ព័ត៌មានជាតិ

សន្លឹកកិច្ចការបេក្ខជនប្រឡងគ្រូបង្រៀនបឋមសិក្សា (វិញ្ញាសាសរសេរលើកទី ១) ចាប់ផ្ដើមកែ នាព្រឹកនេះ

បានផុស

៧ ខែ មុន

នៅ

ថ្ងៃចន្ទ ២២ កក្កដា ២០២៤

ដោយ

នាព្រឹកថ្ងៃទី ២២ ខែកក្កដា ឆ្នាំ ២០២៤ នេះ នៅមណ្ឌលកំណែសាលាភូមិន្ទរដ្ឋបាល ឯកឧត្ដមឧបនាយករដ្ឋមន្ត្រី ហ៊ុន ម៉ានី ប្រធានគណៈកម្មការរៀបចំការប្រឡងប្រជែង បានអញ្ជើញដឹកនាំពិនិត្យដោយផ្ទាល់ទៅលើរបៀបរបប និងនីតិវិធីកែសន្លឹកកិច្ចការប្រឡងប្រជែងជ្រើសរើសគ្រូបង្រៀននៅបឋមសិក្សា (វិញ្ញាសាសរសេរលើកទី ១)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនោះ ក៏មានការចូលរួមពីសំណាក់ថ្នាក់ដឹកនាំ អន្តរក្រសួង-ស្ថាប័នពាក់ព័ន្ធ ក្រុមការងារអនុគណៈកម្មការជំនាញ អ្នកសង្កេតការណ៍មកពីសាកលវិទ្យាល័យ និងសាធារណជនដាក់ពាក្យចូលរួមស្ម័គ្រចិត្ត ព្រមទាំងអ្នកសារព័ត៌មានជាច្រើនរូប។

ការកែសន្លឹកកិច្ចការបេក្ខជនប្រឡងប្រជែងជ្រើសរើសគ្រូបង្រៀននៅបឋមសិក្សា នាព្រឹកនេះ ស្របតាមនិយាមនីតិវិធីប្រតិបត្តិ ស្ដីពីការប្រឡងប្រជែងជ្រើសរើសមន្ត្រីរាជការស៊ីវិល បានចែងយ៉ាងច្បាស់ «ការកែសន្លឹកកិច្ចការរបស់បេក្ខជន ត្រូវចាប់ផ្ដើមនៅព្រឹកបន្ទាប់ពីការប្រឡងប្រជែងជ្រើសរើសត្រូវបានបញ្ចប់»។ ជាក់ស្ដែងការប្រឡងប្រជែងដែលទើបតែបញ្ចប់កាលពីម្សិលមិញ ថ្ងៃទី ២១ ខែកក្កដា ឆ្នាំ ២០២៤។

សូមជម្រាបថា កំណែសន្លឹកកិច្ចការ ចាប់ផ្ដើមពីម៉ោង ៨:០០ ព្រឹក តាមរយៈការកាត់ក្បាលសន្លឹកកិច្ចការ ការចុះលេខ និងនីតិវិធីនានា ស្របតាមនិយាមនីតិវិធីប្រតិបត្តិដែលបានកំណត់ ដោយឈរលើគោលការណ៍គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព៕