ជាថ្មីម្ដងទៀត អភិបាលខេត្តកណ្ដាល ប្រាប់អ្នកហែរទីងមោងឱ្យរក្សាសណ្ដាប់ធ្នាប់

អភិបាលខេត្តកណ្ដាល បានអះអាងជាថ្មីថា រដ្ឋបាលខេត្តមិនមានការហាម ឬបិទមិនឱ្យហែរទីងមោងឡើយ តែត្រូវរក្សាឱ្យបានសណ្ដាប់ធ្នាប់សាធារណៈ និងរក្សារចនាបទទីងមោងជារបស់ខ្មែរ។

លោក គួច ចំរើន អភិបាលខេត្តកណ្ដាល បានបញ្ជាក់ច្បាស់ថា មិនមានការបិទហែរទីងមោងឡើយ តែលោកអភិបាលខេត្ត បានលើកទឹកចិត្តដល់អ្នកគ្រប់គ្រងទីងមោងទាំងអស់ សូមរក្សារបៀបរៀបរយ សណ្តាប់ធ្នាប់សាធារណៈ និងតុបតែងទីងមោងឱ្យបានស្អាត ដោយរក្សានូវវប្បធម៌ប្រពៃណីខ្មែរ ដើម្បីឈានដល់ការប្រឡងប្រណាំងនាថ្ងៃខាងមុខ។

ការបញ្ជាក់ច្បាស់ៗ និងលើកទឹកចិត្តបែបនេះ នៅក្នុងឱកាសដែលលោកអភិបាលខេត្ត បានអញ្ជើញដឹកនាំកិច្ចប្រជុំពិនិត្យ ពិភាក្សាលើបញ្ហាប្រឈមផ្សេងៗនៃការហែរទានព្រះវស្សា អមដោយការហែរទីងមោងនេះ សំដៅធ្វើយ៉ាងណាឱ្យមានសណ្តាប់ធ្នាប់ របៀបរៀបរយ និងដើម្បីរក្សាគុណតម្លៃសិល្បៈវប្បធម៌របស់ខ្មែរ ជាមួយព្រះគ្រូអនុគណស្រុក ចៅអធិការវត្ត ព្រះសង្ឃ គណៈកម្មការ និងអ្នកគ្រប់គ្រងទីងមោង ក្នុងភូមិសាស្ត្រស្រុកស្អាង នារសៀលថ្ងៃទី១៤ ខែកក្កដា ឆ្នាំ២០២៤ នៅសាលាស្រុកស្អាង។

ជាមួយគ្នានេះ លោកអភិបាលខេត្ត ក៏បានណែនាំក្រុមការងារថ្នាក់ខេត្ត និងអ្នកពាក់ព័ន្ធ ត្រូវសិក្សាឱ្យបានច្បាស់អំពីប្រវត្តិ និងរចនាបថរបស់ទីងមោង ដើម្បីចងក្រងទុកជាឯកសារ ជៀសវាងការរចនារូបទីងមោងដែលប្រាសចាកពីទម្រង់ និងរចនាបថរបស់ខ្មែរ៕