ព័ត៌មានជាតិ

សមាជិក ប.ស.ស ចំនួន ៣២០ នាក់ ហើយ បានដាក់ឯកសារស្នើសុំប្រាក់សោធន

បានផុស

៨ ខែ មុន

នៅ

ថ្ងៃអាទិត្យ ១៤ កក្កដា ២០២៤

ដោយ

លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស និងជាអ្នកនាំពាក្យរង នៃក្រសួងការងារ និងបណ្តុះបណ្តាលវិជ្ជាជីវៈ តំណាង លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិសន្តិសុខសង្គម បានឱ្យដឹងថា សមាជិក ប.ស.ស. សរុបចំនួន ៣២០ នាក់ហើយដែលបានដាក់ឯកសារស្នើសុំប្រាក់សោធន ក្នុងនោះ សមាជិក ប.ស.ស. ជាស្ត្រីមានចំនួន ១២០ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិត បានបន្តថា ក្នុងចំណោមសមាជិក ប.ស.ស. ចំនួន ៣២០ នាក់ ក្នុងនោះមានសមាជិក ប.ស.ស. សរុបចំនួន ១២ នាក់ បានក្លាយជាសោធនិកដំបូងគេ ដែលនឹងទទួលបានអត្ថប្រយោជន៍របបសន្តិសុខសង្គមផ្នែកប្រាក់សោធន (ប្រាក់ចូលនិវត្តន៍ ឬប្រាក់រ៉ឺត្រែត) ពី ប.ស.ស. គិតត្រឹមថ្ងៃទី ១២ ខែកក្កដា ឆ្នាំ ២០២៤។

លោកបណ្ឌិត បានបញ្ជាក់ទៀតថា ក្នុងចំណោមសោធនិកទាំង ១២ នាក់ខាងលើ មានសោធនិកចំនួន ៣ រូប ទទួលបានប្រាក់សោធនជរាភាពអយ្យកប្បញ្ញត្តិ, ៤ រូប ទទួលបានប្រាក់សោធនជរាភាព, និង ៥ រូបទៀត ទទួលបានវិភាជន៍ជរាភាព។

លោក គង់ រ៉ន អាយុ ៦២ ឆ្នាំ បម្រើការងារនៅក្នុងក្រុមហ៊ុនឯកជនមួយកន្លែង ដែលជាសោធនិកម្នាក់ ក្នុងចំណោមសោធនិកជាច្រើននាក់ផ្សេងទៀត ដែលបានមកចុះឈ្មោះស្នើសុំប្រាក់សោធននៅទីស្នាក់ការកណ្តាល ប.ស.ស. រាជធានីភ្នំពេញ បានបង្ហាញអារម្មណ៍រំភើប និងសប្បាយរីករាយខ្លាំងណាស់ ដែលលោកអាចទទួលបានប្រាក់សោធន (ប្រាក់រ៉ឺត្រែត) ពី ប.ស.ស.។

លោកបានបន្តថា លោកមិនធ្លាប់នឹកស្មានថាមានថ្ងៃនេះឡើយ ព្រោះធ្លាប់តែឮថា ទាល់តែមន្ត្រីរាជការទើបអាចមានប្រាក់សោធន (ប្រាក់រ៉ឺត្រែត) នេះ។ លោកថា នេះជាប្រវត្តិសាស្ត្រថ្មីមួយ ដែលមិនធ្លាប់មាននោះឡើយ គឺមានតែក្នុងសម័យសន្តិភាព ដែលខិតខំកសាង ការពារ និងរក្សាដោយ សម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងបន្តកសាង ការពារ និងដឹកនាំដោយ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា តែប៉ុណ្ណោះ ដែលប្រជាពលរដ្ឋបម្រើការងារក្នុងវិស័យឯកជនក៏អាចទទួលបានប្រាក់សោធន (ប្រាក់រ៉ឺត្រែត) ដូចទៅនឹងមន្ត្រីរាជការដែរ។

គួរបញ្ជាក់ថា ដើម្បីអាចស្នើសុំប្រាក់សោធនជរាភាព (ប្រាក់ចូលនិវត្តន៍ ឬប្រាក់រ៉ឺត្រែត) សមាជិក ប.ស.ស. ត្រូវបំពេញលក្ខខណ្ឌកំណត់មួយចំនួនរួមមាន ៖ (១)- បានចុះបញ្ជីនៅ ប.ស.ស. ផ្នែកប្រាក់សោធន (២)- បានបង់ភាគទានមក ប.ស.ស. បានយ៉ាងតិច ១២ ខែ និង (៣)- ត្រូវមានអាយុយ៉ាងតិច ៦០ ឆ្នាំ និងត្រូវភ្ជាប់ឯកសារសំខាន់ៗ មួយចំនួន រួមមាន ៖ (១)- ប័ណ្ណសមាជិក ប.ស.ស. ច្បាប់ដើម (២)- អត្តសញ្ញាណប័ណ្ណសញ្ជាតិខ្មែរច្បាប់ដើម (មានសុពលភាព) ឬលិខិតឆ្លងដែន (ជនបរទេស) (៣)- សេចក្តីចម្លងសំបុត្រអាពាហ៍ពិពាហ៍ និងសេចក្តីចម្លងបញ្ជាក់សំបុត្រកំណើតកូន (បើមាន) និង (៤)- ត្រូវមានលេខគណនីធនាគារអេស៊ីលីដា ឬលេខគណនីធនាគារកាណាឌីយ៉ា។

សូមរំលឹកថា គិតត្រឹមថ្ងៃទី ១៨ ខែមិថុនា ឆ្នាំ ២០២៤ បេឡាជាតិសន្តិសុខសង្គមមានសមាជិកចំនួន ២,២ លាននាក់ ក្នុងចំណោមនោះ សមាជិក ប.ស.ស. ជាបុគ្គលស្ថិតក្រោមវិស័យសាធារណៈជាង ៤៣ ម៉ឺននាក់ បុគ្គលស្ថិតក្រោមបទប្បញ្ញត្តិច្បាប់ស្តីពីការងារជាង ១,៥ លាននាក់ និងបុគ្គលស្វ័យនិយោជន៍ ២២ ម៉ឺននាក់ ព្រមទាំងអ្នកក្នុងបន្ទុកសមាជិក ប.ស.ស ៦,៦ ម៉ឺននាក់ ដែលកំពុងមានសិទ្ធិទទួលបានអត្ថប្រយោជន៍ នៃរបបសន្តិសុខសង្គម៕

អត្ថបទ ៖ សំអឿន