សម្តេច ម៉ែន សំអន ចូលរួមសោកស្តាយ និងរួមរំលែកទុក្ខក្រោយទទួលដំណឹងឯកឧត្តម សំ សារីន ទទួលមរណភាព

សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា បានចូលរួមសោកស្តាយ និងរួមរំលែកទុក្ខក្រោយពីទទួលដំណឹងថា ឯកឧត្តម សំ សារីន ទទួលមរណៈភាព។ សម្តេចកិត្តិសង្គហបណ្ឌិត ម៉ែន សំអន ចូលរួមរំលែកទុក្ខបែបនេះ ខណៈអញ្ជើញចូលរួមបុណ្យសពឯកឧត្តម សំ សារីន ផ្ទាល់នៅក្នុងក្រុងកំពត ខេត្តកំពត នាព្រឹកថ្ងៃថ្ងៃពុធ ១២កើត ខែអាសាឍ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី១៧ ខែកក្កដា ឆ្នាំ២០២៤។

ឯកឧត្តម សំ សារីន ប្រធានក្រុមប្រឹក្សាខេត្តកែប បានទទួលមរណភាពកាលពីថ្ងៃអាទិត្យ ទី១៤ ខែកក្កដា ឆ្នាំ២០២៤ វេលាម៉ោង៣:០០នាទីទៀបភ្លឺ ក្នុងជន្មាយុ៧៣ឆ្នាំ ដោយរោគាពាធ។

មរណភាពរបស់ឯកឧត្តម សំ សារីន គឺជាការបាត់បង់គួរឱ្យសោកស្តាយបំផុតនូវឧត្តមស្វាមី ឪពុក ជីតា ប្រកបដោយព្រហ្មវិហារធម៌ជាទីគោរពស្រលាញ់បំផុតរបស់កូន ចៅ ក៏ដូចជាការបាត់បង់នូវឥស្សរជនមួយរូបដែល បានខិតខំលះបង់អស់កម្លាំងកាយ ចិត្ត ប្រាជ្ញា ស្មារតី និងពេលវេលា ដើម្បីបម្រើឧត្តមប្រយោជន៍ជាតិមាតុភូមិ ជាពិសេស បានចូលរួមចំណែកជាមួយរាជរដ្ឋាភិបាលក្នុងការកសាងសមិទ្ធផលជាច្រើនទាំងក្នុងវិស័យពុទ្ធចក្រ និង អាណាចក្រនៅទូទាំងខេត្តកែប នាពេលកន្លងមក។

សម្តេចកិត្តិសង្គហបណ្ឌិត ក៏បានចូលរួមរំលែកមរណទុក្ខជាមួយ លោកជំទាវ ប៉ែន ឌីមឿន ព្រមទាំងក្រុមគ្រួសារសព និងបានឧទ្ទិសបួងសួងដល់ដួងវិញ្ញាណក្ខន្ធរបស់ ឯកឧត្តម សំ សារីន សូមបានចាប់កំណើតក្នុងឋានបរមសុខកុំបីឃ្លៀងឃ្លាតឡើយ៕

អត្ថបទ៖ វិមាន