រដ្ឋបាលខេត្តកំពង់ចាម គ្រោងរៀបចំពិធីតាំងពិព័រណ៌ ប្រគុំតន្ត្រីពេញមួយសប្ដាហ៍ដើម្បីអបអរសាទរពិធីបើកការដ្ឋានព្រែកជីកហ្វូណនតេជោ

ដើម្បីចូលរួមជាមួយរាជរដ្ឋាភិបាល និងប្រជាពលរដ្ឋខ្មែរនៅទូទាំងប្រទេសដែលបានគាំទ្រ និងសាទរយ៉ាងក្លៀវក្លាបំផុត ចំពោះគម្រោងព្រែកជីកំហ្វូណនតេជោ និងដើម្បីចូលរួមអបអរសាទរក្នុងព្រឹត្តិការណ៍ជាប្រវត្តិសាស្ត្រនៃការបើកការដ្ឋាន សាងសង់ព្រែកជីកហ្វូណនតេជោ ដែលនឹងប្រព្រឹត្តទៅនាថ្ងៃទី៥ ខែសីហា ឆ្នាំ២០២៤ ខាងមុខនេះ លោក អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានធ្វើការណែនាំដល់រដ្ឋបាលខេត្ត រៀបចំឱ្យមានការតាំងពិព័រណ៍ ប្រគុំតន្ត្រីខ្នាតយក្សរយៈ​ពេលមួយសប្តាហ៍ និងការអុជកាំជ្រួច នាវេលាម៉ោង១៩:០០នាទីយប់។

មានប្រសាសន៍នៅក្នុងឪកាសអញ្ជើញដឹក​នាំកិច្ចប្រជុំត្រួតពិនិត្យរបាយការណ៍សមិទ្ធផលរបស់រដ្ឋបាលខេត្ត ដែលរៀបចំឡើងនៅសាលប្រជុំសាលាខេត្តកំពង់​ចាម នាព្រឹកថ្ងៃទី១៦ ខែកក្កដា ឆ្នាំ២០២៤។ កិច្ចប្រជុំក៏មានការចូលរួមពីលោក អភិបាលរងខេត្ត លោកនាយករដ្ឋ​បាលសាលាខេត្ត លោកប្រធានការិយាល័យផែនការវិនិយោគ និងមន្ត្រីពាក់ព័ន្ធជាច្រើនរូបទៀតផងដែរ។

លោកអភិបាលខេត្ត មានប្រសាសន៍បន្តថា ការរៀបចំឱ្យមានការតាំងពិព័រណ៍ ប្រគុំតន្ត្រីខ្នាតយក្ស និងការអុជកាំជ្រួច គឺដើម្បីបង្កលក្ខណៈសប្បាយរីករាយជូនប្រជាពលរដ្ឋ និងបង្ហាញពីការគាំទ្រ និងសាទរយ៉ាងក្លៀវក្លាបំផុតពីប្រជាពលរដ្ឋខេត្តកំពង់ចាម ចំពោះគម្រោងព្រែកជីកហ្វូណនតេជោ ដែលជា «គម្រោងរបស់ខ្មែរ បម្រើផលប្រយោជន៍ខ្មែរ និងជាមរតដ៏មហាសាលតជំនាន់» ក៏ដូចជាការបង្ហាញអំពីចលនាជាតិដ៏ខ្លាំងក្លា រួមសាមគ្គី និងមនសិការជាតិខ្មែរទាំងមូលដ៏រឹងមាំ ក្រោមម្លប់នៃសន្តិភាព៕

អត្ថបទ​៖​ ឡេក​ ចាន់ពេជ្រ