លោក ប្រាក់ សោភ័ណ ប្រាប់ស្នងការកុំឱ្យបន្ធូរ​ដៃ​បង្រ្កាបក្មេងទំនើងកាប់ចាក់ និងក្មេងជក់បារីអេឡិចត្រូនិចនៅក្នុងខេត្តសៀមរាប

បញ្ហាក្រុមក្មេងទំនើងកាប់កាក់ ក្មេងជក់បារីអេឡិចត្រូនិច ក៏ដូចជាបញ្ហាគ្រឿងញៀន នៅតែជាបញ្ហាក្តៅសម្រាប់លោក ប្រាក់ សោភ័ណ្ឌ អភិបាលខេត្តសៀមរាប។ លោកបានប្រាប់ទៅស្នងការខេត្ត និងអាជ្ញាធរពាក់ព័ន្ធនៅក្នុងខេត្ត ត្រូវបន្តកុំបន្ធូរដៃបង្រ្កាប និងទប់ស្កាត់បញ្ហាសង្គមទាំងនេះឱ្យមានប្រសិទ្ធភាព។ អភិបាលខេត្តសៀមរាប បានលើកឡើងពីបញ្ហាទាំងនេះ នៅក្នុងកិច្ចប្រជុំគណៈបញ្ជាការឯកភាពរដ្ឋបាលខេត្តកាលពីថ្ងៃទី១៦ ខែកក្កដា កន្លងទៅ។

​លោក ប្រាក់​ សោភ័ណ​ បានជំរុញដល់ស្នងការនគរបាលខេត្ត​ និងអភិបាលក្រុង​ ស្រុកទាំងអស់ត្រូវជំរុញការផ្សព្វផ្សាយអំពីគោលនយោបាយភូមិ​ ឃុំ​ សង្កាត់មានសុវត្ថិភាព​ និងច្បាប់ចរាចរណ៍ឱ្យប្រជាពលរដ្ឋគ្រប់ៗគ្នា​ ពិសេស សិស្សានុសិស្ស។ លោក​ អភិបាល​ខេត្ត​ ក៏បានណែនាំបន្ថែមដល់ក្រុមការងារពាក់ព័ន្ធទាំងអស់​ត្រូវរៀបចំសណ្តាប់ធ្នាប់​ឱ្យបានរៀបរយ​ និងត្រូវរៀបចំធុងសំរាមនៅតាមទីសាធារណៈ​ ពិសេស ធុងសំរាមធំ​ៗ​ ដើម្បីឱ្យប្រជាពលរដ្ឋយកទៅទុកដាក់​ ឲ្យមានរបៀបរៀបរយស័ក្តិសមជាទីក្រុងទេសចរណ៍ ហើយឲ្យក្រុមការងារប្រមូលសំរាមមានភាពងាយស្រួលប្រមូលផងដែរ។ លោក ប្រាក់​ សោភ័ណ បានសង្កត់ធ្ងន់ឲ្យសមត្ថកិច្ចបន្តធ្វើការបង្ក្រាប​ ទប់ស្កាត់ក្រុមក្មេងទំនើង​ដែលកាប់ចាក់គ្នាបង្កបញ្ហាដល់សង្គម ក្រុមជក់បារីអេឡិចត្រូនិច​ និងគ្រឿងញៀន​ឲ្យដូចភ្លៀងរលឹម។

បន្ថែមលើនេះ លោក​អភិបាលខេត្ត​ បានបញ្ចាក់ថា ផែនការបន្ទាប់ គឺរដ្ឋបាលគ្រោងនឹងរៀបចំតំបន់ទេសចរណ៍តាមដងស្ទឹងសៀមរាប​ និងតំបន់មួយចំនួនទៀតក្នុងក្រុង​ ដើម្បីជាការទាក់ទាញភ្ញៀវទេសចរមកកម្សាន្តនៅខេត្តសៀមរាប។​ ម្យ៉ាងទៀត​ រដ្ឋបាលខេត្ត នឹងធ្វើការដាំដើមឈើតាមខ្សែផ្លូវនីមួយៗបន្ថែមទៀត​ ដើម្បីជាការលើកកម្ពស់សោភ័ណភាព​ និងឱ្យក្រុងសៀមរាបមានភាពបៃតង៕

ដោយ៖ គឿនវេត