ពស់៖
១. ផ្សិតប៉ក់ ឬផ្សិតផូងផាង
ផ្សិតប៉ក់ ជាប្រភេទផ្សិតភ្នំដែលដុះក្នុងដែនធម្មជាតិ មានរូបរាងមូលតូចៗ ហើយច្រើនដុះនៅតំបន់ជួរភ្នំក្រវាញ ដែលក៏ជាផ្នែកមួយ នៃចំណូលរបស់ប្រជាពលរដ្ឋក្នុងសហគមន៍ផងដែរ ព្រោះនៅរាល់រដូវកាលផ្សិតនេះដុះ ពលរដ្ឋក្នុងតំបន់ តែងប្រមូលយកទៅលក់នៅលើទីផ្សារ និងមានទីផ្សារនាំចេញថែមទៀតផង។

ផ្សិតប្រភេទនេះ មានតម្លៃខ្ពស់គួរសម ដោយក្នុង១គីឡូក្រាម អាចចន្លោះពី ២មុឺនរៀល ទៅ ៣មុឺនរៀល ឬអាចខ្ពស់ជាងនេះ (ផ្សិតស្រស់) ។ បើគិតតែសម្រកផ្សិតប៉ក់ គឺមានតម្លៃប្រហែល ១មុឺនរៀលទៅហើយ។ នេះបើតាមតម្លៃដាក់លក់នៅលើទីផ្សារ របស់អ្នកចែកចាយលក់ដុំនិងរាយ ផ្សិតប្រភេទនេះ។

២. ផ្សិតកញ្ចោរ
ផ្សិតកញ្ចោរ ក៏ជាប្រភេទផ្សិតដុះដោយធម្មជាតិដែរ ដែលច្រើនគឺដុះនៅតាមតំបន់ព្រៃ ពេលដែលមានភ្លៀងធ្លាក់ ថ្មីៗ។ ចំពោះតម្លៃផ្សិតប្រភេទនេះនៅលើទីផ្សារ ក៏ខ្ពស់ដែរ ដែលមានតម្លៃប្រហែល ៤មុឺនរៀល ឬអាចខ្ពស់ជាងនេះ។

៣. ផ្សិតក្ងោក
ជាផ្សិតព្រៃ ដែលច្រើនដុះនៅតាមក្រោមដើមឈើក្នុងព្រៃ ក្នុងរដូវវស្សា។ បើនិយាយពីរសជាតិ ផ្សិតប្រភេទនេះ ក៏មិនចាញ់ ផ្សិតប៉ក់ និង ផ្សិតកញ្ជោរដែរ គេអាចយកវាទៅចម្អិនម្ហូបបានច្រើនមុខ តាមចំណង់ចំណូលចិត្ត។ ចំពោះតម្លៃដាក់លក់នៅលើទីផ្សាររបស់ផ្សិតនេះវិញ ក៏ប្រហាក់ប្រហែលគ្នានឹងផ្សិតខាងលើដែរ គឺតម្លៃខ្ទង់ ៤មុឺនរៀល ។

៤. ផ្សិតកែវ
ផ្សិតកែវ ជាផ្សិតព្រៃម្យ៉ាងដែលមានលក្ខណៈ ខុសពីផ្សិតដទៃ ព្រោះវាមានរូបរាងដូចជា ចាហួយ មានដុះលូតលាស់ នៅលើទឹកដីនៃខេត្តព្រះវិហារ។ ផ្សិតប្រភេទនេះ ត្រូវបានអ្នកខេត្តព្រះវិហារ យកធ្វើជាបង្អែម ទទួលទានផងដែរ។ ចំពោះតម្លៃផ្សិតប្រភេទនេះវិញ ក្នុង ១គីឡូ អាចមានតម្លៃដល់ ៥មុឺនរៀលឯណោះ៕