បុរស២នាក់ បើកបរក្នុងស្ថានភាពស្រវឹងបុកបង្គោលភ្លើង ក្រឡាប់រថយន្តរងរបួសស្រាល

បុរស២នាក់ បើកបររថយន្តទាំងស្ថានភាពស្រវឹងហើយជ្រុលទៅបុកបង្គោលភ្លើងនៅតាមបណ្តោយផ្លូវជាតិ៤៨ ឃុំប៉ាក់ខ្លង ស្រុកមណ្ឌលសីមា ខេត្តកោះកុង។

លោក ស្រុង ណារិទ្ឋ អធិការរងនគរបាលស្រុកមណ្ឌលសីមា បានឲ្យដឹងនៅរសៀលថ្ងៃទី១៥ ខែកក្កដា នេះថា ករណីគ្រោះថ្នាក់ចរាចរណ៍រថយន្តបើកក្រលាប់ដោយខ្លួនឯង និងបុកបង្គោលនេះ ស្ថិតនៅត្រង់ចំណុចជិតផ្ទះកាប់គោភូមិនាងកុក ឃុំប៉ាក់ខ្លង ស្រុកមណ្ឌលសីមា ខេត្តកោះកុង កាលពីល្ងាចនៅថ្ងៃទី១៤ ខែកក្កដាឆ្នាំ២០២៤។

លោកអធិការរងនគរបាលស្រុក បន្ថែមថា ជនបង្កជាអ្នកបើកបររថយន្ត ឈ្មោះ ហេង សារឿន អាយុ៦០ឆ្នាំ ជនជាតិខ្មែរ រស់នៅភូមិចាំយាម ឃុំប៉ាក់ខ្លង ស្រុកមណ្ឌលសីមា ខេត្តកោះកុង(ពុំមានរបួស) និងអ្នករួមដំណើរឈ្មោះ ពូ ទឹង ភេទប្រុស អាយុ៤៥ឆ្នាំ  ជនជាតិខ្មែររស់នៅភូមិចាំយាម ឃុំប៉ាក់ខ្លង ស្រុកមណ្ឌលសីមា ខេត្តកោះកុងរបួសដៃស្រាល។

មូលហេតុដែលបង្កឲ្យមានគ្រោះចរាចរណ៍ខាងលើដោយសារម្ចាស់រថយន្តម៉ាក Kear morning ចង្កូតស្តាំ ពណ៍ទឹកក្រូច ស្លាកលេខ PP 0695 បេីកបរពីលិច ទៅកើតក្នុងល្បឿនយ៉ាងលឿន លុះមកដល់ចំណុចកើតហេតុបានវ៉ារថយន្ត១គ្រឿងតែវ៉ាមិនផុតក៏ជ្រុលទៅបុកជាមួយបង្គោលភ្លើងបណ្តាលរថយន្តក្រឡាប់ដោយខ្លួនឯងទាំងស្ថានភាពស្រវឹង។

កម្លាំងជំនាញ ក៏ត្រូវម្ចាស់ឡានហៅឡានស្ទូច ស្ទូចឡានយកទៅជួសជុល ចំណែកឯបង្កោលភ្លើងដែលត្រូវឡានបុកបណ្តាលអោយខូចខាត ខាងមន្ត្រីពាក់ព័ន្ធ និងម្ចាស់រថយន្តបានទាក់ទង់គ្នារួចរាល់ហើយ៕

អត្ថបទ៖ សិរីវឌ្ឍនៈ