រដ្ឋមន្ត្រីការបរទេស បញ្ជាក់ពីការជួយសម្រួលដល់បេសកកម្មរបស់រដ្ឋទូតមីយ៉ាន់ម៉ាថ្មីនៅកម្ពុជា

រដ្ឋមន្ត្រីការបរទេស លោក សុខ ចិន្តសោភា បានបញ្ជាក់ពីការគាំទ្ររបស់ក្រសួងការបរទេសកម្ពុជាក្នុងការជួយសម្រួលដល់ការបំពេញបេសកកម្មការទូតរបស់លោកឯកអគ្គរដ្ឋទូតមីយ៉ាន់ម៉ាថ្មីនៅកម្ពុជា ដើម្បីពង្រឹងទំនាក់ទំនងប្រទេសទាំងពីរ កម្ពុជា និងមីយ៉ាន់ម៉ា។

លោកឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីការបរទេសនៃកម្ពុជា បានអបអរសាទរ​ចំពោះលោក Kyaw Soe Min ដែលត្រូវបានតែងតាំងជាឯកអគ្គរដ្ឋទូតមីយ៉ាន់ម៉ាប្រចាំកម្ពុជា និងផ្តល់ការគាំទ្រពេញទំហឹងដល់លោកឯកអគ្គរដ្ឋទូត ក្នុងការជួយសម្រួលដល់ការបំពេញបេសកកម្មការទូតក្នុងអាណត្តិរបស់លោក។

ការបញ្ជាក់នេះ បានធ្វើឡើងកាលពីថ្ងៃទី១៨ ខែកក្កដា ឆ្នាំ២០២៤ ក្នុងគ្រាដែលលោក សុខ ចិន្តាសោភា បានទទួលជួបសម្តែងការគួរសមជាមួយលោក Kyaw Soe Min ឯកអគ្គរដ្ឋទូតថ្មីមីយ៉ាន់ម៉ាប្រចាំកម្ពុជា នៅទីស្តីការក្រសួង។

លោកឧបនាយករដ្ឋមន្ត្រី និងលោកឯកអគ្គរដ្ឋទូត បានសម្តែងនូវការពេញចិត្តចំពោះការរីកចម្រើននៃចំណងមិត្តភាពដ៏យូរអង្វែង និងបានឯកភាពគ្នាថា ប្រទេសទាំងពីរគួរសហការគ្នាប្រារឰខួបអនុស្សាវរីយ៍លើកទី៧០ នៃការបង្កើតទំនាក់ទំនងការទូតនៅឆ្នាំក្រោយ៕