ព័ត៌មានជាតិ

បេក្ខជនជាង ៨ ពាន់នាក់ ប្រឡងជ្រើសរើសគ្រូបឋមបញ្ចប់ដំណាក់កាលទី១

បានផុស

៨ ខែ មុន

នៅ

ថ្ងៃអាទិត្យ ២១ កក្កដា ២០២៤

ដោយ

ការប្រឡងប្រជែងជ្រើសរើសគ្រូបង្រៀនថ្នាក់បឋមសិក្សាបានឈានដល់ការបញ្ចប់ដំណាក់កាលទី១ នៅថ្ងៃទី ២១ ខែកក្កដា ឆ្នាំ ២០២៤ ដែលមានបេក្ខជន ៨ ៣៣១ នាក់ ប្រឡងថ្ងៃចុងក្រោយនេះ ក្រោមអធិបតីភាពឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈអញ្ជើញកាត់វិញ្ញាសារនៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជុក មុន្នី រដ្ឋលេខាធិការក្រសួងមុខងារសាធារណៈ មានប្រសាសន៍ថា ដំណើរការរៀបចំការប្រឡងជ្រើសរើសគ្រូបឋមសិក្សារយៈពេល ប៉ុន្មានថ្ងៃកន្លងមក បានប្រព្រឹត្តទៅដោយល្អ ដោយរលូន តម្លាភាព ស្មើភាពគ្នា អ្នកចេះគឺជាប់។ លទ្ធផលដំណាក់កាលទី១ គ្រោងប្រកាសបន្ទាប់ពីធ្វើកំណែក្នុងរយៈពេលប្រមាណមួយសប្ដាហ៍។

សូមបញ្ជាក់ថា បេក្ខជនដែលបានចូលរួមប្រឡងប្រជែងជ្រើសរើសគ្រូបឋមសិក្សាសរុបចំនួន ៣ ម៉ឺន ៨ ពាន់ ១៦៨ នាក់ ក្នុងនោះមានបេក្ខនារី ២៨ ៤៥៦ នាក់ និងបេក្ខជនមានពិរភាព ១៦៧ នាក់។ ក្នុងចំណោមបេក្ខជនប្រឡងជាង ៣ ម៉ឺន ៨ ពាន់នាក់នេះ ក្រសួងសម្រាំងយកតែ ៤ ០៤១ នាក់ សម្រាប់ប្រឡងដំណាក់កាលទី២ ដើម្បីជ្រើសរើសយក ១ ៣៤៧ នាក់។

ការប្រឡងគ្រូបឋមសិក្សា ត្រូវបានរៀបចំ ២ ដំណាក់កាល ( វិញ្ញាសា QCM លើកទី១ និងវិញ្ញាសារសរសេរលើកទី២) ដោយសារបរិមាណបេក្ខជនច្រើន វិញ្ញាសាប្រឡងដំណាក់កាលទី១៖ ពហុចម្លើយពាក់ព័ន្ធនឹងវប្បធម៌ទូទៅ៣០% និងគណិតវិទ្យា៧០% រយៈពេល២ម៉ោង តាមកម្មវិធីថ្នាក់ទី១២៕