កម្មការិនីរោងចក្រ២នាក់បងប្អូន ត្រូវរថយន្តបុកពីក្រោយបណ្ដាលឱ្យស្លាប់ម្នាក់របួសធ្ងន់ម្នាក់

កម្មការិនីរោងចក្រពីរនាក់បងប្អូនដឹកគ្នាទៅធ្វើការត្រូវរថយន្តមិនស្គាល់ម៉ាកបុកពីក្រោយបណ្ដាលឱ្យស្លាប់យ៉ាងអាណោចអាធ័មនៅកណ្ដាលផ្លូវ នឹងរងរបួសធ្ងន់ម្នាក់ត្រូវបានបញ្ជូនទៅកាន់មន្ទីរពេទ្យ។

ហេតុការណ៍នេះបានកើតឡើងនៅថ្ងៃទី១៣ ខែកក្កដា ឆ្នាំ២០២៤ វេលាម៉ោង៥នឹង៤០នាទី ត្រង់ចំណុចស្តុប វិមានឈ្នះឈ្នះ កែងផ្លូវហាណូយ ក្នុងភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។

តាមប្រភពពីប្រជាពលរដ្ឋនៅជិតកន្លែងកើតហេតុ បានឱ្យដឹងថា នៅមុនពេលកើតហេតុគាត់បានឮសំឡេងផ្ទុះរួចប្ដីគាត់រត់ចេញមកមើលក៏ឃើញនារីម្នាក់ស្លាប់នៅកណ្ដាលផ្លូវ ម្នាក់ទៀតរងរបួសធ្ងន់ ភ្លាមៗគាត់បានរាយការណ៍ទៅសមត្ថកិច្ចមូលដ្ឋានឱ្យចុះមកទីតាំងកើតហេតុ និងទាក់ទងរថយន្តសង្រ្គោះបន្ទាន់ ដើម្បីយកអ្នករបួសទៅមន្ទីរពេទ្យ។

ក្រុមគ្រួសារសាច់ញាតិ បានឱ្យដឹងថា នារីជនរងគ្រោះទាំង២នាក់តែងតែក្រោកពីព្រលឹមជិះម៉ូតូចេញពីផ្ទះនៅស្រុកពញាឮទៅធើ្វការនៅម្ដុំស្ទឹងមានជ័យដូចសព្វមួយដង ខណៈពេលនារីរងគ្រោះទាំងពីរជិះម៉ូតូមួយគ្រឿងម៉ាក Honda Dream ពណ៌ខ្មៅ ពាក់ស្លាកលេខភ្នំពេញ 1KG-8807 ដោយឈ្មោះ ឃឿន សុធីម ភេទស្រី អាយុ៣៨ឆ្នាំ (រងរបួសធ្ងន់) រស់នៅភូមិតាព្រហ្ម ឃុំកំពង់អុក ស្រុកពញាឮ ខេត្តកណ្ដាល ដឹកប្អួនស្រី ឈ្មោះ ឃឿន ធីប អាយុ២៨ឆ្នាំ ភេទស្រី (ស្លាប់) រស់ នៅភូមិតាព្រហ្ម ឃុំកំពង់អុក ស្រុកពញាឮ ខេត្តកណ្ដាល។ ពេលមកដល់ចំនុចកើតហេតុ ភាគីខាងម៉ូតូបានឈប់រងចាំភ្លើងស្តុប ក៏ត្រូវរថយន្តប្រភេទដឹកទំនិញធុនធំបើកបរក្នុងល្បឿនលឿនជ្រុលទៅបុកពីក្រោយម៉ូតូជនរងគ្រោះទាំង២នាក់បណ្ដាលឲ្យស្លាប់បាត់បង់ជីវិតម្នាក់នឹងរងរបួសធ្ងន់ម្នាក់ត្រូវបាន បញ្ចូនទៅកាន់មន្ទីរពេទ្យភ្លាម។ ចំណែករថយន្តបង្កបាន បើករត់គេចខ្លួនចេញពីទីតាំងកើតហេតុបាត់ស្រមោល។

ក្រោយពេលកើតហេតុសមត្ថកិច្ចជំនាញនៃអធិការនគរបាលខាងព្រែកព្នៅចុះទៅដល់ទីតាំងកើតហេតុបានធ្វើការទំនាក់ទំនងទៅក្រុមគ្រួសារសាច់ញាតិមកទទួលយកសពជនរងគ្រោះយកទៅធ្វើបុណ្យតាមប្រពៃណី។ ចំណែករថយន្តបង្កសមត្ថកិច្ចជំនួយកំពុងធើ្វការស្រាវជ្រាវបន្ត៕ អត្ថបទ៖ ម៉េង