ព័ត៌មានជាតិ

ឯកឧត្ដម ហ៊ុន ម៉ានី កំពុងតាមដានយ៉ាងយកចិត្តទុកដាក់លើករណីបាត់ដានឧទ្ធម្ភាគចក្រមួយគ្រឿង នៅតំបន់ជួរភ្នំក្រវាញ ខណៈការរុករក ៥ ថ្ងៃហើយ

បានផុស

៨ ខែ មុន

នៅ

ថ្ងៃព្រហស្បតិ៍ ១៨ កក្កដា ២០២៤

ដោយ

ឯកឧត្ដម ហ៊ុន ម៉ានី ឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ បាននិងកំពុងតាមដានយ៉ាងយកចិត្តទុកដាក់លើករណីបាត់ដានទាក់ទងឧទ្ធម្ភាគចក្រមួយគ្រឿង នៅតំបន់ជួរភ្នំក្រវាញ ដែលមានរយៈពេល ៥ ថ្ងៃ មកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីយប់ថ្ងៃទី ១៧ ខែកក្កដា ឆ្នាំ ២០២៤ ឯកឧត្ដម ហ៊ុន ម៉ានី បានមានប្រសាសន៍ថា រយៈពេល ៥ ថ្ងៃហើយ ដែលឧទ្ធម្ភាគចក្រមួយគ្រឿងបានបាត់ដានទាក់ទងនៅតំបន់ជួរភ្នំក្រវាញ ខណៈពេលកំពុងហ្វឹកហ្វឺនការហោះហើរ។

ឯកឧត្ដម ហ៊ុន ម៉ានី មានប្រសាសន៍បន្តថា «ក្នុងនាមជាប្រជាជនខ្មែរមួយរូប ខ្ញុំ ពិតជាមានក្តីបារម្ភ ព្រមទាំងបាន និងកំពុងតាមដានយ៉ាងយកចិត្តទុកដាក់លើករណីនេះ»។

ឯកឧត្ដម ហ៊ុន ម៉ានី មានប្រសាសន៍បន្តទៀតថា ឯកឧត្ដម សូមយកឱកាសនេះ ចូលរួមជាមួយប្រជាជនកម្ពុជា ផ្ញើសារសាកសួរសុខទុក្ខជូនដល់កម្លាំងចម្រុះ នៃកងយោធពលខេមរភូមិន្ទ និងអ្នកពាក់ព័ន្ធទាំងអស់ ដែលកំពុងប្រឹងប្រែងបំពេញបេសកកម្មរុករកឧទ្ធម្ភាគចក្រមួយគ្រឿងនេះ ហើយសូមចូលរួមជាមួយគ្នា ក្នុងស្មារតី នៃប្រតិបត្តិការរុករកពីចម្ងាយ។

ជាមួយនេះ ឯកឧត្ដម ហ៊ុន ម៉ានី មានប្រសាសន៍បន្ថែមថា ឯកឧត្ដម សូមចូលរួមលើកទឹកចិត្ត និងសូមផ្ដាំផ្ញើដល់កងកម្លាំងទាំងអស់ សូមមានការប្រុងប្រយ័ត្នខ្ពស់ ខណៈអាកាសធាតុ និងស្ថានភាពភូមិសាស្ត្រនៅតំបន់នោះ កំពុងមានការលំបាក និងស្មុគស្មាញ និងសូមជូនពរឲ្យបេសកកម្មនេះទទួលបានជោគជ័យក្នុងពេលដ៏ខ្លីខាងមុខ។

សូមជម្រាបថា ឧទ្ធម្ភាគចក្រយោធាមួយគ្រឿង បានបាត់ការទាក់ទងពីទីបញ្ជាការទ័ពអាកាស ក្នុងភូមិសាស្ត្រជួរភ្នំក្រវាញ ខេត្តពោធិ៍សាត់ និង ខេត្តកោះកុង កាលពីថ្ងៃទី ១២ ខែកក្កដា ឆ្នាំ ២០២៤។

ចំពោះការរុករកឧទ្ធម្ភាគចក្រមួយគ្រឿង ដែលបាត់ដាននៅតំបន់ជួរភ្នំក្រវាញនេះ គិតត្រឹមថ្ងៃទី ១៧ ខែកក្កដា ឆ្នាំ ២០២៤ មានរយៈពេល ៥ ហើយ មិនទាន់មានដំណឹងនៅឡើយទេ។

ពាក់ព័ន្ធករណីនេះ ក្រសួងការពារជាតិ បញ្ជាក់ថា ឧបទ្ទវហេតុនេះ បានកើតឡើងអំឡុងពេលហោះហើរហ្វឹកហ្វឺន ដែលការហោះហើរនេះ ស្ថិតក្នុងផែនការហោះហើរហ្វឹកហ្វឺនជាប្រចាំរបស់កងទ័ពជើងអាកាសនៅតំបន់នោះ។ ដោយឡែក សមាសភាពនៅក្នុងឧទ្ធម្ភាគចក្រមានចំនួន ២ នាក់ គឺ ប្រធានក្រុមម្នាក់ និង អាកាសយានិកម្នាក់៕