លោក មាន ចាន់យ៉ាដា ត្រូវបានប្រកាសជាប្រធានគណៈកម្មាធិការគណបក្សប្រជាជនកម្ពុជាខេត្តឧត្តរមានជ័យ

នាព្រឹកថ្ងៃទី១៣ ខែកក្កដា ឆ្នាំ២០២៤នេះ សម្ដេចវិបុលសេនាភក្តី សាយ ឈុំ អនុប្រធានគណបក្សប្រជាជនកម្ពុជាបានអញ្ជើញជាអធិបតីពិធីប្រកាសផ្លាស់ប្ដូរប្រធានគណៈកម្មាធិការគណបក្សប្រជាជនកម្ពុជាខេត្តឧត្តរមានជ័យ ដោយលោក មាន ចាន់យ៉ាដា ជំនួសលោក ប៉ែន កុសល្យ។

ក្នុងពិធីនេះ ក៏មានវត្តមានចូលរួមរបស់លោក គន់ គីម សមាជិកគណៈអចិន្ត្រៃយ៍នៃគណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុមការងារថ្នាក់កណ្ដាលគណបក្សចុះជួយខេត្តឧត្តរមានជ័យ ព្រមទាំងថ្នាក់ដឹកនាំ មន្ត្រីនៃគណបក្សជុំវិញខេត្តឧត្តរមានជ័យជាច្រើនរូបទៀត។

លោក មាន ចាន់យ៉ាដា ដែលត្រូវបានប្រកាសជាប្រធានគណៈកម្មាធិការគណបក្សប្រជាជនកម្ពុជាខេត្តឧត្តរមានជ័យនា ពេលនេះ បានឡើងប្តេជ្ញាយកអស់កម្លាំងកាយចិត្ត បញ្ញាស្មារតី សមត្ថភាព និងលទ្ធភាពគ្រប់បែបយ៉ាង ដើម្បីអនុវត្តឱ្យបានសម្រេចតាមគោលការណ៍ណែនាំរបស់គណបក្ស។

លោក មាន ចាន់យ៉ាដា បានសម្ដែការគោរពដឹងគុណចំពោះសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា ដែលបានផ្តល់កិត្តិយសដ៏ថ្លៃថ្លាបំផុត ជឿជាក់ទុកចិត្ត ប្រគល់ភារកិច្ចទទួលខុសត្រូវដល់លោក ជាប្រធានគណៈកម្មាធិការគណបក្សខេត្តឧត្តរមានជ័យ។ ទន្ទឹមនេះ លោក មាន ចាន់យ៉ាដាក៏បានអរគុណចំពោះសម្ដេចវិបុលសេនាភក្តី សាយ ឈុំ អនុប្រធានគណបក្សប្រជាជនកម្ពុជា ដែលបានលះបង់ពេលវេលាដ៏មាញឹកអញ្ជើញជាអធិបតីដ៏ខ្ពង់ខ្ពស់ ក្នុងពិធីប្រកាសផ្ទេរមុខតំណែងប្រធានគណៈកម្មាធិការគណបក្សខេត្តឧត្តរមានជ័យ នាថ្ងៃនេះផងដែរ៕