កម្ពុជាបណ្ដេញជនជាតិចិនម្នាក់ចេញពីប្រទេស ក្រោយសិង្ហបុរីផ្តន្ទាទោសដាក់ពន្ធនាគារពីបទសម្អាតប្រាក់

កាលពីថ្ងៃអង្គារ ទី១៦ ខែកក្កដា ឆ្នាំ២០២៤ នេះ ក្រសួងមហាផ្ទៃកម្ពុជា តាមរយៈអគ្គនាយកដ្ឋានអន្តោប្រវេសន៍ បានបណ្ដេញជនជាតិចិនម្នាក់ ឈ្មោះ ZHANG RUIJIN កាន់លិខិតឆ្លងដែនប្រទេស Saint Kitts and Nenis ចេញពីប្រទេសកម្ពុជា បន្ទាប់ពីជនជាតិចិនរូបនេះ  ត្រូវបានតុលាការប្រទេសសិង្ហបុរីផ្តន្ទាទោសដាក់ពន្ធនាគារពីបទសម្អាតប្រាក់ និងបញ្ជូនមកកាន់ប្រទេសកម្ពុជា។

តាមការចុះផ្សាយរបស់សារព័ត៌មាននានា ជនជាតិចិនឈ្មោះ ZHANG RUIJIN រូបនេះ ស្ថិតក្នុងចង្កោមឧក្រិដ្ឋជន១០នាក់ ដែលឃាត់ខ្លួនកាលពីឆ្នាំ២០២៣ គ្រាដែលសិង្ហបុរីបើកប្រតិបត្តការខ្នាតធំបង្ក្រាបករណីលាងលុយកខ្វក់។ ករណីមួយនេះ សិង្ហបុរី ដកហូតទ្រព្យសម្បត្តិ និងលុយសុទ្ធជាង ៣ពាន់លានដុល្លារសិង្ហបុរី។ នៅឆ្នាំ២០២៤ ក្នុងខែមេសា និងឧសភា ទើបតុលាការសិង្ហបុរីផ្ដន្ទាទោសឧក្រិដ្ឋជន៧នាក់ ក្នុងចំណោម១០នាក់។ ក្រោយផ្ដន្ទាទោសជនជាតិចិនទាំងនេះរួចរាល់ ក្រោយមកនៅថ្ងៃទី១៥ ខែមិថុនា សិង្ហបុរីបានបណ្ដេញឧក្រិដ្ឋមួយចំនួនមកកាន់កម្ពុជា ដោយផ្អែកលើច្បាប់អនុញ្ញាតស្តីពីជនបរទេសនៅសិង្ហបុរីដោយផ្អែកលើលិខិតឆ្លងដែនដែលមានសុពលភាពរបស់រូបជនបរទេសនោះ។

ក្រោយសិង្ហបុរីបញ្ជូនមកដល់កម្ពុជា សមត្ថកិច្ចកម្ពុជានៅថ្ងៃទី១៥ ខែមិថុនា ឆ្នាំ២០២៤ ក៏ឃាត់ខ្លួន ព្រមទាំងបានរៀបចំនីតិវីធីជាបន្តបន្ទាប់ រួចក៏បានធ្វើការបណ្តេញចេញពីកម្ពុជា នៅថ្ងៃទី១៦ ខែកក្កដា ឆ្នាំ២០២៤ តាមប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិភ្នំពេញ។

គួរជម្រាបជូនថា រយៈពេល១០ឆ្នាំចុងក្រោយ រាប់ចាប់ពីឆ្នាំ២០១៤ ដល់ឆ្នាំ២០២៤​ នេះ កម្ពុជា បានបណ្ដេញជនបរទេសចេញពីប្រទេសកម្ពុជាជិត៣ម៉ឺននាក់ មកពីជាង១០០សញ្ជាតិផ្សេងគ្នា។ ក្នុងចំណោមជនបរទេស ដែលកម្ពុជាបណ្ដេញចេញពីប្រទេស គឺមានជនជាតិវៀតណាមច្រើនជាងគេ៕

ដោយ៖ ង៉ិល ណារ៉ាត់