មន្ត្រីជាន់ខ្ពស់ជំរុញមន្ត្រីគណបក្សពង្រឹង និងបង្កើនការជឿទុកចិត្តដល់ថ្នាក់ដឹកនាំ

មន្ត្រីជាន់ខ្ពស់គណបក្សប្រជាជន បានជំរុញឱ្យមន្ត្រីគណបក្សទាំងអស់ ត្រូវបន្តស្មារតីសាមគ្គី និងខិតខំអនុវត្តនូវបណ្តាភារកិច្ចចំពោះមុខឱ្យបានសកម្មប្រកបដោយស្មារតីទទួលខុសត្រូវខ្ពស់ថែមទៀត ដើម្បីពង្រឹងកម្លាំង ប្រជាប្រិយភាព និងការជឿទុកចិត្តមកលើការដឹកនាំរបស់គណបក្សដែលកំពុងដឹកនាំរដ្ឋាភិបាល។

ក្នុងពិធីសម្ពោធ និងកាត់ខ្សែបូរដាក់ឱ្យប្រើប្រាស់ជាផ្លូវការ អគារទីស្នាក់ការគណបក្សប្រជាជនកម្ពុជាឃុំក្រយា ស្ថិតក្នុងស្រុកសន្ទុក ខេត្តកំពង់ធំ កាលពីថ្ងៃទី២០ ខែកក្កដា ឆ្នាំ២០២៤ លោកស្រី បណ្ឌិត ជា សិរី សមាជិកគណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានស្រុកសន្ទុក បានលើកឡើងថា ការដណ្តើមប្រៀបឈ្នះរបស់បក្សក្នុងការបោះឆ្នោតជ្រើសតាំងតំណាងរាស្រ្តនីតិកាលទី៧ ឆ្នាំ២០២៣ កន្លងមកនេះគឺជាជោគជ័យធំធេងណាស់។

លោកស្រីបណ្ឌិត បានក៏ថ្លែងអំណរគុណ និងកោតសរសើរចំពោះកិច្ចខិតខំប្រឹងប្រែងបំពេញភារកិច្ចប្រកបដោយការទទួលខុសត្រូវខ្ពស់របស់សមាជិកសមាជិកាគណបក្សទូទាំងឃុំ ដែលកន្លងមកនេះបានខិតខំប្រឹងប្រែងបំពេញការងារដោយភាពស្មោះត្រង់ជូនគណបក្ស និងប្រជាជន។

ទោះជាលទ្ធផលដែលទទួលបាននេះល្អប្រសើរយ៉ាងណាក៏ដោយ លោកស្រីបណ្ឌិត ជា សិរី នៅតែអំពាវនាវឱ្យសមាជិកបក្សបន្តថែរក្សាប្រពៃណីដ៏ល្អរបស់ខ្លួនបន្តទៀត ដោយត្រូវធ្វើអ្វីៗគ្រប់យ៉ាងទាំងកម្លាំងកាយ និងកម្លាំងចិត្តដើម្បីបម្រើការពារផលប្រយោជន៍ប្រជាជន សង្គមជាតិ និងគណបក្សប្រជាជនបន្តទៀត។

លោកស្រីបណ្ឌិតបានសង្កត់ធ្ងន់ថា ជោគជ័យ នៃការបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣ កន្លងមកនេះមានតម្លៃធំធេងណាស់នៅក្នុងការថែរក្សាការពារសន្តិភាព និងការអភិវឌ្ឍជាតិ។ ដូចនេះសមាជិក-សមាជិកាគណបក្សប្រជាជនកម្ពុជាទាំងអស់ត្រូវបន្តការគាំទ្រឱ្យពេញទំហឹងចំពោះគោលនយោបាយគណបក្សប្រជាជនកម្ពុជា ដែលមាន សម្តេចអគ្គមហាសេនាបតីតេជោ ហ៊ុន សែន ប្រធានគណបក្ស និងត្រូវចូលរួមអនុវត្តឱ្យសកម្មថែមទៀតជាមួយរាជរដ្ឋាភិបាលកម្ពុជាដឹកនាំដោយ សម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី ដើម្បីរួមចំណែកអភិវឌ្ឍប្រទេសជាតិឱ្យទទួលបានការរីកចម្រើន និងសម្បូររុងរឿងក្រោមដំបូលសុខសន្តិភាព។

