ព័ត៌មានជាតិ

កម្ពុជា មានអ្នកប្រើប្រាស់បណ្ណ ប.ស.ស កើនឡើងជាង ២ លាន ២ សែននាក់ នៅទូទាំងប្រទេស

បានផុស

៨ ខែ មុន

នៅ

ថ្ងៃសុក្រ ១៩ កក្កដា ២០២៤

ដោយ

រហូតមកដល់ឆមាសទី ១ ឆ្នាំ ២០២៤ នេះ មានអ្នកប្រើប្រាស់បណ្ណ ប.ស.ស បានកើនឡើងប្រមាណជាង ២ លាន ២ សែននាក់ហើយ នៅទូទាំងប្រទេស ក្នុងនោះបុគ្គលស្វ័យនិយោជន៍មានជាង ១៧ ម៉ឺននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍នៅរសៀលថ្ងៃទី ១៩ កក្កដា នេះថា គិតត្រឹមឆមាសទី ១ ឆ្នាំ ២០២៤ នេះ ប.ស.ស. ផ្នែកថែទាំសុខភាពមានសមាជិកចំនួនសរុប ២ ២២៩ ៥២២ នាក់ (ស្រី ១ ២៥១ ២៣៨ នាក់) ក្នុងនោះមានកម្មករ-និយោជិតចំនួន ១ ៥៦៥ ២៤១ នាក់ (ស្រី ៩៦៣ ៨២៦ នាក់) មន្ត្រីរាជការ អតីតមន្ត្រីរាជការ និងអតីតយុទ្ធជន មានចំនួន ៤៣៧ ៤០៧ នាក់ (ស្រី ១៤៨ ៩៥៥ នាក់) បុគ្គលស្វ័យនិយោជន៍មានចំនួន ១៧០ ២៥៤ នាក់ (ស្រី ១០៦ ០៦២ នាក់) និងអ្នកនៅក្នុងបន្ទុកសមាជិក ប.ស.ស. មានចំនួន ៥៦ ៦២០ នាក់ (ស្រី ៣២ ៣៩៥ នាក់)។

លោកបានបន្តថា ចំណែក ប.ស.ស. ផ្នែកប្រាក់សោធន មានរោងចក្រ សហគ្រាសជាកាតព្វកិច្ចសរុប ចំនួន ២១ ២៨៨ មានកម្មករ-និយោជិតសកម្មចំនួន ១ ៥៦៥ ២៤១ នាក់ (ស្រី ៩៦៣ ៨២៦ នាក់) និងបានចុះបញ្ជីកាកម្មករ-និយោជិតដោយស្ម័គ្រចិត្តបានចំនួន ៤ ៩៧១ នាក់។ ក្នុងឆមាសទី ១ ឆ្នាំ ២០២៤ មានរោងចក្រ សហគ្រាសបន្ថែមជាកាតព្វកិច្ច ចំនួន ៣ ០១៣ បានចុះបញ្ជីកាសមាជិក ប.ស.ស. សម្រាប់កម្មករ-និយោជិតចំនួន ១២៩ ៥៦៨ នាក់ (ស្រី ៦១ ៣៨៩ នាក់) និងបានចុះបញ្ជីកាកម្មករ-និយោជិតដោយស្ម័គ្រចិត្ត បានចំនួន ៩៤១ នាក់ (ស្រី ៤៥៤ នាក់)។

លោកបានបន្តទៀតថា រីឯ ប.ស.ស. ផ្នែកហានិភ័យការងារ មានសមាជិកសរុបចំនួន ១ ៨១១ ៥២៧ នាក់ (ស្រី ១ ០៨៣ ៥២១ នាក់) ក្នុងនោះកម្មករ-និយោជិតចំនួន ១ ៥៦៥ ២៤១ នាក់ (ស្រី ៩៦៣ ៨២៦ នាក់) មន្ត្រីរាជការសាធារណៈ ២៤៦ ២៨៦ នាក់ (ស្រី ១១៩ ៦៩៥ នាក់) និងចំណាយតាវកាលិក ១៥ ០៥៦,០៦ លានរៀល និងបានអនុវត្តការថែទាំសុខភាពតាមប្រព័ន្ធមូលនិធិសមធម៌សុខាភិបាលសម្រាប់កម្មករ-និយោជិត នៃវិស័យសេដ្ឋកិច្ចក្រៅប្រព័ន្ធប្រមាណ ១៣៦ ៤០៥ នាក់៕

អត្ថបទ ៖ សំអឿន