អាជ្ញាធរស្រុកជុំគិរីណែនាំពលរដ្ឋដែលចាក់ដី និង​សាងសង់សំណង់រំលោភផ្ទៃអាងទំនប់ម្លេចរុះរើចេញជាបន្ទាន់

កាលពីថ្ងៃទី១៧ ខែកក្កដា ឆ្នាំ២០២៤ អាជ្ញាធរ និងមន្ត្រីជំនាញណែនាំឲ្យប្រជាពលរដ្ឋដែលបានចាក់ដី និងធ្វើសំណង់រំលោភយកដីនៅផ្ទៃអាងទំនប់ម្លេចដែលជាតំបន់រមណីយដ្ឋានទេសចរណ៍ធម្មជាតិដ៏ទាក់ទាញ ស្ថិតនៅភូមិបាក់នឹម ឃុំច្រេស ស្រុកជុំគិរី ខេត្តកំពត អោយកាយ និងរុះរើចេញវិញឱ្យអស់ និងត្រូវបញ្ឈប់សកម្មភាពជាបន្ទាន់។ នេះបើតាមយោងតាមសេចក្តីជូនដំណឹងរបស់រដ្ឋបាលស្រុកជុំគិរី ដែលបានចុះនៅថ្ងៃទី១៦ ខែកក្កដា ឆ្នាំ២០២៤។

តាមការជូនដំណឹងរបស់រដ្ឋបាលស្រុកជុំគិរីបានឲ្យដឹងថា កន្លងមករដ្ឋបាលស្រុកបានសង្កេតឃើញមានប្រជាពលរដ្ឋមួយចំនួនដែលរស់នៅអមជុំវិញផ្ទៃអាងទំនប់ម្លេច មានការចាក់ដី និងសង់សំណង់ផ្សេងៗ រំលោភបំពានផ្ទៃអាង ដែលបង្កឱ្យមានការប៉ះពាល់ដល់ផ្ទៃអាងទឹកសារធារណៈរបស់រដ្ឋ និងបង្កឱ្យមានភាពអនាធិបតេយ្យដល់តំបន់ទេសចរណ៍ធម្មជាតិ។

ក្នុងន័យនេះ រដ្ឋបាលស្រុកជុំគិរីបានសហការជាមួយមន្ទីរធនធានទឹក និងឧត្តុនិយមខេត្តកំពត សូមធ្វើការណែនាំដល់បងប្អូនប្រជាពលរដ្ឋទាំងអស់ដែលបានចាក់ដី និងសង់សំណង់អនាធិបតេយ្យ រំលោភបំពានផ្ទៃអាងទំនប់ម្លេចទាំងអស់ត្រូវអនុវត្តដូចខាងក្រោម៖
១.ត្រូវបញ្ឈប់ជាបន្ទាន់នូវការចាក់ដី និងសង់សំណង់រំលោភបំពានផ្ទៃអាង។ ២.ត្រូវកាយយកអាចម៍ដីដែលបានចាក់រំលោភបំពានចេញពីផ្ទៃអាងវិញ។ ៣. ត្រូវរុះរើសំណង់ដែលបានសាងសង់ចូលនៅក្នុងផ្ទៃអាងចេញវិញ។

រដ្ឋបាលស្រុកជុំគិរី ជឿជាក់ និងសង្ឃឹមយ៉ាងមុតមាំថា ប្រជាពលរដ្ឋដែលបានចាក់ដីរំលោភបំពានខាងលើ នឹងចូលរួមសហការក្នុងការអនុវត្តតាមសេចក្តីជូនដំណឹងនេះ ដោយស្មារតីទទួលខុសត្រូវខ្ពស់។ ទោះជាយ៉ាងណាក៏ដោយនៅក្នុងសេចក្តីជូនដំណឹងនោះ មិនបានបង្ហាញឈ្មោះអ្នកចាក់ដី និងសាងសង់សំណង់ទាំង១៥ទីតាំងនោះទេ ហើយក៏មិនបានប្រាប់អំពីកាលបរិច្ឆេត នៃកាកំណត់ឲ្យកាយអាចម៍ដី និងរុះរើសំណង់ចេញវិញដែរ៕

អត្ថបទ៖ សឹង រ៉ាត់