ព័ត៌មានជាតិ

ភ្លៀងធ្លាក់ជាប់ៗ គ្នា បណ្ដាលឲ្យស្រុកចំនួន ០៣ រងផលប៉ះពាល់ពីជំនន់ទឹកភ្លៀង

បានផុស

៨ ខែ មុន

នៅ

ថ្ងៃពុធ ១៧ កក្កដា ២០២៤

ដោយ

ពាក់កណ្ដាលខែកក្កដា នេះ បន្ទាប់ពីភ្លៀងធ្លាក់ស្ទើររៀងរាល់ថ្ងៃ ខេត្តស្ទឹងត្រែង មានស្រុកចំនួន ០៣ ក្រុង ០១ ឃុំ ០៩ និងភូមិ ២១ បានរងផលប៉ះពាល់ពីជំនន់ទឹកភ្លៀង ដោយឡែក ផ្ទះ ០២ ខ្នង ក៏រងការខូចខាតពីខ្យល់កន្ត្រាក់ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក មែន គង់ នាយករដ្ឋបាលសាលាខេត្ត បានបញ្ជាក់ថា ស្រុកចំនួន ០៣ ដែលរងផលប៉ះពាល់ពីជំនន់ទឹកភ្លៀងមាន ៖ ស្រុកថាឡាបរិវ៉ាត់ ស្រុកសេសាន និងស្រុកបុរីអូស្វាយសែនជ័យ។ ក្នុងនោះ ក្រុងស្ទឹងត្រែង ទទួលរងការខូចខាតផ្ទះចំនួន ០២ ខ្នង ដោយសារឥទ្ធិពលខ្យល់កន្ត្រាក់ ធ្វើឲ្យដើមឈើដួលរលំសង្កត់លើលំនៅឋានប្រជាពលរដ្ឋ តែមិនបង្កគ្រោះថ្នាក់ដល់អាយុជីវិតមនុស្សឡើយ។

លោកនាយករដ្ឋបាល បញ្ជាក់បន្ថែមថា ក្នុងរយៈពេលភ្លៀងធ្លាក់ខ្លាំងប៉ុន្មានថ្ងៃនេះ នៅភូមិសាស្ត្រមួយចំនួន ក្នុងខេត្តស្ទឹងត្រែង បានទទួលរងផលប៉ះពាល់ បណ្ដាលឲ្យផ្លូវ ស្ពាន លូ និងលំនៅឋានប្រជាពលរដ្ឋរងផលប៉ះពាល់ផងដែរ។

លោកថា ក្នុងនោះ មានស្ពានឈើ ប្រវែង ៥៥ ម៉ែត្រ ក្នុងស្រុកបុរីអូស្វាយសែនជ័យ រងការបាក់ស្រុត និងផ្លូវប្រវែងជាង ២០ ម៉ែត្រ ក្នុងស្រុកថាឡាបរិវ៉ាត់ ត្រូវបានរងការខូចខាត។ រីឯផលដំណាំកសិកម្មរបស់ប្រជាពលរដ្ឋក្នុងស្រុកសេសាន មានការជន់លិចជាច្រើនហិតា ប៉ុន្តែមិនខូចខាតធ្ងន់ធ្ងរនោះទេ ដោយសារទឹកបានស្រកចុះវិញហើយ។

ពាក់ព័ន្ធនឹងមានភ្លៀងធ្លាក់ខ្លាំងបង្កឲ្យមានជំនន់ទឹកភ្លៀងតាមបណ្ដាស្រុកមួយចំនួន លោក ស៊ិន ឆាំ ប្រធានស្ថានីយជលសាស្ត្រស្ទឹងត្រែង បានឲ្យដឹងដែរថា កាលពីព្រឹកថ្ងៃទី ១៧ កក្កដា នេះ ទឹកទន្លេមេគង្គ មានកម្ពស់ ០៦ ម៉ែត្រ ២១ ទន្លេសេសានមានកម្ពស់ ០៤ ម៉ែត្រ ៣៧ និងទឹកទន្លេសេកុងមានកម្ពស់ត្រឹមតែ ០៥ ម៉ែត្រ ៨៨ មិនធ្វើឲ្យប្រជាពលរដ្ឋមានការព្រួយបារម្ភទេ៕

អត្ថបទ ៖ ងិន លីម