ព័ត៌មានជាតិ

ប្រធានផ្សារទួលទំពូង ប្ដេជ្ញាអនុវត្តឲ្យបានត្រឹមត្រូវចំពោះការយកថ្លៃភាស៊ីផ្ញើ កង់ ម៉ូតូ ឬ រថយន្ត តាមសៀវភៅបន្ទុករបស់រដ្ឋ

បានផុស

៩ ខែ មុន

នៅ

ថ្ងៃពុធ ១៧ កក្កដា ២០២៤

ដោយ

លោកប្រធានគណៈកម្មការគ្រប់គ្រងផ្សារទួលទំពូង បានប្ដេជ្ញាអនុវត្តឲ្យបានត្រឹមត្រូវចំពោះការយកតម្លៃភាស៊ីផ្ញើ កង់ ម៉ូតូ ឬ រថយន្ត តាមសៀវភៅបន្ទុករបស់រដ្ឋ ដើម្បីមានប្រសិទ្ធភាព និងមិនលើកលែងចំពោះភ្នាក់ងារភាស៊ីណាយកលើសសៀវបន្ទុក នឹងចាត់ការតាមច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ចំរើន សុខលីម ប្រធានគណៈកម្មការគ្រប់គ្រងផ្សារទួលទំពូង បានប្រាប់ឲ្យ កម្ពុជាថ្មី ដឹងថា កិច្ចការងារនេះ លោកតែងបានកោះហៅភ្នាក់ងារ និងក្រុមហ៊ុន ទទួលភាស៊ីផ្ញើ កង់ ម៉ូតូ ឬ រថយន្ត នៅជុំវិញផ្សារ មកធ្វើការអប់រំណែនាំជារឿយៗ បំផុត លើការយកតម្លៃពីប្រជាពលរដ្ឋឲ្យស្របតាមសៀវភៅបន្ទុករបស់រដ្ឋ។

លោក ចំរើន សុខលីម បន្តថា ក្រៅតែពីការអប់រំ លោកក៏ព្រមានចាត់វិធានការផងដែរ លើបុគ្គលជាភ្នាក់ងារទទួលបញ្ញើទាំងឡាយណាដែលអនុវត្តផ្ទុយពីការណែនាំ ពិសេសការទាមទារកំណត់តម្លៃពីភ្ញៀវ លើសសៀវភៅបន្ទុក។ ប៉ុន្តែ ប្រសិនបើប្រជាពលរដ្ឋលោកជាអ្នកជូនតម្លៃលើស វាជាទឹកចិត្តអាណិតស្រលាញ់របស់ពួកគាត់។

ដោយឡែកប្រជាពលរដ្ឋដែលអញ្ជើញទៅទិញអីវ៉ាន់នៅផ្សារទួលទំពូង ក៏បានសម្ដែងការពេញចិត្ត និងគាំទ្រ ចំពោះការយកតម្លៃផ្ញើ កង់ ម៉ូតូ ចំនួន ២០០ រៀល ដល់ ៣០០ រៀល តាមសៀវភៅបន្ទុករបស់រដ្ឋ។

ប្រជាពលរដ្ឋខាងលើ បញ្ជាក់ថា ពេលហែកសំបុត្រផ្ញើរួច ភ្នាក់ងារភាស៊ីមិនបានទារលុយពីគាត់នោះទេ គឺពួកគាត់បានឲ្យតម្លៃផ្ញើម៉ូតូ ៥០០ រៀល តែម្ដង ដែលជាការពេញចិត្តផ្ដល់ទៅភ្នាក់ងារភាស៊ី ព្រោះនេះជាថវិកា និងទឹកចិត្តលើសបន្តិចបន្តួចប៉ុណ្ណោះ។

គួររំលឹកថា កន្លងទៅ លោក ឃួង ស្រេង អភិបាលរាជធានីភ្នំពេញ បានដាក់បទបញ្ជាទៅកាន់ប្រធានគណៈគ្រប់គ្រងផ្សាររដ្ឋទាំង ២៥ ក្នុងរាជធានីភ្នំពេញ ឲ្យពិនិត្យមើល និងត្រូវមានវិធានការជាចាំបាច់ ដោយមិនមានការលើកលែងនោះទេ ទៅលើក្រុមហ៊ុន និងភ្នាក់ងារភាស៊ីទាំងឡាយណា ដែលនៅតែបន្តការទទួលផ្ញើ កង់ ម៉ូតូ យកតម្លៃលើសពីសៀវភៅបន្ទុករបស់រដ្ឋ។ ករណីមានការទាមទារ ឬ ជំរិតទារប្រាក់ក្នុងតម្លៃច្រើនពីប្រជាពលរដ្ឋ នឹងត្រូវឃាត់ខ្លួនអនុវត្តទៅតាមផ្លូវច្បាប់ជាធរមាន៕

អត្ថបទ ៖ សុភា