គួរបញ្ជាក់ថា អគារស្នាក់ការគណបក្សឃុំក្រយា ដែលសម្ភោធដាក់ឱ្យប្រើប្រាស់នៅពេលនេះ មានទទឹង ៧,២០ ម៉ែត្រ  បណ្ដោយ ១២ ម៉ែត្រ ក្នុងនោះក៏មានរបង ២៥ ម៉ែត្រ និងមានខ្លោងទ្វារ ៤ ម៉ែត្រ បន្ទប់ទឹកចំនួន ១ ខ្នង ២ បន្ទប់។ សំណង់នេះបានចាប់ផ្ដើមសាងសង់នៅ ថ្ងៃទី២៩ ខែមេសា ឆ្នាំ២០២២ បញ្ចប់ការសាងសង់នៅ ថ្ងៃទី២១ ខែកក្កដា ឆ្នាំ២០២៣ ចំណាយថវិកាចំនួនសរុប ២៦ ០០០ ដុល្លា ដែលជាអំណោយ លោកបណ្ឌិត ជា ចាន់តូ និងលោកស្រី ខៀវ ស៊ីណា ដើម្បីជាចំណងដៃប្រវត្តិសាស្ត្រជូនមន្ត្រីជូនសមាជិកគណបក្ស និងប្រជាពលរដ្ឋ ក្នុងឃុំសម្រាប់ប្រើប្រាស់។

នៅរសៀលថ្ងៃដដែលនោះដែរ លោកស្រីបណ្ឌិត ជា សិរី ក៏បានអញ្ជើញកាត់ខ្សែបូរដាក់ឱ្យប្រើប្រាស់ជាផ្លូវការបន្ទប់កុំព្យូទ័រ និងប្រគល់កុំព្យូទ័រដល់វិទ្យាល័យតាំងក្រសាំង ចំនួន ៣០ គ្រឿង និងវិទ្យាល័យ ហ៊ុន សែន សន្ទុក ចំនួន ២០ គ្រឿង ដែលជាអំណោយផ្ទាល់របស់លោកជំទាវបណ្ឌិតដើម្បីជួយសម្រួលដល់ការសិក្សារបស់សិស្សានុសិស្សក្នុងវិទ្យាល័យទាំង២។

ក្នុងឱកាសនោះ លោកស្រីបណ្ឌិត ជា សិរី បានបញ្ជាក់ទៅកាន់ក្មួយៗសិស្សានុសិស្សថា ការទទួលបានបន្ទប់កុំព្យូទរ័សម្រាប់សិក្សាមុខជំនាញកុំព្យូទ័ររបស់វិទ្យាល័យទាំង២ នាពេលនេះគឺជាមោទនភាព និងជាសមិទ្ធផលថ្មីមួយទៀតដែលមិនធ្លាប់មានសម្រាប់សាលាទាំង២។ ជាមួយនេះ លោកស្រីបណ្ឌិតនូវបានបញ្ជាក់ថា ក្នុងសម័យប្រឡងឆ្នាំនេះ បើសិស្សណាប្រឡងបាននិទ្ទេស A នោះលោកស្រីនឹងទទួលបានអាហារូបករណ៍ ១០០% សិក្សានៅមណ្ឌលសិក្សាបច្ចេកទេសធនាគារ រួមទាំងកន្លែងស្នាក់នៅ និងមានប្រាក់ឧបត្ថម្ភមួយចំនួនទៀត៕

អត្ថបទ៖ សំអឿន