ព័ត៌មានជាតិ

អ្នកនាំពាក្យ ៖ បុគ្គលិកក្រុមហ៊ុន និង ប្តី ឬ ប្រពន្ធមន្ត្រីរាជការ មានអាយុ ៦០ ឆ្នាំ ឡើង អាចស្នើធ្វើបណ្ណ ប.ស.ស បាន

បានផុស

៦ ខែ មុន

នៅ

ថ្ងៃព្រហស្បតិ៍ ១៨ កក្កដា ២០២៤

ដោយ

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍នៅរសៀលថ្ងៃទី ១៨ កក្កដា នេះថា បុគ្គលិកក្រុមហ៊ុន និងប្តី ឬប្រពន្ធ(សហព័ទ្ធ) មន្ត្រីរាជការដែលកំពុងបម្រើការងារ ឬ មន្ត្រីសាធារណៈតាមអាណត្តិ ឬ អ្នកនយោបាយតាមអាណត្តិមានអាយុ ៦០ ឆ្នាំឡើង អាចស្នើធ្វើបណ្ណប.ស.ស. បាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់អ្នកនាំពាក្យនេះបានធ្វើឡើងបន្ទាប់ពីមានការលើកឡើងតៗគ្នាថាអ្នកដែលអាយុលើសពី ៦០ ឆ្នាំ អាចធ្វើបណ្ណប.ស.ស.បាន ពិសេសករណីបុគ្គលស្វ័យនិយោជន៍គ្រាន់តែបង់ភាគទានលើសជាងអ្នកមានអាយុក្រោម ៦០ ឆ្នាំ ដែលបង់ត្រឹម ១៥ ៦០០ រៀល ក្នុង ១ ខែ។

ពាក់ព័ន្ធបញ្ហានេះ លោក កត្តា អ៊ន បានពន្យល់ថា ចំពោះបុគ្គលស្វ័យនិយោជន៍ដែលមានអាយុលើស ៦០ ឆ្នាំ មិនអាចធ្វើបណ្ណប.ស.ស.ដូចការលើកឡើងតៗគ្នានោះបានទេ។ ប៉ុន្តែអ្នកដែលមានអាយុក្រោម ៦០ ឆ្នាំ នៅតែបន្តអាចធ្វើបណ្ណប.ស.ស.ដូចធម្មតាដដែលនៅតាមសាខាប.ស.ស. និងទីស្នាក់ការកណ្តាល ប.ស.ស។

លោក កត្តា អ៊ន បានបន្តទៀតថា ការអនុវត្តរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្តសម្រាប់អ្នកក្នុងបន្ទុកសមាជិក ប.ស.ស. ជាមន្ត្រីសាធារណៈ គឺជាកម្មវិធីរបស់រាជរដ្ឋាភិបាលបង្កើតឡើង ដើម្បីជួយដល់មន្ត្រីសាធារណៈ ឱ្យទទួលបានការថែទាំសុខភាពសម្រាប់ប្តី ឬប្រពន្ធ និងកូនក្នុងបន្ទុក ដែលអាចសម្រួលដល់ការចំណាយលើបញ្ហាសុខភាព និងគ្រោះថ្នាក់ផ្សេងៗ ក្នុងគោលដៅរក្សាលំនឹងប្រាក់ចំណូលក្នុងគ្រួសារ និងបង្កើនផលិតភាពការងារ។

លោកបានបន្តទៀតថា នៅពេលអ្នកក្នុងបន្ទុកសមាជិក ប.ស.ស. ជាមន្ត្រីសាធារណៈ ចុះឈ្មោះចូលជាសមាជិក ប.ស.ស. នោះ អ្នកក្នុងបន្ទុក (ប្តី ឬប្រពន្ធ និងកូននៅក្នុងបន្ទុក) នឹងទទួលបានអត្ថប្រយោជន៍ដូចជា សេវាពិនិត្យ ពិគ្រោះយោបល់ ព្យាបាល ដោយឥតគិតថ្លៃ៕

អត្ថបទ ៖ សំអឿន