ព័ត៌មានជាតិ

អ្នកជំនាញអប់រំ ៖ គ្រូបង្រៀន ត្រូវសម្លឹងមើលអនាគតកុមារ និងយុវជន ឱ្យឆ្ងាយជាងថ្នាក់រៀន ទើបសង្គមជាតិរីកចម្រើនទៅមុខ

បានផុស

៧ ខែ មុន

នៅ

ថ្ងៃចន្ទ ១៥ កក្កដា ២០២៤

ដោយ

លោកឧកញ៉ា ប៉ិច បូឡែន អគ្គនាយកបណ្ដាញគ្រឹះស្ថានអប់រំ វេសឡាញ អេឌ្យូខេសិន គ្រុប បានអះអាងថា គ្រូបង្រៀនត្រូវសម្លឹងមើលអនាគតរបស់កុមារ និងយុវជន ឱ្យឆ្ងាយជាងថ្នាក់រៀន ទើបធ្វើឱ្យសង្គមជាតិមានការរីកចម្រើនទៅមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកិច្ចប្រជុំបូកសរុបការងារឆ្នាំសិក្សា ២០២៣-២០២៤ និងការលើកទិសដៅផែនការអភិវឌ្ឍឆ្នាំសិក្សា ២០២៤-២០២៥ នៅវិទ្យាស្ថានជាតិអប់រំ កាលពីថ្ងៃទី ១៣ កក្កដា លោកឧកញ៉ា ប៉ិច បូឡែន បានណែនាំដល់គ្រូបង្រៀន និងបុគ្គលិក ត្រូវប្រកាន់នូវទំនួលខុសត្រូវ និងគិតឱ្យបានវែងឆ្ងាយ ដើម្បីកែច្នៃធនធានមនុស្សរបស់យើងឱ្យក្លាយជាធនធានដ៏មានសក្ដានុពលសម្រាប់អភិវឌ្ឍន៍ប្រទេសជាតិកាន់តែរីកចម្រើន។

លោកឧកញ៉ា ប៉ិច បូឡែន សូមអរគុណលោកគ្រូអ្នកគ្រូ និងបុគ្គលិកអប់រំ ដែលបានបំពេញតួនាទីបានយ៉ាងល្អក្នុងការចូលរួមអភិវឌ្ឍន៍កុមារ និងយុវជនរបស់យើងសម្រាប់សង្គមជាតិបានយ៉ាងល្អប្រសើរ និងរីកចម្រើនទៅមុខ។

លោកឧកញ៉ា ប៉ិច បូឡែន បានបន្តទៀតថា នៅប្រទេសណាក៏ដោយ ការអប់រំមានសារៈសំខាន់ណាស់ហើយ មកដល់ពេលនេះគ្រប់គ្នាទាំងអស់ទទួលបានលទ្ធផលជីវិតបែបណា ទាំងការងារ ទាំងក្រុមគ្រួសារ ក៏អាស្រ័យលើការអប់រំពីមុនមកដែរ គ្រាន់តែការអប់រំខ្លះចេញពីសាលារៀន ខ្លះទៀតចេញពីបរិយាកាសនៅជុំវិញខ្លួនយើង ក្រុមគ្រួសារ និងមិត្តភ័ក្ដិ។ ដូចនេះមិនមាននរណាម្នាក់មានការរីកចម្រើន ហើយមិនឆ្លងកាត់ការអប់រំនោះទេ។

លោកឧកញ៉ា ប៉ិច បូឡែន បានជំរុញដល់លោកគ្រូអ្នកគ្រូ ត្រូវធ្វើជាគំរូសម្រាប់កុមារ និងយុវជន ដើម្បីពួកគេទទួលបានការអប់រំល្អ និងទៅតាមអ្វីដែលយើងទាំងអស់គ្នាចង់បាន។ ព្រោះថាប្រទេសកម្ពុជាជាប្រទេសកំពុងអភិវឌ្ឍន៍ ដែលទាមទារឱ្យលោកគ្រូអ្នកគ្រូ ត្រូវចូលរួមបន្ថែម។ បើឃើញចំណុចណាមួយមិនល្អ គួរនាំគ្នាជួយកែលំអចំណុចទាំងនោះឱ្យបានល្អប្រសើរ កុំនាំគ្នារិះគន់ដោយមិនបានធ្វើអ្វីសោះដូចជាបញ្ហាចរាចរណ៍ បរិស្ថាន ឬដាំដើមឈើជាដើម ព្រោះថាចង់បានសង្គមមួយដែលស្រស់ស្អាត សូមកុំបង្កើតបញ្ហាក្នុងសង្គម ត្រូវនាំគ្នាជួយសង្គម ទើបប្រទេសជាតិមានការរីកចម្រើន៕

អត្ថបទ ៖ សំអឿន